മിക്ക ആളുകൾക്കും വേനൽച്ചൂടിൽ നിന്നുള്ള ആശ്വാസമാണ് മഴക്കാലമെങ്കിൽ, ഡോക്ടർമാർക്ക് ഇത് ജീവിതശൈലി രോഗങ്ങൾ നിയന്ത്രിക്കുന്നത് ഏറെ വെല്ലുവിളിയാകുന്ന സമയമാണ്. അന്തരീക്ഷത്തിലെ ഉയർന്ന ഈർപ്പവും മാറിക്കൊണ്ടിരിക്കുന്ന താപനിലയും മഴക്കാല രോഗങ്ങളുടെ വർദ്ധനവും പ്രമേഹം, രക്തസമ്മർദ്ദം, ഹൃദ്രോഗം എന്നിവയുള്ളവരുടെ ആരോഗ്യസ്ഥിതിയെ പെട്ടെന്ന് വഷളാക്കിയേക്കാം.
ജീവിതശൈലി രോഗങ്ങൾ പതുക്കെ മാത്രം വർദ്ധിക്കുന്ന ഒന്നായാണ് കാണാറുള്ളതെങ്കിലും, അവ അന്തരീക്ഷത്തിലുണ്ടാകുന്ന മാറ്റങ്ങളോട് വളരെ പെട്ടെന്ന് പ്രതികരിക്കാറുണ്ട്. മഴക്കാലത്ത് ശരീര താപനിലയും രക്തചംക്രമണവും സാധാരണ നിലയിലാക്കാൻ ശരീരം കൂടുതൽ അധ്വാനിക്കേണ്ടി വരുന്നു. അന്തരീക്ഷത്തിലെ ഈർപ്പം കാരണം ശരീരത്തിന് സ്വയം തണുക്കാൻ സാധിക്കാതെ വരുന്നത് ഹൃദയത്തിന്റെ പ്രവർത്തനഭാരം കൂട്ടുന്നു. കൂടാതെ, പുറത്തെ ചൂടിൽ നിന്ന് പെട്ടെന്ന് തണുപ്പുള്ള മുറികളിലേക്ക് മാറുമ്പോൾ രക്തക്കുഴലുകളുടെ പ്രവർത്തനത്തെ അത് ബാധിക്കുകയും രക്തസമ്മർദ്ദത്തിൽ വ്യതിയാനങ്ങൾ ഉണ്ടാക്കുകയും ചെയ്യുന്നു.
ഇതിനുപുറമെ വൈറൽ, ബാക്ടീരിയൽ, കൊതുക് ജന്യ രോഗങ്ങളും മഴക്കാലത്ത് പടർന്നുപിടിക്കാറുണ്ട്. ഇൻഫ്ലുവൻസ, വയറിളക്ക രോഗങ്ങൾ, ഡെങ്കിപ്പനി, ഫംഗസ് അണുബാധകൾ എന്നിവ ശരീരത്തിന് കൂടുതൽ സമ്മർദ്ദമുണ്ടാക്കുന്നു. പ്രമേഹരോഗികളിൽ ചെറിയൊരു അണുബാധ ഉണ്ടായാൽ പോലും അത് രക്തത്തിലെ പഞ്ചസാരയുടെ അളവ് തകരാറിലാക്കാം. അസുഖം വരുമ്പോൾ ഉണ്ടാകുന്ന ഹോർമോൺ വ്യതിയാനങ്ങൾ രക്തത്തിലെ ഗ്ലൂക്കോസ് കൂട്ടാൻ കാരണമാകുന്നു. അതേസമയം, അസുഖസമയത്ത് ഭക്ഷണം ശരിയായി കഴിക്കാൻ കഴിയാതെ വരുന്നത് രക്തത്തിലെ പഞ്ചസാരയുടെ അളവ് ക്രമാതീതമായി കൂടാനോ കുറയാനോ ഇടയാക്കും.
പ്രമേഹനിയന്ത്രണത്തിന് അത്യാവശ്യമായ ദൈനംദിന ശീലങ്ങളെയും മഴക്കാലം തടസ്സപ്പെടുത്തുന്നു. കനത്ത മഴ കാരണം വ്യായാമവും നടത്തവും മുടങ്ങുന്നതും, എണ്ണയിൽ വറുത്തതും കലോറി കൂടിയതുമായ ലഘുഭക്ഷണങ്ങൾ കഴിക്കുന്നതും രക്തത്തിലെ പഞ്ചസാരയുടെ അളവ് കൂട്ടും. നനഞ്ഞ ഷൂസുകളും ചെരിപ്പുകളും ദീർഘനേരം ധരിക്കുന്നത് ഫംഗസ് അണുബാധയ്ക്കും മുറിവുകൾ ഉണങ്ങാതിരിക്കാനും കാരണമാകുന്നു. പ്രമേഹരോഗികൾ ഇത്തരം കാര്യങ്ങളിൽ പ്രത്യേക ശ്രദ്ധ പുലർത്തേണ്ടതുണ്ട്.
ഉയർന്ന രക്തസമ്മർദ്ദമുള്ളവരെയും മഴക്കാലം ദോഷകരമായി ബാധിക്കാറുണ്ട്. താപനിലയിലും അന്തരീക്ഷ മർദ്ദത്തിലുമുണ്ടാകുന്ന മാറ്റങ്ങൾ രക്തക്കുഴലുകൾ ചുരുങ്ങാനും വികസിക്കാനും ഇടയാക്കുന്നതാണ് ഇതിന് കാരണം. കൂടാതെ, മഴക്കാലത്ത് ഉപ്പ് കൂടിയ പലഹാരങ്ങളും അച്ചാറുകളും സംസ്കരിച്ച ഭക്ഷണങ്ങളും കൂടുതൽ കഴിക്കുന്നത് ശരീരത്തിൽ ഉപ്പിന്റെ അളവ് കൂട്ടുകയും നീര് വരാൻ കാരണമാകുകയും ചെയ്യുന്നു. ലക്ഷണങ്ങൾ പുറത്തുകാണിക്കാത്തതിനാൽ രക്തസമ്മർദ്ദം നിയന്ത്രണവിധേയമാണെന്ന് കരുതി പലരും മരുന്നുകൾ മുടക്കുകയോ പരിശോധനകൾ വൈകിപ്പിക്കുകയോ ചെയ്യാറുണ്ട്. എന്നാൽ നിയന്ത്രണമില്ലാത്ത രക്തസമ്മർദ്ദം സ്ട്രോക്ക് അല്ലെങ്കിൽ ഹൃദയാഘാതം പോലെയുള്ള ഗുരുതരമായ പ്രശ്നങ്ങളിലേക്ക് നയിക്കുമ്പോഴാണ് പലപ്പോഴും ആളുകൾ ഇത് തിരിച്ചറിയുന്നത്.
