ചൊവ്വാഴ്ച ഹെഡിങ്ലിയിൽ നടന്ന ‘ദി ഹണ്ട്രഡ്’ ലീഗ് മത്സരത്തിൽ ഇന്ത്യൻ ഓൾറൗണ്ടർ ദീപ്തി ശർമ്മ എടുത്തത് ഈ സീസണിലെ തന്നെ ഏറ്റവും മികച്ച ക്യാച്ചുകളിലൊന്ന്. സൺറൈസേഴ്സ് ലീഡ്സ് വുമണും മാഞ്ചസ്റ്റർ സൂപ്പർ ജയന്റ്സ് വുമണും തമ്മിലുള്ള പോരാട്ടത്തിനിടെയായിരുന്നു ഈ മിന്നൽ പ്രകടനം. ദീപ്തിയുടെ അതിശയകരമായ ക്യാച്ചിന്റെ ദൃശ്യങ്ങൾ സോഷ്യൽ മീഡിയയിൽ തരംഗമാവുകയും ആരാധകരിൽ നിന്ന് വൻ പ്രശംസ പിടിച്ചുപറ്റുകയും ചെയ്യുന്നുണ്ട്.
മാഞ്ചസ്റ്റർ സൂപ്പർ ജയന്റ്സിന്റെ ബാറ്റർ പേജ് സ്കോൾഫീൽഡ് ഒരു അറ്റാക്കിംഗ് ഷോട്ടിന് ശ്രമിച്ചപ്പോഴായിരുന്നു ആ അവിസ്മരണീയ നിമിഷം പിറന്നത്. ഇടതുവശത്തേക്ക് അതിവേഗം ഓടിയെത്തിയ ദീപ്തി, വായുവിൽ ഡൈവ് ചെയ്ത് ഒറ്റക്കൈയിലാണ് ആ പന്ത് പിടിയിലൊതുക്കിയത്. 5 പന്തിൽ 5 റൺസെടുത്ത് നിൽക്കവെയാണ് സ്കോൾഫീൽഡ് പുറത്തായത്.
ദീപ്തിയുടെ ഈ മികച്ച പ്രകടനം ബൗളർ ഹന്ന ബേക്കർക്ക് നിർണ്ണായകമായ ഒരു വിക്കറ്റ് സമ്മാനിച്ചു. കളിയിലെ കമന്റേറ്റർമാരും സ്റ്റേഡിയത്തിലെ കാണികളും ഒരുപോലെ അത്ഭുതത്തോടെയാണ് ഈ ക്യാച്ചിനെ നോക്കിക്കണ്ടത്.
എന്നാൽ മത്സരത്തിൽ വിജയശ്രീലാളിതരായത് മാഞ്ചസ്റ്റർ സൂപ്പർ ജയന്റ്സ് വുമണായിരുന്നു. വിജയലക്ഷ്യം പിന്തുടർന്ന അവർ നാല് വിക്കറ്റിന്റെ ജയം സ്വന്തമാക്കി. 50 പന്തിൽ പുറത്താകാതെ 88 റൺസ് അടിച്ചുകൂട്ടിയ സ്മൃതി മന്ദാനയുടെ മിന്നും പ്രകടനമാണ് 96 പന്തിൽ 147/6 എന്ന സ്കോറിലേക്ക് അവരുടെ ടീമിനെ നയിച്ചത്. ദീപ്തി ബോളിംഗിലും തിളങ്ങി; 20 പന്തിൽ 30 റൺസ് മാത്രം വഴങ്ങി മികച്ച സ്പെൽ കാഴ്ചവെച്ചെങ്കിലും, അവരുടെ ആ അവിശ്വസനീയ ക്യാച്ച് തന്നെയാണ് മത്സരത്തിലെ പ്രധാന ആകർഷണമായി മാറിയത്.
