കൊച്ചി: അശ്ലീല ആംഗ്യവും കമന്റടിയും ചോദ്യം ചെയ്ത പെൺകുട്ടികളെ ക്രൂരമായി മർദിച്ച കേസിൽ ഒളിവിൽ പോയ പ്രധാന പ്രതി അക്ബർ അലി പി. (29), കഴിഞ്ഞ ജൂലൈയിൽ കൊച്ചിയിൽ ഹൈടെക് പെൺവാണിഭ കേന്ദ്രം നടത്തിയ കേസിൽ അറസ്റ്റിലായിരുന്ന ആളാണെന്ന് പോലീസ് . മറ്റ് സംസ്ഥാനങ്ങളിൽ നിന്നടക്കം യുവതികളെ എത്തിച്ചായിരുന്നു ഇയാളുടെ നേതൃത്വത്തിൽ അനാശാസ്യ കേന്ദ്രം പ്രവർത്തിച്ചിരുന്നത്.
അന്ന് എറണാകുളം സൗത്ത് റെയിൽവേ സ്റ്റേഷന് സമീപമുള്ള കേന്ദ്രത്തിൽ പോലീസ് നടത്തിയ പരിശോധനയിൽ അസം, ബംഗാൾ സ്വദേശികളായ ആറ് യുവതികളെ കണ്ടെത്തുകയും ഇവരെ പിന്നീട് ഷെൽട്ടർ ഹോമിലേക്ക് മാറ്റുകയും ചെയ്തിരുന്നു. എന്നാൽ റെയിൽവേ റിക്രൂട്ട്മെന്റ് കോഴ്സിന് പഠിക്കുന്ന പെൺകുട്ടികളെ ആക്രമിച്ച പുതിയ കേസിൽ ഒളിവിൽ പോയ അക്ബറിനെയും കൂട്ടാളികളെയും പിടികൂടാൻ പോലീസിന് ഇതുവരെ സാധിച്ചിട്ടില്ല.
പാലക്കാട് മണ്ണാർക്കാട് സ്വദേശിയായ അക്ബർ അലിയായിരുന്നു ഈ പെൺവാണിഭ സംഘത്തിന്റെ തലവൻ. ഇയാളുടെ സുഹൃത്തുക്കളും നാട്ടുകാരുമായ മൻസൂർ അലി (31), ഷെഫീഖ് (27) എന്നിവരും മുൻപ് നടന്ന ആ റെയ്ഡിൽ അറസ്റ്റിലായിരുന്നു. ആവശ്യക്കാർക്ക് എസ്കോർട്ട് സർവീസ് നൽകുന്ന ഒരു മൊബൈൽ ആപ്പ് വഴിയായിരുന്നു ഇവരുടെ പ്രധാന ഇടപാടുകൾ. ഷെഫീഖിന്റെ പേരിലുള്ള അക്കൗണ്ട് വഴി ആവശ്യക്കാരുമായി ബന്ധപ്പെടുകയും തുടർന്ന് എത്തേണ്ട സ്ഥലം അറിയിക്കുകയുമായിരുന്നു രീതി. ഇവിടെയെത്തുന്ന ഇടപാടുകാരിൽ നിന്ന് ഒരു തവണത്തേക്ക് 3,000 രൂപയാണ് ഈടാക്കിയിരുന്നത്. ഈ തുക വാങ്ങുന്നതിനായി അനാശാസ്യ കേന്ദ്രത്തിൽ അക്ബർ അലിയുടെ പേരിലുള്ള ക്യുആർ കോഡും സ്ഥാപിച്ചിരുന്നു.
ഇത്തരത്തിൽ പണം ഡിജിറ്റലായി നൽകിയ ശേഷം എത്തുന്നവർക്ക് തങ്ങൾക്കിഷ്ടമുള്ള യുവതികളെ തിരഞ്ഞെടുക്കാമായിരുന്നു. ഇതിൽ 1000 മുതൽ 1500 രൂപ വരെയാണ് ഓരോ ഇടപാടിലും യുവതികൾക്ക് നൽകിയിരുന്നത്. ഇടപാടുകാരെ കൊണ്ടുവരുന്നതിനുള്ള കമ്മീഷനായി 750 രൂപ ഷെഫീഖിനോ മൻസൂറിനോ ലഭിക്കും. ബാക്കി തുക മുഴുവൻ അക്ബർ അലിയുടെ കൈകളിലേക്കാണ് എത്തിയിരുന്നത്. മുൻപ് ഇടപ്പള്ളിയിൽ അനാശാസ്യ കേന്ദ്രം പ്രവർത്തിക്കുന്നുണ്ടെന്ന വിവരത്തിന്റെ അടിസ്ഥാനത്തിൽ എളമക്കര പോലീസാണ് ആദ്യം അന്വേഷണം തുടങ്ങിയത്. അവിടെ റെയ്ഡ് നടത്തിയെങ്കിലും പെൺകുട്ടികളെ കണ്ടെത്താൻ പോലീസിന് കഴിഞ്ഞിരുന്നില്ല.
എന്നാൽ അവിടെയുണ്ടായിരുന്ന അക്ബറിനെ കസ്റ്റഡിയിലെടുത്ത് ചോദ്യം ചെയ്യുന്നതിനിടയിലാണ് കടവന്ത്ര പോലീസിന് മറ്റൊരു പെൺവാണിഭ കേന്ദ്രത്തെക്കുറിച്ച് രഹസ്യവിവരം ലഭിക്കുന്നത്. സൗത്ത് റെയിൽവേ സ്റ്റേഷന്റെ കിഴക്കേ കവാടത്തിന് അടുത്തുള്ള കർഷക റോഡിലെ ഒരു വാടകവീടായിരുന്നു ആ കേന്ദ്രം. പോലീസ് അവിടെ എത്തിയപ്പോൾ ആറ് യുവതികളും ഷെഫീഖും മൻസൂറും കൂടാതെ ഇടപാടുകാരനായ ചങ്ങനാശേരി സ്വദേശി വിഷ്ണുവും അവിടെയുണ്ടായിരുന്നു. തുടർന്ന് ഇവരെ ചോദ്യം ചെയ്തപ്പോഴാണ് അക്ബർ അലിയുടെ പങ്കിനെക്കുറിച്ച് കടവന്ത്ര പോലീസിന് വ്യക്തത വരുന്നത്. ആ സമയത്ത് ഇയാൾ എളമക്കര പോലീസിന്റെ കസ്റ്റഡിയിലായിരുന്നു. പിന്നീട് ഇയാളുടെ അറസ്റ്റ് രേഖപ്പെടുത്തി റിമാൻഡ് ചെയ്യുകയായിരുന്നു. പ്രതിമാസം 20,000 രൂപ വാടകയ്ക്കെടുത്ത കെട്ടിടത്തിലായിരുന്നു അന്ന് ഈ കേന്ദ്രം പ്രവർത്തിച്ചിരുന്നത്.
റെയിൽവേ കോഴ്സിന് പഠിക്കുന്ന പെൺകുട്ടികളെ ആക്രമിച്ച നിലവിലെ സംഭവത്തിന് ശേഷം ഒളിവിൽ പോയ അക്ബർ നടത്തിയിരുന്ന ഒരു ലോഡ്ജിൽ പോലീസ് കഴിഞ്ഞ ദിവസം റെയ്ഡ് നടത്തിയിരുന്നു. മൂന്ന് നിലകളുള്ള ഈ ലോഡ്ജിന്റെ രണ്ടാം നില പൂർണ്ണമായും എടുത്തായിരുന്നു ഇയാൾ പെൺവാണിഭം നടത്തിയിരുന്നതെന്ന് പോലീസ് വൃത്തങ്ങൾ സൂചിപ്പിക്കുന്നു. നാല് മുറികളുള്ള ഈ നിലയ്ക്കായി ഒരു ലക്ഷം രൂപയായിരുന്നു പ്രതിമാസ വാടകയായി നൽകിയിരുന്നത്.
ഈ സെക്സ് റാക്കറ്റ് ഇടപാടിൽ അക്ബറിന്റെ പങ്കാളികളായവരും ലോഡ്ജിലെ ജീവനക്കാരുമാണ് നിലവിൽ പോലീസിന്റെ പിടിയിലായ മൂന്ന് പേരിൽ രണ്ടുപേർ. പ്രധാന പ്രതിയായ അക്ബർ, ഇയാളുടെ സുഹൃത്തുക്കളായ രണ്ട് യുവതികൾ ഉൾപ്പെടെ മറ്റ് നാല് പേരെക്കൂടിയാണ് ഇനി ഈ കേസിൽ പിടികൂടാനുള്ളത്. അതേസമയം, അക്ബറിന്റെയും സംഘത്തിന്റെയും ക്രൂരമർദ്ദനത്തിന് ഇരയായ പെൺകുട്ടിയെ ആശുപത്രിയിൽ നിന്ന് ആദ്യം ഡിസ്ചാർജ് ചെയ്തിരുന്നെങ്കിലും ആരോഗ്യാവസ്ഥ വീണ്ടും മോശമായതിനെ തുടർന്ന് വീണ്ടും ആശുപത്രിയിൽ പ്രവേശിപ്പിച്ചിരിക്കുകയാണ്.
