ന്യൂഡൽഹി∙ സ്വാതന്ത്ര്യദിനത്തിൽ എഐസിസി ആസ്ഥാനത്ത് നാടകീയമായ സംഭവങ്ങൾ അരങ്ങേറി. കോൺഗ്രസിന്റെ ഔദ്യോഗിക നിലപാടിന് വിരുദ്ധമായി സ്വാതന്ത്ര്യദിനാഘോഷ വേളയിൽ വന്ദേമാതരം പൂർണമായി ആലപിച്ചതാണ് പുതിയ വിവാദത്തിന് വഴിവെച്ചത്.
മല്ലികാർജുൻ ഖർഗെയും സോണിയ ഗാന്ധിയും ഉൾപ്പെടെയുള്ള മുതിർന്ന നേതാക്കൾ തടയാൻ ശ്രമിച്ചിട്ടും വന്ദേമാതര ആലാപനം തുടരുകയായിരുന്നു. സോണിയയും ഖർഗെയും തങ്ങളുടെ അനിഷ്ടം പ്രകടിപ്പിക്കുന്നതും ആലാപനം വിലക്കാൻ ശ്രമിക്കുന്നതും പുറത്തുവന്ന ദൃശ്യങ്ങളിൽ വ്യക്തമാണ്. തുടർന്ന് വന്ദേമാതരം ആലാപനം പൂർത്തിയായ ശേഷമാണ് ഖർഗെ ദേശീയ പതാക ഉയർത്തിയത്.
എന്നാൽ ഈ അവകാശവാദം തെറ്റിദ്ധരിപ്പിക്കുന്നതാണെന്ന് കോൺഗ്രസ് പിന്നീട് വ്യക്തത വരുത്തി. പതാക ഉയർത്തൽ ചടങ്ങിനിടെ നില്ക്കുകയായിരുന്ന ഖർഗെയ്ക്ക് ഇരിക്കാൻ കസേര ആവശ്യപ്പെടുകയാണ് സോണിയ ഗാന്ധി ചെയ്തതെന്നാണ് പാർട്ടി വിശദീകരിച്ചത്.
നേരത്തെ വന്ദേമാതരം ബിൽ പാർലമെന്റിൽ അവതരിപ്പിച്ചപ്പോൾ കോൺഗ്രസ് ഇതിനെ ശക്തമായി എതിർത്തിരുന്നു. ഈ ബിൽ രാജ്യത്ത് കൂടുതൽ വർഗീയ വിഭജനത്തിന് കാരണമാകുമെന്നായിരുന്നു കോൺഗ്രസിന്റെ അന്നത്തെ നിലപാട്. കോൺഗ്രസ് ഭരണത്തിലുള്ള കേരളം ഉൾപ്പെടെയുള്ള സംസ്ഥാനങ്ങളിൽ വന്ദേമാതരം ആലപിക്കുന്നതുമായി ബന്ധപ്പെട്ട് കടുത്ത നിലപാട് തുടരുന്നതിനിടെയാണ് എഐസിസി ആസ്ഥാനത്ത് വന്ദേമാതരം പൂർണമായി ആലപിക്കുന്ന സാഹചര്യം ഉണ്ടായത്.
സ്വാതന്ത്ര്യദിനാഘോഷവേളയിൽ ചെങ്കോട്ടയിലും വന്ദേമാതരത്തിന്റെ പൂർണ്ണരൂപം ആലപിച്ചിരുന്നു. പ്രധാനമന്ത്രി നരേന്ദ്ര മോദി ദേശീയ പതാക ഉയർത്തുന്നതിന് മുന്നോടിയായി ആർമി ബാൻഡ് ഗാനം അവതരിപ്പിക്കുകയും തുടർന്ന് ദേശീയ ഗാനം ആലപിക്കുകയും ചെയ്തു.
ബങ്കിം ചന്ദ്ര ചാറ്റർജി രചിച്ച ‘വന്ദേമാതരം’ പിന്നീട് അദ്ദേഹത്തിന്റെ ആനന്ദമഠം എന്ന നോവലിൽ ഉൾപ്പെടുത്തുകയായിരുന്നു. 1896-ൽ കൽക്കട്ടയിൽ (ഇപ്പോഴത്തെ കൊൽക്കത്ത) നടന്ന കോൺഗ്രസ് സമ്മേളനത്തിലാണ് രവീന്ദ്രനാഥ ടാഗോർ ഈ ഗാനം ആദ്യമായി ആലപിച്ചത്. ഗാനത്തിന്റെ ചരിത്രത്തെക്കുറിച്ചുള്ള സർക്കാരിന്റെ കുറിപ്പ് അനുസരിച്ച്, ‘വന്ദേമാതരം’ എന്ന മുദ്രാവാക്യം പിന്നീട് ഇന്ത്യയുടെ സ്വാതന്ത്ര്യ പ്രസ്ഥാനവുമായി ബന്ധപ്പെടുകയും 1905 ഓഗസ്റ്റ് 7-ന് ആദ്യമായി ഒരു രാഷ്ട്രീയ മുദ്രാവാക്യമായി ഉപയോഗിക്കുകയും ചെയ്തു.
