മുംബൈ: ടെസ്റ്റ് ക്രിക്കറ്റിൽ ഇന്ത്യൻ ക്രിക്കറ്റ് ടീം വലിയ സമ്മർദത്തിലാണെന്ന ആരോപണങ്ങൾ പരിശീലകൻ ഗൗതം ഗംഭീർ നിഷേധിച്ചു. ടീം ഇപ്പോൾ ഒരു മാറ്റത്തിന്റെ ഘട്ടത്തിലൂടെയാണ് കടന്നുപോകുന്നതെന്ന് വ്യക്തമാക്കിയ അദ്ദേഹം, തനിക്കെതിരെ ഉയർന്ന വിമർശനങ്ങളെയും പൂർണ്ണമായി തള്ളിക്കളഞ്ഞു. ശുഭ്മൻ ഗില്ലിന്റെ നേതൃത്വത്തിൽ പുതിയൊരു നിര ടീമിൽ ഉയർന്നുവരുന്നുണ്ടെന്നാണ് ഗംഭീറിന്റെ പക്ഷം. ടീം റാങ്കിങ്ങിനെക്കുറിച്ച് ആശങ്കപ്പെടേണ്ടതില്ലെന്നും, തന്റെ പ്രധാന ലക്ഷ്യം ട്രോഫികൾ നേടുക മാത്രമാണെന്നും ശ്രീലങ്കയ്ക്കെതിരായ രണ്ടാം ടെസ്റ്റിന് മുന്നോടിയായി അദ്ദേഹം പറഞ്ഞു.
തന്റെ ജോലി ട്രോഫികൾ വിജയിക്കലാണെന്നും വ്യൂസിനും ലൈക്കുകൾക്കും പിന്നാലെ പോകാൻ തനിക്ക് താല്പര്യമില്ലെന്നും ഗംഭീർ വ്യക്തമാക്കി. റാങ്കിങ്ങിന് വലിയ പ്രാധാന്യമില്ലെന്നും, ഇംഗ്ലണ്ട് പരമ്പര മുതൽ ഇന്ത്യ മികച്ച ക്രിക്കറ്റാണ് കളിക്കുന്നതെന്നും അദ്ദേഹം കൂട്ടിച്ചേർത്തു. തിരിച്ചടികളും നേട്ടങ്ങളും ക്രിക്കറ്റിൽ സാധാരണയാണെന്നും, അതിനാൽ ഒന്നോ രണ്ടോ മത്സരങ്ങളിലെ പ്രകടനം കണ്ട് കളിക്കാരെ പുറത്താക്കാതെ അവർക്ക് കൂടുതൽ അവസരങ്ങൾ നൽകുകയാണ് വേണ്ടതെന്നും ഗംഭീർ അഭിപ്രായപ്പെട്ടു.
എതിരാളികളുടെ 20 വിക്കറ്റും വീഴ്ത്താൻ ശേഷിയുള്ള മികച്ച ബോളിങ് നിരയാണ് നിലവിൽ ഇന്ത്യയ്ക്കുള്ളതെന്ന് ഗംഭീർ ചൂണ്ടിക്കാട്ടി. കുൽദീപ് യാദവ് മികച്ച ബോളറാണെങ്കിലും അന്തിമ തീരുമാനങ്ങൾ ക്യാപ്റ്റന്റേതാണെന്നും അദ്ദേഹം പറഞ്ഞു. ആദ്യ ടെസ്റ്റിലെ മോശം പ്രകടനത്തെത്തുടർന്ന് കുൽദീപിന് പകരം ഓൾറൗണ്ടർ സരാൻഷ് ജെയിനെ രണ്ടാം ടെസ്റ്റിൽ ടീമിൽ ഉൾപ്പെടുത്തിയേക്കുമെന്നാണ് സൂചനകൾ.
രണ്ട് മത്സരങ്ങളുള്ള പരമ്പരകളേക്കാൾ മൂന്ന് മത്സരങ്ങളുള്ള ടെസ്റ്റ് പരമ്പരകളാണ് താൻ ആഗ്രഹിക്കുന്നതെന്ന് ഗംഭീർ വെളിപ്പെടുത്തി. ആദ്യ മത്സരം തോറ്റാൽ രണ്ടാം മത്സരത്തിൽ സമനിലയ്ക്ക് മാത്രമേ ശ്രമിക്കാൻ സാധിക്കൂ എന്നതിനാലാണിത്. വിരാട് കോലി, ആർ. അശ്വിൻ, രോഹിത് ശർമ എന്നിവരുടെ വിരമിക്കലിനുശേഷം ന്യൂസീലൻഡ്, ദക്ഷിണാഫ്രിക്ക, ഓസ്ട്രേലിയ എന്നിവർക്കെതിരായ പരമ്പര തോൽവികൾ ഗംഭീറിന്റെ പരിശീലകസ്ഥാനത്തിന്മേൽ കടുത്ത വിമർശനങ്ങൾ ഉയർത്തിയിരുന്നു.
