ഒരു സാധാരണ ട്രെയിൻ യാത്രയ്ക്കിടെ, പതിനെട്ടോളം ഭാഷകൾ സംസാരിക്കുന്ന ഒരു കച്ചവടക്കാരനെ കണ്ടുമുട്ടിയ യാത്രക്കാർക്ക് അതൊരു അപ്രതീക്ഷിത അനുഭവമായി മാറി. ടൂത്ത് ബ്രഷ്, പേസ്റ്റ്, സോപ്പുകൾ എന്നിവയുമായി ട്രെയിൻ കമ്പാർട്ട്മെന്റിലൂടെ നടന്നുപോകുന്ന കച്ചവടക്കാരന്റെ വീഡിയോ ലക്ഷയ് മേത്ത എന്ന വ്യക്തിയാണ് എക്സിൽ പങ്കുവെച്ചത്. ഒരു സാധാരണ കച്ചവടമെന്ന് തോന്നിച്ച ഈ സംഭവം, അദ്ദേഹത്തിന്റെ അപാരമായ ഭാഷാജ്ഞാനത്തെക്കുറിച്ചുള്ള കൗതുകകരമായ സംഭാഷണമായി പെട്ടെന്ന് മാറി.
വില്പനക്കാരൻ കൈവശമുണ്ടായിരുന്ന ടൂത്ത് പേസ്റ്റിൽ താല്പര്യം കാണിച്ച ഒരു യാത്രക്കാരൻ അദ്ദേഹത്തിന്റെ പശ്ചാത്തലത്തെക്കുറിച്ച് ചോദിച്ചതോടെയാണ് കാര്യങ്ങൾ തുടങ്ങിയത്. താൻ രാജസ്ഥാൻ സ്വദേശിയാണെന്നും 18 മുതൽ 19 വരെ ഭാഷകളിൽ സംസാരിക്കാൻ അറിയാമെന്നും അദ്ദേഹം വെളിപ്പെടുത്തി. തുടർന്ന് ഇംഗ്ലീഷിൽ സംസാരിച്ച് തനിക്കുള്ള കഴിവ് തെളിയിച്ച അദ്ദേഹം യാത്രക്കാരുടെ ശ്രദ്ധ മുഴുവൻ പിടിച്ചെടുത്തു. അതോടെ ഉൽപ്പന്നങ്ങൾ വാങ്ങുന്നതിനേക്കാൾ, ഇത്രയധികം ഭാഷകൾ അദ്ദേഹം എങ്ങനെ പഠിച്ചെടുത്തു എന്ന് അറിയാനായി യാത്രക്കാരുടെ കൗതുകം.
തനിക്ക് അറിയാവുന്ന വിവിധ പ്രാദേശിക ഭാഷകളെക്കുറിച്ചും അവ തമ്മിലുള്ള സാമ്യങ്ങളെക്കുറിച്ചും അദ്ദേഹം യാത്രക്കാരോട് സംസാരിച്ചു. ഭാരതീയ ഭാഷകൾ തമ്മിലുള്ള ബന്ധം തിരിച്ചറിയാനുള്ള അദ്ദേഹത്തിന്റെ കഴിവ് എല്ലാവരെയും അത്ഭുതപ്പെടുത്തി. നിരന്തരമായ പരിശ്രമത്തിലൂടെയും ആളുകളുമായുള്ള സമ്പർക്കത്തിലൂടെയുമാണ് താൻ ഈ ഭാഷകളെല്ലാം സ്വയം പഠിച്ചതെന്ന് അദ്ദേഹം വ്യക്തമാക്കി. കേവലം ഉപജീവനത്തിനപ്പുറം പുതിയ ഭാഷകൾ കണ്ടെത്താനുള്ള അദ്ദേഹത്തിന്റെ യഥാർത്ഥ താല്പര്യമാണ് ഈ കഴിവിന് പിന്നിലെന്ന് വ്യക്തമായിരുന്നു.
വൈകാതെ തന്നെ ഈ സംഭാഷണം അദ്ദേഹം വിറ്റിരുന്ന സാധനങ്ങളെക്കുറിച്ചുള്ളതിൽ നിന്ന് മാറി അദ്ദേഹത്തിന്റെ ഭാഷാജ്ഞാനത്തെക്കുറിച്ചുള്ള ചർച്ചയായി മാറുകയാണുണ്ടായത്. ഉപജീവനമാർഗ്ഗം കണ്ടെത്തുന്നതിനൊപ്പം പുതിയ കാര്യങ്ങൾ പഠിക്കാനുള്ള അദ്ദേഹത്തിന്റെ നിശ്ചയദാർഢ്യത്തെ സോഷ്യൽ മീഡിയ ഉപയോക്താക്കൾ പ്രശംസിച്ചു. കൗതുകത്തിന്റെയും കഠിനാധ്വാനത്തിന്റെയും മികച്ച ഉദാഹരണമായി പലരും ഈ സംഭവത്തെ വിശേഷിപ്പിച്ചു. ദൈനംദിന ജീവിതത്തിൽ നാം കണ്ടുമുട്ടുന്ന സാധാരണക്കാരുടെ ഇത്തരം പ്രതിഭകൾ പലപ്പോഴും ശ്രദ്ധിക്കപ്പെടാതെ പോവുകയാണ് പതിവെന്ന് മറ്റ് ചിലർ അഭിപ്രായപ്പെട്ടു. തുടർച്ചയായ പഠനത്തിന്റെയും കഠിനാധ്വാനത്തിന്റെയും പ്രതീകമാണ് അദ്ദേഹമെന്ന് ഒരു പ്രേക്ഷകൻ കുറിച്ചപ്പോൾ, കഴിവ്, ജിജ്ഞാസ, വിനയം, സ്ഥിരോത്സാഹം എന്നിവ സമന്വയിക്കുന്ന, തങ്ങൾ കാണാൻ ആഗ്രഹിക്കുന്ന ഇന്ത്യയുടെ മുഖമാണിതെന്ന് മറ്റൊരു വ്യക്തി അഭിപ്രായപ്പെട്ടു.
