ഐപിഎൽ 2026 അവസാനിച്ചെങ്കിലും, സൺറൈസേഴ്സ് ഹൈദരാബാദ് സഹ-ഉടമ കാവ്യ മാരനുമായി ബന്ധപ്പെട്ട ഒരു വാർത്ത സോഷ്യൽ മീഡിയയിൽ തരംഗമാവുകയാണ്. കാവ്യയും പ്രശസ്ത സംഗീത സംവിധായകൻ അനിരുദ്ധ് രവിചന്ദറും വിവാഹിതരാകാൻ ഒരുങ്ങുന്നതായാണ് പുതിയ റിപ്പോർട്ടുകൾ.
സൺ ടിവി നെറ്റ്വർക്കിന്റെ എക്സിക്യൂട്ടീവ് ഡയറക്ടർ കൂടിയായ കാവ്യ, ഐപിഎൽ മത്സരങ്ങൾക്കിടയിലെ തന്റെ സജീവമായ സാന്നിധ്യത്തിലൂടെയും ടീമിനായുള്ള ആവേശഭരിതമായ പിന്തുണയിലൂടെയും ക്രിക്കറ്റ് ആരാധകർക്കിടയിൽ ഏറെ ശ്രദ്ധേയയാണ്. അനിരുദ്ധ് കാവ്യയുമായുള്ള ബന്ധത്തെക്കുറിച്ച് ഇതുവരെ പരസ്യമായി ഒന്നും പറഞ്ഞിട്ടില്ലെങ്കിലും, അദ്ദേഹത്തിന്റെ കുടുംബാംഗമായ നടൻ വൈ. ജി. മഹേന്ദ്രൻ കെപിടിവിയുമായുള്ള അഭിമുഖത്തിൽ ഈ വിവാഹവാർത്ത ഔദ്യോഗികമായി സ്ഥിരീകരിച്ചു.
അനിരുദ്ധ് വളരെ ശാന്തനായ ഒരു വ്യക്തിയാണെന്നും കേട്ടറിവ് വെച്ച് ഇരുവരും വിവാഹിതരാകാൻ പോവുകയാണെന്നും മഹേന്ദ്രൻ പറഞ്ഞു. കാവ്യ ഒരു സാധാരണ പെൺകുട്ടിയല്ലെന്നും സൺറൈസേഴ്സ് ഹൈദരാബാദ് പോലൊരു വലിയ ടീമിനെ നയിക്കാനുള്ള പ്രാപ്തി അവർക്കുണ്ടെന്നും അദ്ദേഹം കൂട്ടിച്ചേർത്തു. പിതാവിന്റെ ബിസിനസ്സ് ബുദ്ധി കാവ്യയ്ക്ക് ലഭിച്ചിട്ടുണ്ടെന്നും ഇരുവരും മികച്ചൊരു ജോഡിയാണെന്നും ഒന്നിച്ചതിനുശേഷം അവർ സംഗീത ബിസിനസ്സിൽ ശ്രദ്ധ കേന്ദ്രീകരിക്കണമെന്നും മഹേന്ദ്രൻ വ്യക്തമാക്കിയതായി ടൈംസ് ഓഫ് ഇന്ത്യ റിപ്പോർട്ട് ചെയ്തു.
2011-ൽ പുറത്തിറങ്ങിയ “വൈ ദിസ് കൊലവെറി ഡി” എന്ന സൂപ്പർഹിറ്റ് ഗാനത്തിലൂടെയാണ് അനിരുദ്ധ് പ്രശസ്തനാകുന്നത്. അതിനുശേഷം ജയിലർ, ജേഴ്സി, ജവാൻ, ലിയോ തുടങ്ങി നിരവധി ചിത്രങ്ങളിലൂടെ തമിഴ് സിനിമാ ലോകത്തെ മുൻനിര സംഗീത സംവിധായകനായി അദ്ദേഹം മാറി. തമിഴ് സൂപ്പർസ്റ്റാർ രജനികാന്ത് അനിരുദ്ധിന്റെ അമ്മാവനാണ്. കൂടാതെ ഐശ്വര്യ, സൗന്ദര്യ, ഹൃഷികേശ് എന്നിവർ അദ്ദേഹത്തിന്റെ കസിൻസുമാണ്. വലിയൊരു കലാപാരമ്പര്യമുള്ള കുടുംബത്തിൽ നിന്നാണ് അനിരുദ്ധ് വരുന്നത്. അദ്ദേഹത്തിന്റെ മുത്തശ്ശൻ കെ. സുബ്രഹ്മണ്യം 1930-കളിലെ പ്രശസ്ത ചലച്ചിത്ര നിർമ്മാതാവായിരുന്നു. പ്രശസ്ത ക്ലാസിക്കൽ നർത്തകി ഡോ. പദ്മ സുബ്രഹ്മണ്യം അനിരുദ്ധിന്റെ മുത്തശ്ശിയുടെ സഹോദരിയുമാണ്.
മറുഭാഗത്ത്, പ്രമുഖ വ്യവസായി കലാനിധി മാരന്റെ മകളാണ് കാവ്യ മാരൻ. സൺറൈസേഴ്സ് ഹൈദരാബാദിന് പുറമെ, ദക്ഷിണാഫ്രിക്കൻ ടി20 ലീഗിലെ (SA20) സൺറൈസേഴ്സ് ഈസ്റ്റേൺ കേപ്പ്, ദ ഹണ്ട്രഡ് ലീഗിലെ സൺറൈസേഴ്സ് ലീഡ്സ് എന്നീ ടീമുകളുടെ സഹ-ഉടമ കൂടിയാണ് അവർ. അതേസമയം, പാറ്റ് കമ്മിൻസിന്റെ നായകത്വത്തിൽ ഐപിഎൽ 2026-ൽ മികച്ച പ്രകടനം കാഴ്ചവെച്ച സൺറൈസേഴ്സ് ഹൈദരാബാദ് പ്ലേഓഫിൽ എത്തിയിരുന്നെങ്കിലും, എലിമിനേറ്റർ മത്സരത്തിൽ രാജസ്ഥാൻ റോയൽസിനോട് പരാജയപ്പെട്ട് പുറത്താവുകയായിരുന്നു.
