യു.പി ടി20 ലീഗ് 2026-ലെ എട്ടാം മത്സരത്തിൽ ലഖ്‌നൗ ഫാൽക്കൺസിനെതിരെ മീററ്റ് മാവറിക്സിനായി വെടിക്കെട്ട് അർദ്ധസെഞ്ചുറിയുമായി ഇന്ത്യൻ താരവും കൊൽക്കത്ത നൈറ്റ് റൈഡേഴ്‌സ് ബാറ്ററുമായ റിങ്കു സിംഗ്. അടൽ ബിഹാരി വാജ്‌പേയി ഏക്കാന ക്രിക്കറ്റ് സ്റ്റേഡിയത്തിൽ നടന്ന മത്സരത്തിലാണ് റിങ്കു ടീമിന് തകർപ്പൻ വിജയം സമ്മാനിച്ചത്. വെറും 5 പന്തുകളിൽ നിന്ന് 26 റൺസ് നേടിയ താരം മത്സരത്തിലാകെ ആറ് സിക്സറുകൾ പറത്തി.
ലഖ്‌നൗ ഉയർത്തിയ 184 റൺസ് വിജയലക്ഷ്യം പിന്തുടർന്ന മീററ്റിന് 17-ാം ഓവറിൽ മഴ വില്ലനായെത്തുമ്പോൾ ഡി.എൽ.എസ് (DLS) നിയമാവലി പ്രകാരം ആവശ്യമായ റൺസിനേക്കാൾ കുറവായിരുന്നു സ്കോർ. എന്നാൽ നവനീത് കുമാർ എറിഞ്ഞ 17-ാം ഓവറിലെ ആദ്യ അഞ്ച് പന്തിൽ നിന്ന് റിങ്കു 26 റൺസ് അടിച്ചുുകൂട്ടി. 24 പന്തിൽ 55 റൺസുമായി റിങ്കു പുറത്താകാതെ നിന്നതോടെ, കനത്ത മഴമൂലം കളി നിർത്തുമ്പോൾ മീററ്റ് 16.5 ഓവറിൽ 154/6 എന്ന നിലയിലെത്തി. ഡി.എൽ.എസ് ലക്ഷ്യത്തേക്കാൾ അഞ്ച് റൺസ് മുന്നിലെത്തിയ മീററ്റ് അത്ഭുതകരമായ വിജയം സ്വന്തമാക്കുകയായിരുന്നു.
തന്റെ ക്യാപ്റ്റന്റെ ഈ മാസ്മരിക പ്രകടനത്തെക്കുറിച്ചും കളി ശൈലിയെക്കുറിച്ചും കൊൽക്കത്ത നൈറ്റ് റൈഡേഴ്‌സിലും മീററ്റിലും റിങ്കുവിന്റെ സഹതാരമായ പേസർ കാർത്തിക് ത്യാഗി സംസാരിച്ചു. ബാറ്റിംഗ് ഓർഡറിൽ ഈ സ്ഥാനത്ത് ഇറങ്ങി ലോകത്ത് തന്നെ കളി ജയിപ്പിക്കുന്ന ആദ്യ 5 ബാറ്റർമാരിൽ ഒരാളാണ് റിങ്കുവെന്ന് ത്യാഗി പറഞ്ഞു. റിങ്കു ക്രീസിലുള്ളിടത്തോളം ഏത് ഘട്ടത്തിലും ജയിക്കാമെന്ന ആത്മവിശ്വാസം ടീമിനുണ്ടെന്നും അദ്ദേഹം നടത്തിയ കഠിനാധ്വാനത്തിന്റെ ഫലമാണ് ഈ പ്രകടനങ്ങളെന്നും ത്യാഗി കൂട്ടിച്ചേർത്തു. ഐ.പി.എൽ 2026 ലേലത്തിന് മുന്നോടിയായി 12 കോടി രൂപയ്ക്കാണ് റിങ്കുവിനെ കെ.കെ.ആർ നിലനിർത്തിയത്.
ടി20 ഫോർമാറ്റിലെ ഏറ്റവും മികച്ച ഫിനിഷർമാരിൽ ഒരാളായ റിങ്കു, ഇന്ത്യയ്ക്കായി 48 ടി20 മത്സരങ്ങളിൽ നിന്ന് 37 ശരാശരിയിലും 156 സ്ട്രൈക്ക് റേറ്റിലും 702 റൺസ് നേടിയിട്ടുണ്ട്. കളിക്കളത്തിൽ ജയിക്കുക മാത്രമല്ല, എതിരാളികളെ പൂർണ്ണമായി അടിച്ചമർത്തി കളിക്കുക എന്ന ആക്രമണോത്സുകമായ മനോഭാവമാണ് റിങ്കു ടീമിന് നൽകുന്നതെന്നും ത്യാഗി വ്യക്തമാക്കി.
ലഖ്‌നൗവിനെതിരെയുള്ള ഈ തൃശൂർപ്പൂരം ജയത്തോടെ സീസണിലെ ആദ്യ മൂന്ന് മത്സരങ്ങളും മീററ്റ് മാവറിക്സ് വിജയിച്ചു. യു.പി ടി20 സീസൺ 4-ൽ തോൽവി അറിയാത്ത ഒരേയൊരു ടീമായി പോയിന്റ് പട്ടികയിൽ ഒന്നാമതാണ് നിലവിൽ മീററ്റ്.
