ഇൻസ്റ്റഗ്രാമിലൂടെ സൗഹൃദം സ്ഥാപിച്ച് പ്രായപൂർത്തിയാകാത്ത പെൺകുട്ടിയെ ലൈംഗികമായി പീഡിപ്പിച്ച അധ്യാപകൻ തമിഴ്നാട്ടിലെ ധർമപുരിയിൽ അറസ്റ്റിലായി. സ്വകാര്യ സ്കൂളിലെ അധ്യാപകനായ ഇയാൾക്കെതിരെ പോക്സോ നിയമപ്രകാരം കേസ് എടുത്തു. ഇൻസ്റ്റഗ്രാം വഴി സൗഹൃദം സ്ഥാപിച്ച ശേഷമാണ് പ്രതി വിദ്യാർഥിനിയുമായി അടുത്തത്.
പെൺകുട്ടിയുടെ വിശ്വാസം നേടിയെടുത്ത പ്രതി വീട്ടിൽ ആരുമില്ലാത്ത അവസരങ്ങൾ മുതലെടുത്ത് അവിടെയെത്തി ലൈംഗികമായി ഉപദ്രവിക്കുകയായിരുന്നുവെന്ന് പൊലീസ് അറിയിച്ചു. വിവരം പുറത്തറിഞ്ഞതോടെ കുടുംബാംഗങ്ങൾ പൊലീസിൽ പരാതി നൽകുകയായിരുന്നു. ഇയാൾ വീടിന്റെ പിൻവാതിലിലൂടെ രക്ഷപ്പെടാൻ ശ്രമിക്കുന്ന സിസിടിവി ദൃശ്യങ്ങളും വീട്ടുകാർക്ക് ലഭിച്ചിട്ടുണ്ട്. പെൺകുട്ടിക്ക് പ്രായപൂർത്തിയായിട്ടില്ലാത്തതിനാൽ സമ്മതത്തോടെയാണ് സംഭവം നടന്നതെന്ന് വാദിച്ചാലും പ്രതിക്ക് നിയമപരമായ യാതൊരു ഇളവും ലഭിക്കില്ലെന്ന് പൊലീസ് വ്യക്തമാക്കി.
ഇത്തരം കേസുകളിൽ പ്രായപൂർത്തിയാകാത്ത കുട്ടികളുടെ സമ്മതത്തിന് നിയമപരമായി യാതൊരു പ്രസക്തിയുമില്ലെന്ന് പൊലീസ് ചൂണ്ടിക്കാട്ടി. ക്രൂരത എപ്പോൾ മുതലാണ് ആരംഭിച്ചതെന്ന് അറിയാൻ വിപുലമായ അന്വേഷണം പുരോഗമിക്കുകയാണ്. സംഭവത്തെ തുടർന്ന് കുട്ടികളുടെ സോഷ്യൽ മീഡിയ ഉപയോഗത്തിന് പ്രായപരിധി നിശ്ചയിക്കണമെന്നും മാതാപിതാക്കളുടെ മേൽനോട്ടം ശക്തമാക്കണമെന്നും ബാലാവകാശ പ്രവർത്തകർ ആവശ്യപ്പെട്ടു.
അധ്യാപകർ കുട്ടികളുമായി പാലിക്കേണ്ട അതിർവരമ്പുകൾ ലംഘിക്കപ്പെട്ടാൽ അതിന്റെ പൂർണ്ണ ഉത്തരവാദിത്തം അധ്യാപകനു മാത്രമാണെന്ന് ചൈൽഡ് ആക്ടിവിസ്റ്റ് രമ്യ ശ്രീറാം പറഞ്ഞു. തമിഴ്നാട്ടിൽ ഇത്തരം കുറ്റകൃത്യങ്ങൾ വർധിക്കുകയാണെന്ന് പ്രതിപക്ഷം ആരോപിച്ചു. അതേസമയം, സ്ത്രീകൾക്കെതിരായ അതിക്രമങ്ങൾ തടയുന്നതിനായി തമിഴ്നാട് സർക്കാർ ‘സിംഗപ്പെൺ’ എന്ന പ്രത്യേക പദ്ധതി ആവിഷ്കരിച്ചിട്ടുണ്ട്.
