ലോകകപ്പ് ഫുട്ബോളിൽ മുസ്ലിം താരങ്ങൾക്ക് നൽകുന്ന ‘മാൻ ഓഫ് ദി മാച്ച്’ ട്രോഫിയിൽ മാറ്റം വരുത്തിയതായി റിപ്പോർട്ടുകൾ. ഇസ്ലാം മതവിശ്വാസങ്ങളോടുള്ള ആദരസൂചകമായി, മദ്യക്കമ്പനിയുടെ ലോഗോ ഇല്ലാത്ത പ്രത്യേക ട്രോഫികളാണ് ഫിഫ ഇവർക്കായി നൽകുന്നതെന്ന് ഇഎസ്പിഎൻ യുകെ വ്യക്തമാക്കുന്നു. ഈജിപ്ത് താരം മുഹമ്മദ് സലാ, ബ്രസീൽ താരം വിനീഷ്യസ് ജൂനിയർ എന്നിവരുടെ ചിത്രങ്ങൾ പങ്കുവെച്ചുകൊണ്ട് ഇഎസ്പിഎൻ തങ്ങളുടെ സോഷ്യൽ മീഡിയ പോസ്റ്റിലൂടെയാണ് ഈ കാര്യം പുറത്തുവിട്ടത്.
നിലവിൽ ഗ്രൂപ്പ് ഘട്ട മത്സരങ്ങൾ പുരോഗമിക്കുന്ന 2026 ലോകകപ്പ്, ചരിത്രത്തിൽ ഏറ്റവും കൂടുതൽ ഗോളുകൾ പിറന്ന ടൂർണമെന്റായി മാറിക്കഴിഞ്ഞു. ലോകകപ്പ് ചരിത്രത്തിൽ ഏറ്റവും കൂടുതൽ ഗോളുകൾ നേടുന്ന കളിക്കാരനെന്ന റെക്കോർഡ് ഇത്തവണ ലയണൽ മെസി സ്വന്തമാക്കി. കഴിഞ്ഞ 68 വർഷത്തിനിടയിൽ ഏറ്റവും വേഗത്തിൽ 100 ഗോളുകൾ പൂർത്തിയായ ലോകകപ്പ് പതിപ്പ് കൂടിയാണ് ഇത്തവണത്തേത്.
അതേസമയം, ഗ്രൂപ്പ് എഫിലെ അവസാന പോരാട്ടത്തിൽ നാളെ അർജന്റീന ജോർദാനെ നേരിടുമ്പോൾ ലയണൽ മെസി ആദ്യ ഇലവനിൽ ഉണ്ടാകില്ലെന്ന് പരിശീലകൻ ലയണൽ സ്കലോനി സ്ഥിരീകരിച്ചിട്ടുണ്ട്. ഇന്ന് നടന്ന ഗ്രൂപ്പ് ജിയിലെ നിർണായക മത്സരത്തിൽ ബെൽജിയത്തോട് ഒന്നിനെതിരെ അഞ്ച് ഗോളുകൾക്ക് പരാജയപ്പെട്ട് ന്യൂസിലാൻഡ് ടൂർണമെന്റിൽ നിന്ന് പുറത്തായി.
മറ്റൊരു പ്രധാന മത്സരത്തിൽ സൗദി അറേബ്യയെ ഗോൾരഹിത സമനിലയിൽ തളച്ച് കാബോ വെർദെ ഗ്രൂപ്പ് എച്ചിൽ നിന്ന് രണ്ടാം സ്ഥാനക്കാരായി നോക്കൗട്ടിൽ പ്രവേശിച്ചു. ഉറുഗ്വായെ ഏകപക്ഷീയമായ ഒരു ഗോളിന് തോൽപ്പിച്ച് സ്പെയിനും പ്രീക്വാർട്ടർ ഉറപ്പിച്ചു. മറ്റൊരു മത്സരത്തിൽ ഇറാഖിനെ എതിരില്ലാത്ത അഞ്ച് ഗോളുകൾക്ക് സെനഗൽ തകർത്തു.
