മനുഷ്യരുടെ ആരോഗ്യസ്ഥിതി നിർണ്ണയിക്കുന്നതിൽ പുതിയൊരു ട്രെൻഡായി മാറിയിരിക്കുകയാണ് ‘ബയോളജിക്കൽ ഏജ്’ (Biological Age) അല്ലെങ്കിൽ ജൈവ പ്രായം. ജനിച്ച തീയതിയെ അടിസ്ഥാനമാക്കി കണക്കാക്കുന്ന സാധാരണ വയസ്സിൽ നിന്ന് വ്യത്യസ്തമായി, നമ്മുടെ ശരീരത്തിലെ കോശങ്ങളുടെയും അവയവങ്ങളുടെയും യഥാർത്ഥ ആരോഗ്യനിലയെയാണ് ഇത് സൂചിപ്പിക്കുന്നത്. 39 വയസ്സുള്ള ഇൻസ്റ്റാഗ്രാം ഇൻഫ്ലുവൻസറും മൂന്ന് കുട്ടികളുടെ അമ്മയുമായ എറിൻ സ്റ്റാൻസിക്, തന്റെ ബയോളജിക്കൽ ഏജ് വെറും 22 മാത്രമാണെന്ന് അവകാശപ്പെടുന്നു. ‘ഹൈ-വോളിയം, ലോ-കാലറി’ (High-volume, low-calorie) ഭക്ഷണക്രമം പിന്തുടർന്ന് താൻ 9 കിലോയിൽ അധികം ഭാരം കുറച്ചതായി ഇവർ വ്യക്തമാക്കുന്നു.
കേവലം 20 അടിസ്ഥാന ഭക്ഷണസാധനങ്ങൾ മാത്രമാണ് താൻ ഇതിനായി ഉപയോഗിക്കുന്നതെന്ന് എറിൻ പറയുന്നു. കുറഞ്ഞ കാലറിയും എന്നാൽ വലിയ അളവിലുള്ളതുമായ ആഹാരം കഴിക്കുന്ന രീതിയാണിത്. വെള്ളവും നാരുകളും (Fibre) ധാരാളം അടങ്ങിയ പഴങ്ങൾ, പച്ചക്കറികൾ, ധാന്യങ്ങൾ, പ്രോട്ടീൻ എന്നിവയാണ് ഈ ഭക്ഷണക്രമത്തിലെ പ്രധാന ഘടകങ്ങൾ. ഇത് വയറു നിറഞ്ഞെന്ന തോന്നൽ ഉണ്ടാക്കുകയും പെട്ടെന്ന് വിശക്കാതിരിക്കാൻ സഹായിക്കുകയും ചെയ്യുന്നു.
വാഴപ്പഴം, ബെറി പഴങ്ങൾ, കിഴങ്ങുവർഗ്ഗങ്ങൾ, ഇലക്കറികൾ, ഓട്സ്, പയറുവർഗ്ഗങ്ങൾ, ചിയ വിത്തുകൾ, സോയാ പാൽ തുടങ്ങിയവയാണ് എറിൻ തന്റെ ഭക്ഷണത്തിൽ പ്രധാനമായും ഉൾപ്പെടുത്തിയത്. സംസ്കരിച്ച ഭക്ഷണങ്ങൾ (Processed foods) പൂർണ്ണമായി ഒഴിവാക്കി, നാച്ചുറലായ ഭക്ഷണസാധനങ്ങൾ മാത്രമാണ് കഴിച്ചത്. കാലറി കുറഞ്ഞതും എന്നാൽ നാരുകളും വെള്ളവും ഉയർന്ന അളവിലുള്ളതുമായ ഭക്ഷണങ്ങൾ കഴിക്കുമ്പോൾ വിശപ്പ് കുറയുകയും ശരീരഭാരം എളുപ്പത്തിൽ നിയന്ത്രിക്കാൻ സാധിക്കുകയും ചെയ്യുമെന്ന് വിദഗ്ധരും ചൂണ്ടിക്കാണിക്കുന്നു.
