ലക്ഷണങ്ങളൊന്നും പ്രകടിപ്പിക്കാതെ തന്നെ ഹൃദയധമനികളിൽ കൊളസ്ട്രോൾ അടിഞ്ഞുകൂടി ഹൃദ്രോഗ സാധ്യത വർദ്ധിക്കാം. ഇത്തരത്തിൽ ലക്ഷണങ്ങൾ പ്രകടമാകുന്നതിന് മുൻപ് തന്നെ ഹൃദയത്തിന്റെ ആരോഗ്യം വിലയിരുത്താൻ സഹായിക്കുന്ന പരിശോധനയാണ് കൊറോണറി ആർട്ടറി കാൽസ്യം (CAC) സ്കാൻ അഥവാ ഹാർട്ട് കാൽസ്യം സ്കാൻ. പ്രത്യേക തരം സിടി സ്കാൻ ഉപയോഗിച്ച് നടത്തുന്ന ഈ പരിശോധന വഴി ഹൃദയധമനികളിൽ അടിഞ്ഞുകൂടിയിരിക്കുന്ന കാൽസ്യത്തിന്റെ അളവ് കണ്ടെത്താനാകും. ഇതിലൂടെ ലഭിക്കുന്ന ‘കാൽസ്യം സ്കോർ’ ഭാവിയിലുണ്ടായേക്കാവുന്ന ഹൃദയാഘാത സാധ്യതയെക്കുറിച്ച് സൂചന നൽകുന്നു. എന്നാൽ ഈ പരിശോധന എല്ലാവർക്കും ആവശ്യമില്ലെന്ന് ഫോർട്ടിസ് ഓഖ്‌ലയിലെ കാർഡിയോളജി വിഭാഗം ഡയറക്ടർ ഡോ. വിശാൽ റസ്തോഗി വ്യക്തമാക്കുന്നു.
ഹൃദ്രോഗ സാധ്യത എത്രത്തോളമുണ്ടെന്ന് കൃത്യമായി തിരിച്ചറിയാൻ സാധിക്കാത്ത ഘട്ടങ്ങളിലാണ് ഈ പരിശോധന ഏറ്റവും പ്രയോജനപ്പെടുന്നത്. 40 നും 60 നും ഇടയിൽ പ്രായമുള്ള, കൊളസ്ട്രോൾ അല്ലെങ്കിൽ രക്തസമ്മർദ്ദം അല്പം കൂടുതലുള്ള, എന്നാൽ മറ്റ് ലക്ഷണങ്ങളൊന്നുമില്ലാത്ത വ്യക്തികളിൽ പ്രതിരോധ ചികിത്സകൾ ആവശ്യമാണോ എന്ന് തീരുമാനിക്കാൻ കാൽസ്യം സ്കോർ സഹായിക്കും. കാൽസ്യം സ്കോർ പൂജ്യം (Zero) ആണെങ്കിൽ നിലവിൽ ധമനികളിൽ കാൽസ്യം അടിഞ്ഞുകൂടിയിട്ടില്ലെന്നാണ് അർത്ഥം. ഇത് ആശ്വാസകരമാണെങ്കിലും ഭാവിയിൽ ഹൃദ്രോഗം വരില്ലെന്നതിന് ഉറപ്പില്ല. കാരണം കാൽസ്യം അടങ്ങാത്ത പ്ലാക്കുകൾ (non-calcified plaque) ഈ സ്കാനിൽ തെളിയണമെന്നില്ല.
യൂണിറ്റ് സ്കോർ വളരെ ഉയർന്നതാണെങ്കിൽ ധമനികളിൽ കാൽസ്യം അടിഞ്ഞുകൂടിയിട്ടുണ്ടെന്നും ഹൃദ്രോഗ സാധ്യത കൂടുതലാണെന്നും മനസ്സിലാക്കാം. ഇതിനർത്ഥം ഉടൻ തന്നെ ഹൃദയാഘാതം ഉണ്ടാകും എന്നല്ല, മറിച്ച് കൊളസ്ട്രോൾ, ബിപി, പ്രമേഹം തുടങ്ങിയവ കൂടുതൽ ശ്രദ്ധയോടെ നിയന്ത്രിക്കേണ്ടതുണ്ടെന്ന മുന്നറിയിപ്പാണ്. എന്നാൽ യുവാക്കൾക്കും ഹൃദ്രോഗ സാധ്യത വളരെ കുറഞ്ഞവർക്കും ഈ സ്കാൻ ആവശ്യമില്ല. അതുപോലെ തന്നെ നേരത്തെ ഹൃദയാഘാതം വന്നവർ, ആൻജിയോപ്ലാസ്റ്റി അല്ലെങ്കിൽ ബൈപാസ് സർജറി കഴിഞ്ഞവർ എന്നിവർക്കും ഈ പരിശോധന വീണ്ടും ചെയ്യേണ്ടതില്ല.
നെഞ്ചുവേദന, ശ്വാസംമുട്ടൽ, അമിതമായ വിയർപ്പ് തുടങ്ങിയ ലക്ഷണങ്ങൾ ഉള്ളപ്പോൾ അടിയന്തര വൈദ്യസഹായമാണ് തേടേണ്ടത്, അല്ലാതെ കാൽസ്യം സ്കാൻ അല്ല. വളരെ വേഗത്തിൽ ചെയ്യാവുന്നതും വലിയ അളവിൽ റേഡിയേഷൻ ഇല്ലാത്തതുമായ പരിശോധനയാണിത്. എന്നിരുന്നാലും രക്തസമ്മർദ്ദം, കൊളസ്ട്രോൾ, പ്രമേഹം, പുകവലി, പാരമ്പര്യം എന്നിവ വിലയിരുത്തിയ ശേഷം മാത്രം ഡോക്ടറുടെ നിർദ്ദേശപ്രകാരം അനിവാര്യമാണെങ്കിൽ മാത്രം ഈ സ്കാൻ ചെയ്യുന്നതാണ് ഉചിതം.
