തന്റെ വിവാഹച്ചടങ്ങുകൾക്കിടെ അസുഖബാധിതരായ കാറ്ററിംഗ് ജീവനക്കാരെ പരിചരിക്കാൻ കല്യാണാഘോഷങ്ങൾ മാറ്റിവെച്ച കേരളത്തിലെ ഡോക്ടർ സോഷ്യൽ മീഡിയയിൽ കയ്യടി നേടുന്നു. ജീവിതത്തിലെ ഏറ്റവും പ്രധാനപ്പെട്ട ദിവസത്തിലും വൈദ്യസേവനത്തിന് മുൻഗണന നൽകിയ വധുവിന്റെ അപൂർവ്വ നിമിഷങ്ങൾ അടങ്ങിയ വീഡിയോ ഇതിനോടകം വൈറലായിക്കഴിഞ്ഞു.
കണ്ണൂരിൽ നടന്ന വിവാഹച്ചടങ്ങിനിടെയാണ് ഡോക്ടറായ വധു, അസുഖം ബാധിച്ച രണ്ട് കാറ്ററിംഗ് ജീവനക്കാരെ സഹായിക്കാനായി വിവാഹച്ചടങ്ങുകൾ നിർത്തിവെച്ചത്. ഡോ. ഷിറിൻ സുബൈറും ഡോ. റിസാസും തമ്മിലുള്ള വിവാഹത്തിനിടെ, കാറ്ററിംഗ് സംഘത്തിലുണ്ടായിരുന്ന രണ്ട് സ്ത്രീകൾക്ക് പെട്ടെന്ന് ശാരീരിക അസ്വസ്ഥത അനുഭവപ്പെടുകയായിരുന്നു. ഇതിലൊരാളുടെ മൂക്കിൽ നിന്ന് രക്തസ്രാവമുണ്ടാവുകയും മറ്റൊരാൾക്ക് തലകറക്കം അനുഭവപ്പെടുകയുമുണ്ടായി. ഷിറിൻ ഒരു ഡോക്ടറാണെന്ന് അവിടെയുണ്ടായിരുന്നവർ തിരിച്ചറിഞ്ഞതോടെ സഹായത്തിനായി അവരെ വിളിക്കുകയായിരുന്നു. വധുവിന്റെ വേഷത്തിലായിരുന്ന ഷിറിൻ ഉടൻ തന്നെ രണ്ടുപേരെയും പരിശോധിച്ച് പ്രഥമശുശ്രൂഷ നൽകി. ഈ മുഴുവൻ സംഭവങ്ങളുടെയും വീഡിയോയാണ് ഇപ്പോൾ സോഷ്യൽ മീഡിയയിൽ തരംഗമാകുന്നത്.
വിവാഹാഘോഷങ്ങളിൽ മുഴുകുന്നതിന് പകരം അസുഖബാധിതരായ ജീവനക്കാരെ പരിചരിക്കാൻ കാണിച്ച മനസ്സ് വലിയ രീതിയിലാണ് ശ്രദ്ധിക്കപ്പെട്ടത്. കരുണയുടെയും തൊഴിലിനോടുള്ള പ്രതിബദ്ധതയുടെയും മികച്ച ഉദാഹരണമായി സോഷ്യൽ മീഡിയ ഇതിനെ വിശേഷിപ്പിച്ചു. “ആദ്യം ഡോക്ടർ, പിന്നെ മാത്രം വധു” എന്ന വാക്കുകളോടെയാണ് പലരും ഈ തീരുമാനത്തെ പ്രശംസിച്ചത്. ഏത് സാഹചര്യത്തിലും അടിയന്തിര ഘട്ടങ്ങളിൽ ഇടപെടാനുള്ള ഡോക്ടർമാരുടെ സമർപ്പണബോധത്തെക്കുറിച്ച് ഈ സംഭവം വലിയ ചർച്ചകൾക്ക് വഴിവെച്ചു.
വീഡിയോ പുറത്തുവന്ന ഉടൻ തന്നെ സോഷ്യൽ മീഡിയ ഉപയോക്താക്കൾ പ്രശംസകളുമായി രംഗത്തെത്തി. പ്രൊഫഷണൽ ഉത്തരവാദിത്തത്തോടൊപ്പം സഹജീവി സ്നേഹം കാണിച്ച വധുവിനെ പലരും അഭിനന്ദിച്ചു. വധൂവരന്മാരുടെ വേഷത്തിൽ തന്നെ ഇത് ചെയ്തത് ദൃശ്യങ്ങളെ കൂടുതൽ ഹൃദ്യമാക്കിയെന്ന് ആളുകൾ അഭിപ്രായപ്പെട്ടു.
വീഡിയോയ്ക്ക് താഴെ “വളരെ നന്ദി സഹോദരീ, ഞങ്ങൾക്കെല്ലാം നിങ്ങളെ ഓർത്ത് അഭിമാനം തോന്നുന്നു,” എന്ന് ഒരു ഉപയോക്താവ് കുറിച്ചപ്പോൾ, “വളരെ നല്ലൊരു മനുഷ്യസ്നേഹി” എന്നായിരുന്നു മറ്റൊരു കമന്റ്. എന്നാൽ ഈ സമയത്ത് വീഡിയോ പകർത്തിയതിനെ ചോദ്യം ചെയ്തുകൊണ്ട് “എന്തിനാണ് ആളുകൾ അതേസമയത്ത് വീഡിയോ എടുക്കുന്നത്? ഇതൊരു സാധാരണ കാര്യമല്ലേ, അവരുടെ കടമയല്ലേ ഇത് ചെയ്തത്” എന്നും ചിലർ ചോദിച്ചു. കേരളത്തിലെ 100% സാക്ഷരതയെ പരിഹസിക്കുന്നവർക്കുള്ള മറുപടിയാണിതെന്ന് ചൂണ്ടിക്കാട്ടി “സാക്ഷരത എന്നാൽ ഇതാണ് – വിദ്യാഭ്യാസം, ബോധവൽക്കരണം, സഹാനുഭൂതി, മനുഷ്യത്വം” എന്ന് മറ്റൊരു വ്യക്തിയും കുറിച്ചു.
