പൊതുപരിപാടികളിൽ പങ്കെടുക്കാൻ എത്തുമ്പോൾ ആളുകൾ മാന്യമായ വസ്ത്രധാരണം സൂക്ഷിക്കണമെന്ന് നടി തെസ്നി ഖാൻ. പുതുമുഖ നടി ഐശ്വര്യ ചന്ദ്രൻ മുഖ്യമന്ത്രി വി.ഡി. സതീശനൊപ്പം ചിത്രങ്ങൾ പകർത്തുന്ന വീഡിയോയ്ക്ക് താഴെ കമന്റിലൂടെയായിരുന്നു താരത്തിന്റെ പ്രതികരണം. ഐശ്വര്യയുടെ വസ്ത്രധാരണത്തെ ചൂണ്ടിക്കാണിച്ച തെസ്നി ഖാൻ, മുഖ്യമന്ത്രി പങ്കെടുക്കുന്ന ഉന്നത നിലവാരമുള്ള ഒരു ചടങ്ങിൽ മാന്യമായി വസ്ത്രം ധരിച്ചെത്തുന്നതായിരുന്നു അനുയോജ്യം എന്ന് അഭിപ്രായപ്പെട്ടു.
‘എനിക്ക് പലപ്പോഴും തോന്നാറുള്ള ഒരു കാര്യമാണിത്; ശരിയാണോ തെറ്റാണോ എന്ന് ഉറപ്പില്ല. പുതിയ തലമുറയ്ക്ക് അവർക്കിഷ്ടമുള്ള രീതിയിൽ നടക്കാനുള്ള സ്വാതന്ത്ര്യവും അവകാശവുമുണ്ട്. എങ്കിലും മുഖ്യമന്ത്രി ഉൾപ്പെടെയുള്ളവർ പങ്കെടുക്കുന്ന മാന്യമായ ഒരു സദസ്സിൽ കുറച്ചുകൂടി ഉചിതമായ വസ്ത്രം ധരിച്ചെത്തുന്നത് നല്ലൊരു കാര്യമായിരിക്കും,’ എന്നാണ് തെസ്നി ഖാൻ കുറിച്ചത്. ഈ അഭിപ്രായത്തെ പിന്തുണച്ചുകൊണ്ട് ധാരാളം ആളുകൾ രംഗത്തെത്തുകയും കമന്റിന് വലിയ പിന്തുണ നൽകുകയും ചെയ്തു.
കൊച്ചിയിൽ നടന്നൊരു സ്വർണ്ണക്കടയുടെ ഉദ്ഘാടനച്ചടങ്ങിൽ പങ്കെടുക്കാനാണ് മുഖ്യമന്ത്രി വി.ഡി. സതീശൻ എത്തിയത്. ഈ ചടങ്ങിന്റെ വിവിധ ദൃശ്യങ്ങൾ സോഷ്യൽ മീഡിയയിൽ പ്രചരിക്കുന്നതിനിടെയാണ് നടി ഐശ്വര്യ ചന്ദ്രൻ അദ്ദേഹത്തോടൊപ്പം ഫോട്ടോയെടുക്കുന്ന വീഡിയോയും വൈറലായത്. ഇതിന് താഴെ തെസ്നി ഖാൻ പങ്കുവെച്ച നിരീക്ഷണം നിലവിൽ സമൂഹമാധ്യമങ്ങളിൽ വലിയ രീതിയിൽ ചർച്ച ചെയ്യപ്പെടുന്നുണ്ട്.
ജോജു ജോർജ് സംവിധാനം നിർവ്വഹിക്കുന്ന ‘പരിപാടി’ എന്ന ചിത്രത്തിലൂടെ സിനിമാരംഗത്തേക്ക് അരങ്ങേറുന്ന നായികയാണ് ഐശ്വര്യ ചന്ദ്രൻ. ഫുഡ് വ്ലോഗർ, ഇൻഫ്ലുവൻസർ എന്നീ നിലകളിൽ റീൽസിലൂടെ പ്രശസ്തയായ ഇവർ ഒരു സംരംഭക കൂടിയാണ്. സൂപ്പർഹിറ്റായ ‘പണി’ എന്ന സിനിമയ്ക്ക് ശേഷം ജോജു ജോർജ് ഒരുക്കുന്ന പുതിയ ചിത്രമാണ് ‘പരിപാടി’.
