ന്യൂഡൽഹി: ഡൽഹിയിലെ നിഹാൽ വിഹാറിൽ ഭാര്യയുമായുണ്ടായ തർക്കത്തെ തുടർന്ന് സോഫ്റ്റ്‌വെയർ എൻജിനീയറായ ഭർത്താവിനെ ഭാര്യവീട്ടുകാർ തല്ലിക്കൊന്നു. ലക്ഷ്മി പാർക്ക് സ്വദേശിയായ 31-കാരൻ വിനയ് ഗുപ്തയാണ് കൊല്ലപ്പെട്ടത്. വെള്ളിയാഴ്ച രാവിലെയോടെയാണ് കേസിനാസ്പദമായ ക്രൂരമായ സംഭവം നടന്നതെന്ന് പൊലീസ് വ്യക്തമാക്കുന്നു.
ബുധ് വിഹാർ സ്വദേശിയായ യുവതിയുമായി മൂന്നര വർഷം മുമ്പാണ് വിനയ് ഗുപ്തയുടെ വിവാഹം കഴിഞ്ഞത്. ഇവർക്ക് നാല് മാസം പ്രായമുള്ള ഇരട്ടക്കുട്ടികളുമുണ്ട്. സംഭവദിവസം രാവിലെ ദമ്പതികൾ തമ്മിൽ കടുത്ത തർക്കമുണ്ടാവുകയും, തുടർന്ന് യുവതി സ്വന്തം വീട്ടുകാരെ വിളിച്ചുവരുത്തുകയുമായിരുന്നു. നിഹാൽ വിഹാറിലെ വീട്ടിലെത്തിയ ഭാര്യവീട്ടുകാർ വിനയിനെ ക്രൂരമായി മർദ്ദിക്കുകയായിരുന്നു. ഗുരുതരമായി പരിക്കേറ്റ ഇയാൾ പിന്നീട് മരണത്തിന് കീഴടങ്ങി.
ആക്രമണത്തിൽ നേരിട്ട് പങ്കുണ്ടെന്ന് സംശയിക്കുന്ന നാല് പേരെ പൊലീസ് തിരിച്ചറിയുകയും നിലവിൽ കസ്റ്റഡിയിലെടുക്കുകയും ചെയ്തിട്ടുണ്ട്. സംഭവത്തിൽ ഭാരതീയ ന്യായ സംഹിതയിലെ (ബിഎൻഎസ്) 103(1), 3(5) എന്നീ വകുപ്പുകൾ ചുമത്തിയാണ് കേസ് രജിസ്റ്റർ ചെയ്തിരിക്കുന്നത്. നോയിഡ ആസ്ഥാനമായുള്ള പ്രമുഖ സോഫ്റ്റ്‌വെയർ കമ്പനിയായ അഡോബിയിലെ എൻജിനീയറായിരുന്നു കൊല്ലപ്പെട്ട വിനയ് ഗുപ്ത. ഭാര്യ ഗൃഹനാഥയാണ്.
തർക്കത്തിലേക്കും അതിക്രമത്തിലേക്കും നയിച്ച യഥാർത്ഥ കാരണങ്ങളെക്കുറിച്ച് പൊലീസ് ഊർജ്ജിതമായ അന്വേഷണം നടത്തിവരികയാണ്. കസ്റ്റഡിയിലുള്ളവരെ തുടർച്ചയായി ചോദ്യം ചെയ്തുവരികയാണെന്നും ആക്രമണത്തിൽ ഓരോ പ്രതിയുടെയും പങ്ക് വ്യക്തമായി കണ്ടെത്തി വരികയാണെന്നും അന്വേഷണ ഉദ്യോഗസ്ഥർ കൂട്ടിച്ചേർത്തു.
