പ്രായമാകുന്തോറും നമ്മുടെ ശരീരത്തിന്റെ പോഷകാഹാര ആവശ്യങ്ങളിലും മാറ്റങ്ങൾ വരുന്നു. 50 വയസ്സ് കഴിയുമ്പോൾ ദഹനപ്രക്രിയ പതുക്കെയാകാനും രക്തത്തിലെ പഞ്ചസാരയുടെ അളവ് നിയന്ത്രിക്കാൻ ബുദ്ധിമുട്ടാകാനും ഹൃദയസംബന്ധമായ പ്രശ്നങ്ങൾ ഉണ്ടാകാനുമുള്ള സാധ്യത കൂടുതലാണ്. അതുകൊണ്ടാണ് ദിവസവും ശരിയായ ഭക്ഷണം കഴിക്കേണ്ടത് വളരെ പ്രധാനമായി മാറുന്നത്. ഭക്ഷണരീതിയിൽ വരുത്തുന്ന ചെറിയ മാറ്റങ്ങൾ പോലും ആരോഗ്യത്തെ സംരക്ഷിക്കാനും ദഹനം മെച്ചപ്പെടുത്താനും ശരീരത്തെ കൂടുതൽ സമയം സജീവമായി നിലനിർത്താനും സഹായിക്കും.
പ്രായമാകുന്നതിനെയോ രോഗങ്ങളെയോ പൂർണ്ണമായി തടയാൻ കഴിയുന്ന ഒരു പ്രത്യേക ഭക്ഷണം മാത്രമില്ലെങ്കിലും, സന്തുലിതമായ ഭക്ഷണക്രമത്തോടൊപ്പം ചില പോഷകസമൃദ്ധമായ ആഹാരങ്ങൾ ശീലമാക്കുന്നത് ആരോഗ്യകരമായ വാർദ്ധക്യത്തിന് സഹായിക്കും. പ്രായമായവർക്കും മാതാപിതാക്കൾക്കുമായി പോഷകാഹാര വിദഗ്ദ്ധയായ ദീപ്ശിഖ ജെയിൻ നിർദ്ദേശിക്കുന്ന ചില ഭക്ഷണങ്ങൾ താഴെ പറയുന്നവയാണ്. ഒരു ഇൻസ്റ്റാഗ്രാം വീഡിയോയിലൂടെയാണ് അവർ ഈ ഭക്ഷണങ്ങളെക്കുറിച്ച് വ്യക്തമാക്കുന്നത്.
ആദ്യത്തേത് പച്ച ഏത്തക്കായയാണ്. ഇതില് അടങ്ങിയിരിക്കുന്ന ‘റെസിസ്റ്റന്റ് അന്നജം’ (resistant starch) കുടലിലെ നല്ല ബാക്ടീരിയകളുടെ വളർച്ചയ്ക്ക് സഹായിക്കുന്ന ഒരു തരം നാരുകളാണ്. ഇത് കുടലിന്റെ ആരോഗ്യം മെച്ചപ്പെടുത്താനും ദഹനം സുഗമമാക്കാനും 50 വയസ്സിന് മുകളിലുള്ളവരുടെ ദഹനപ്രക്രിയ ശക്തിപ്പെടുത്താനും സഹായിക്കുമെന്ന് അവർ പറയുന്നു.
രണ്ടാമതായി, 70 ശതമാനമോ അതിൽ കൂടുതലോ കൊക്കോ അടങ്ങിയ രണ്ട് ചെറിയ കഷ്ണം ഡാർക്ക് ചോക്ലേറ്റ് കഴിക്കാൻ അവർ ശുപാർശ ചെയ്യുന്നു. ഡാർക്ക് ചോക്ലേറ്റിൽ ഹൃദയാരോഗ്യത്തിന് സഹായിക്കുന്ന ‘ഫ്ലവനോയിഡുകൾ’ (flavonoids) എന്ന പ്രകൃതിദത്ത ഘടകങ്ങൾ അടങ്ങിയിട്ടുണ്ട്. ഇത് ഹൃദയാരോഗ്യം മെച്ചപ്പെടുത്താനും രക്തസമ്മർദ്ദം നിയന്ത്രിക്കാനും കൊളസ്ട്രോൾ കുറയ്ക്കാനും സഹായിക്കുമെന്ന് ദീപ്ശിഖ വീഡിയോയിൽ വ്യക്തമാക്കുന്നു.
വെറുംവയറ്റിൽ നെയ്യ് കഴിക്കുന്നതാണ് പട്ടികയിലെ മൂന്നാമത്തെ കാര്യം. രാവിലെ വെറുംവയറ്റിൽ ചെറിയ അളവിൽ നെയ്യ് കഴിക്കുന്നത് ഇൻസുലിൻ പ്രതികരണശേഷി മെച്ചപ്പെടുത്താനും അതിലൂടെ രക്തത്തിലെ പഞ്ചസാരയുടെ അളവ് നന്നായി നിയന്ത്രിക്കാനും ശരീരത്തെ സഹായിക്കുമെന്ന് ജെയിൻ പറയുന്നു.
അവസാനമായി, അവർ നിർദ്ദേശിക്കുന്നത് മാതളനാരങ്ങയാണ്. ശരീരത്തിലെ ഓക്സിഡേറ്റീവ് സ്ട്രെസ് തടയാൻ സഹായിക്കുന്ന ആന്റിഓക്സിഡന്റുകളാൽ സമ്പന്നമാണ് മാതളനാരങ്ങ. ഇത് പ്രായമാകുമ്പോൾ ഹൃദയത്തെ സംരക്ഷിക്കാനും ശരീരത്തിന്റെ പൊതുവായ ആരോഗ്യം നിലനിർത്താനും സഹായിക്കും. ഈ ഭക്ഷണങ്ങൾ ദൈനംദിന ജീവിതത്തിന്റെ ഭാഗമാക്കുന്നത് നല്ലതാണെങ്കിലും, സന്തുലിതമായ ആഹാരം, കൃത്യമായ വ്യായാമം, നല്ല ഉറക്കം, കൃത്യമായ ആരോഗ്യപരിശോധനകൾ എന്നിവയ്ക്കൊപ്പം ഇവ ശീലമാക്കുമ്പോഴാണ് ഏറ്റവും മികച്ച ഫലം ലഭിക്കുന്നത്.
