ഹിന്ദി മീഡിയത്തില്‍ പഠിച്ച വിദ്യാർത്ഥികൾക്ക് ഇനി ഇൻഡോറിലെ ശ്രീ ജി.എസ്. ഇൻസ്റ്റിറ്റ്യൂട്ട് ഓഫ് ടെക്നോളജി ആൻഡ് സയൻസിൽ (SGSITS) സിവിൽ എഞ്ചിനീയറിംഗ് ഹിന്ദിയിൽ പഠിക്കാം. ഈ അധ്യയന വർഷം മുതലാണ് ഇൻസ്റ്റിറ്റ്യൂട്ട് ബി.ടെക് സിവിൽ എഞ്ചിനീയറിംഗ് കോഴ്സ് ഹിന്ദി മാധ്യമത്തിൽ ആരംഭിച്ചത്.
30 സീറ്റുകളുള്ള ഈ പ്രത്യേക ബാച്ചിൽ നിലവിൽ 20-ഓളം വിദ്യാർത്ഥികൾ പ്രവേശനം നേടിയിട്ടുണ്ട്. ഈ കോഴ്സിൽ ചേരുന്ന വിദ്യാർത്ഥികൾക്ക് അവസാന വർഷത്തിൽ മധ്യപ്രദേശ് സർക്കാരിന്റെ 2 ലക്ഷം രൂപ ധനസഹായത്തിന് അർഹതയുണ്ടായിരിക്കുമെന്നും അധികൃതർ അറിയിച്ചു.
ദേശീയ വിദ്യാഭ്യാസ നയത്തിന് (NEP) അനുസൃതമായാണ് ഈ പുതിയ പ്രോഗ്രാം ആരംഭിച്ചിരിക്കുന്നത്. ഹിന്ദി മീഡിയം സ്കൂളുകളിൽ നിന്ന് പഠിച്ചിറങ്ങുന്ന വിദ്യാർത്ഥികൾക്ക് സാങ്കേതിക വിദ്യാഭ്യാസം കൂടുതൽ എളുപ്പമാക്കുക എന്നതാണ് ഇതിന്റെ ലക്ഷ്യം. ഇംഗ്ലീഷിൽ ക്ലാസുകൾ എടുക്കുമ്പോൾ ഹിന്ദി മാധ്യമത്തിൽ നിന്ന് വരുന്ന കുട്ടികൾക്ക് വിഷയങ്ങൾ മനസ്സിലാക്കാൻ പ്രയാസമുണ്ടാകാറുണ്ടെന്നും, ഇത് കാരണം പലരും പഠനം പകുതിക്ക് ഉപേക്ഷിക്കാറുണ്ടെന്നും സിവിൽ എഞ്ചിനീയറിംഗ് വിഭാഗം മേധാവി സുനിൽ അജ്മേറ പറഞ്ഞു. പുതിയ ബാച്ചിലൂടെ വിദ്യാർത്ഥികൾക്ക് പഠിക്കുന്നതും പരീക്ഷ എഴുതുന്നതും ഹിന്ദിയിലാക്കാം.
കഴിഞ്ഞ നാല് വർഷമായി ഇതിനായുള്ള തയ്യാറെടുപ്പിലായിരുന്നു ഇൻസ്റ്റിറ്റ്യൂട്ട്. അധ്യാപകർ ചേര്‍ന്ന് ഇംഗ്ലീഷിലുള്ള പഠനസാമഗ്രികൾ ഹിന്ദിയിലേക്ക് തർജ്ജമ ചെയ്യുകയും, വിഷയങ്ങൾ ഹിന്ദിയിൽ അധ്യയനം നടത്തുന്നതിനായി പ്രത്യേക പരിശീലന കളരികൾ സംഘടിപ്പിക്കുകയും ചെയ്തിരുന്നു.
ഹിന്ദിയിൽ പഠിക്കുന്നുണ്ടെങ്കിലും വിദ്യാർത്ഥികൾക്ക് ഇംഗ്ലീഷ് ഭാഷാ നൈപുണ്യം മെച്ചപ്പെടുത്താനുള്ള പരിശീലനവും നൽകും. ഭാവി പഠനത്തിനും ജോലി സാധ്യതകൾക്കും ഇംഗ്ലീഷ് ആവശ്യമായതിനാലാണിത്. കഠിനമായ എഞ്ചിനീയറിംഗ് വിഷയങ്ങൾ മാതൃഭാഷയിൽ പഠിക്കുന്നത് ആശയങ്ങൾ വ്യക്തമായി മനസ്സിലാക്കാൻ സഹായിക്കുമെന്ന് പ്രവേശനം നേടിയ വിദ്യാർത്ഥികൾ അഭിപ്രായപ്പെടുന്നു.
