ആരോഗ്യകരമായ ഭക്ഷണം കഴിക്കുക എന്നത് തടി കുറയ്ക്കുന്നതിനോ കർശനമായ ഡയറ്റ് പിന്തുടരുന്നതിനോ മാത്രം ഉള്ളതല്ല. ദിവസവും നമ്മൾ തിരഞ്ഞെടുക്കുന്ന ഭക്ഷണം പ്രായമാകുമ്പോഴും നമ്മെ ആരോഗ്യത്തോടെയും സന്തോഷത്തോടെയും നിലനിർത്തുന്നതിൽ വലിയ പങ്കുവഹിക്കുന്നുണ്ട്.
അടുത്ത 20 വർഷത്തേക്ക് ആരോഗ്യം നിലനിർത്താൻ ആഗ്രഹിക്കുന്നുവെങ്കിൽ ഓരോ നേരത്തെ ഭക്ഷണത്തിലും ശ്രദ്ധ നൽകണമെന്ന് ന്യൂട്രീഷ്യനിസ്റ്റ് അഞ്ജലി മുഖർജി പറയുന്നു. രാവിലത്തെ പ്രാതൽ, ഉച്ചഭക്ഷണം, അത്താഴം എന്നിവയിൽ എന്തൊക്കെ ഉൾപ്പെടുത്തണമെന്ന് പ്ലാൻ ചെയ്യാൻ ദിവസവും രാവിലെ 10 മിനിറ്റ് മാറ്റിവെക്കാനും അവർ നിർദ്ദേശിക്കുന്നു. ഈ ഒരു ചെറിയ ശീലം ദിവസം മുഴുവൻ ശരിയായ ഭക്ഷണം കഴിക്കാനും അവസാന നിമിഷം അനാരോഗ്യകരമായ ഭക്ഷണങ്ങൾ തിരഞ്ഞെടുക്കുന്നത് ഒഴിവാക്കാനും സഹായിക്കും. തങ്ങളുടെ ഭക്ഷണക്രമം എങ്ങനെ ക്രമീകരിക്കാമെന്ന് അടുത്തിടെ ഒരു ഇൻസ്റ്റാഗ്രാം പോസ്റ്റിലൂടെ അഞ്ജലി വിശദീകരിക്കുകയുണ്ടായി.
അഞ്ജലി മുഖർജിയുടെ വാക്കുകൾ ഇങ്ങനെ: “രാവിലെ രണ്ടു ഗ്ലാസ് വെള്ളം കുടിച്ചുകൊണ്ട് ദിവസം ആരംഭിക്കുക. സസ്യാഹാരം കഴിക്കുന്നവരാണെങ്കിൽ മുളപ്പിച്ച ധാന്യങ്ങളും, മാംസാഹാരം കഴിക്കുന്നവരാണെങ്കിൽ മുട്ടയും കഴിക്കാം. ഇതിനൊപ്പം ഒരു ഗ്ലാസ് വെജിറ്റബിൾ ജ്യൂസും കുടിക്കാം. ഉച്ചഭക്ഷണത്തിന് ജോവർ റൊട്ടിയോ നാച്നി (റാഗി) റൊട്ടിയോ കറിയും പരിപ്പുകറിയും (സസ്യാഹാരികൾക്ക്) ചേർത്ത് കഴിക്കാം. മാംസാഹാരികൾക്ക് കോഴിയിറച്ചിയോ മീനോ ഉൾപ്പെടുത്താം. വൈകുന്നേരം ഗ്രീൻ ടീക്കൊപ്പം കുറച്ച് ചെറുപയറോ കടലയോ കഴിക്കാം.”
“അത്താഴത്തിന് സൂപ്പിനും സലാഡിനുമൊപ്പം കോഴിയിറച്ചിയോ മീനോ കഴിക്കാം, അല്ലെങ്കിൽ റൊട്ടി, പച്ചക്കറി കറി, പരിപ്പുകറി, സലാഡ് എന്നിവ കഴിക്കാം. ഈ ഭക്ഷണങ്ങളിലെല്ലാം കൃത്യമായ സന്തുലിതാവസ്ഥയുണ്ട്. പ്രോട്ടീൻ, കൊഴുപ്പ്, കാര്‍ബോഹൈഡ്രേറ്റ്, നാരുകൾ, ആന്റിഓക്‌സിഡന്റുകൾ എന്നിവയെല്ലാം ഇതിൽ അടങ്ങിയിരിക്കുന്നു. ഇങ്ങനെ ഭക്ഷണം കൃത്യമായി പ്ലാൻ ചെയ്താൽ എപ്പോഴും മികച്ച ആരോഗ്യം നിങ്ങൾക്ക് സ്വന്തമാക്കാം.”
നമ്മുടെ ദൈനംദിന ഭക്ഷണ ശീലങ്ങൾക്ക് ശാരീരികവും മാനസികവുമായ ആരോഗ്യത്തെ സ്വാധീനിക്കാൻ കഴിയുമെന്ന് അപ്പോളോ 24/7 വ്യക്തമാക്കുന്നു.
ശരിയായ രീതിയിൽ ഭക്ഷണം കഴിക്കുന്നത് മികച്ച ദഹനത്തിന് സഹായിക്കുകയും പൊതുവായ പല ആരോഗ്യപ്രശ്നങ്ങളിൽ നിന്നും ശരീരത്തെ സംരക്ഷിക്കുകയും ചെയ്യും. എന്നാൽ അനാരോഗ്യകരമായ ഭക്ഷണശീലങ്ങൾ ഉയർന്ന രക്തസമ്മർദ്ദം, പോഷകാഹാരക്കുറവ്, പ്രതിരോധശേഷി കുറയൽ എന്നിവയ്ക്ക് കാരണമാകും. ഭക്ഷണം നമ്മുടെ മാനസികാവസ്ഥയെയും സ്വാധീനിക്കുന്നുണ്ട്. ഒമേഗ 3 ഫാറ്റുകൾ, ആന്റിഓക്‌സിഡന്റുകൾ, വിറ്റാമിനുകൾ എന്നിവ അടങ്ങിയ ഭക്ഷണങ്ങൾ മെച്ചപ്പെട്ട മാനസികാരോഗ്യത്തെ പിന്തുണയ്ക്കുമ്പോൾ, സംസ്കരിച്ച പഞ്ചസാരയും അനാരോഗ്യകരമായ കൊഴുപ്പും അടങ്ങിയ ഭക്ഷണങ്ങൾ അമിതമായി കഴിക്കുന്നത് പ്രതികൂല ഫലങ്ങൾ ഉണ്ടാക്കാം.
അതുകൊണ്ടാണ് ഓരോ നേരത്തെ ഭക്ഷണവും ശരീരത്തിന് ആവശ്യമായ പോഷകങ്ങൾ നൽകാനും മൊത്തത്തിലുള്ള ആരോഗ്യം മെച്ചപ്പെടുത്താനുമുള്ള അവസരമായി മാറുന്നത്.
