റഷ്യയിലെ ഒരു സ്റ്റോറിൽ വെച്ച് ഉപഭോക്താവും ഹ്യൂമനോയിഡ് റോബോട്ടും തമ്മിലുണ്ടായ വിചിത്രമായ സംഭവം സോഷ്യൽ മീഡിയയിൽ വൈറലാകുന്നു. കടയിലെത്തിയ ഒരാൾ റോബോട്ടിന് സമീപത്തേക്ക് വരികയും അതിനെ തള്ളാൻ ശ്രമിക്കുകയും ചെയ്യുന്നതായി വീഡിയോയിൽ കാണാം. തൊട്ടടുത്ത നിമിഷം, റോബോട്ട് തൻ്റെ ഒരു കാൽ മുന്നോട്ട് വെച്ച് അയാളെ തൊഴിക്കാൻ ശ്രമിക്കുന്ന തരത്തിൽ പ്രതികരിക്കുകയായിരുന്നു. റോബോട്ടിന്റെ ഈ അപ്രതീക്ഷിത നീക്കം കണ്ടുനിന്നവരെയെല്ലാം ഒരുപോലെ അത്ഭുതപ്പെടുത്തി.
ടർമിനേറ്റർ സിനിമകളിലെ യന്ത്രങ്ങൾ മനുഷ്യർക്കെതിരെ തിരിയുന്ന രംഗങ്ങളോട് ഉപമിച്ചുകൊണ്ട് നിരവധി തമാശ രൂപത്തിലുള്ള കമന്റുകളാണ് വീഡിയോയ്ക്ക് താഴെ വരുന്നത്. ഏറ്റുമുട്ടലിന് ശേഷവും റോബോട്ട് ചലനം തുടർന്നുവെന്നും, പിന്നീട് നിയന്ത്രിക്കാൻ ബുദ്ധിമുട്ടായതിനെ തുടർന്ന് ഇതിന്റെ പ്രവർത്തനം പൂർണ്ണമായും നിർത്തിവെക്കേണ്ടി വന്നുവെന്നും വീഡിയോയുടെ വിവരണത്തിൽ പറയുന്നു. എന്നാൽ ഈ റോബോട്ട് സ്വന്തം ബുദ്ധിയിൽ പ്രവർത്തിച്ചതാണോ അതോ ആരെങ്കിലും റിമോട്ട് ഉപയോഗിച്ച് നിയന്ത്രിച്ചതാണോ എന്ന കാര്യത്തിൽ ഇപ്പോഴും സംശയങ്ങൾ നിലനിൽക്കുന്നുണ്ട്.
“മനുഷ്യന്റെ അഹങ്കാരം റോബോട്ടുകളെപ്പോലും ഭ്രാന്ത് പിടിപ്പിച്ചു” എന്നാണ് ഒരു സോഷ്യൽ മീഡിയ ഉപയോക്താവ് തമാശയായി കുറിച്ചത്. റോബോട്ടിന് തങ്ങളുടേതായ അഭിമാനമുണ്ടെന്നും, അതിനെ വല്ലാതെ ഉപദ്രവിച്ചാൽ ഇങ്ങനെ സംഭവിക്കുമെന്നും പറഞ്ഞ് റോബോട്ടിനെ പിന്തുണച്ചും ചിലർ രംഗത്തെത്തി. ശാന്തനായിരിക്കാൻ ശ്രമിച്ചെങ്കിലും പിന്നീട് ദേഷ്യം അടക്കാനാവാതെ പ്രതികരിച്ചതുപോലെയാണ് റോബോട്ടിന്റെ പെരുമാറ്റമെന്ന് മറ്റൊരു വ്യക്തി അഭിപ്രായപ്പെട്ടു.
തമാശകൾ ഒരുവശത്ത് നടക്കുന്നുണ്ടെങ്കിലും, റോബോട്ട് സ്വന്തം തീരുമാനപ്രകാരമാണ് പ്രതികരിച്ചതെന്ന് ഉറപ്പിച്ചു പറയാൻ കഴിയില്ല. ഈ റോബോട്ടുകൾ റിമോട്ട് കൺട്രോൾ വഴി നിയന്ത്രിക്കാൻ കഴിയുന്നവയാണെന്ന് ചൂണ്ടിക്കാട്ടി ചിലർ ഇതിന്റെ വിശ്വസനീയതയെ ചോദ്യം ചെയ്യുന്നുമുണ്ട്. മനുഷ്യന്റെ നേരിട്ടുള്ള നിയന്ത്രണം, മുൻകൂട്ടി പ്രോഗ്രാം ചെയ്ത ചലനങ്ങൾ, അല്ലെങ്കിൽ കൃത്രിമബുദ്ധി എന്നിവ ഉപയോഗിച്ചാണ് ഇത്തരം റോബോട്ടുകൾ പ്രവർത്തിക്കുന്നത്.
