ഷുഗർ കുറയ്ക്കും, പക്ഷേ തലച്ചോറിന് ഭീഷണിയോ? മെറ്റ്‌ഫോമിൻ ഉപയോഗിക്കുന്നവർ ജാഗ്രതൈ!

പതിറ്റാണ്ടുകളായി ടൈപ്പ് 2 പ്രമേഹത്തിനുള്ള ഏറ്റവും മികച്ച മരുന്നായി ലോകമെമ്പാടുമുള്ള ഡോക്ടർമാർ നിർദ്ദേശിക്കുന്ന ഒന്നാണ് മെറ്റ്‌ഫോർമിൻ . കുറഞ്ഞ ചിലവും പാർശ്വഫലങ്ങൾ കുറവാണെന്നതുമാണ് ഇതിന്റെ പ്രത്യേകത. എന്നാൽ മെറ്റ്‌ഫോർമിനെക്കുറിച്ചുള്ള പുതിയ പഠനങ്ങൾ ശാസ്ത്രലോകത്ത് വലിയ ചർച്ചകൾക്ക് വഴിയൊരുക്കിയിരിക്കുകയാണ്.

മെറ്റ്‌ഫോർമിൻ രക്തത്തിലെ പഞ്ചസാരയുടെ അളവ് നിയന്ത്രിക്കുക മാത്രമല്ല, തലച്ചോറിന്റെ പ്രവർത്തനങ്ങളെ നേരിട്ട് സ്വാധീനിക്കുന്നുണ്ടെന്നും പുതിയ ഗവേഷണങ്ങൾ വെളിപ്പെടുത്തുന്നു. മിക്ക പ്രമേഹ മരുന്നുകളും കരൾ അല്ലെങ്കിൽ പാൻക്രിയാസ് എന്നിവയിലാണ് പ്രവർത്തിക്കാറുള്ളത്. എന്നാൽ മെറ്റ്‌ഫോർമിൻ തലച്ചോറിലെ ഹൈപ്പോതലാമസിലെ നാഡീവ്യൂഹങ്ങളെ സ്വാധീനിക്കുന്നുണ്ടെന്ന കണ്ടെത്തൽ ശാസ്ത്രജ്ഞരെ അമ്പരപ്പിച്ചിരിക്കുകയാണ്.

മെറ്റ്‌ഫോർമിൻ ഉപാപചയ പ്രവർത്തനങ്ങളെ മെച്ചപ്പെടുത്തുമെങ്കിലും, ദീർഘകാലാടിസ്ഥാനത്തിലുള്ള ഇതിന്റെ ഉപയോഗം ഓർമ്മശക്തിയെയും തലച്ചോറിന്റെ മറ്റ് പ്രവർത്തനങ്ങളെയും ബാധിക്കാൻ സാധ്യതയുണ്ടെന്ന് ചില പഠനങ്ങൾ ചൂണ്ടിക്കാട്ടുന്നു. മൃഗങ്ങളിൽ നടത്തിയ പരീക്ഷണങ്ങളിൽ ഓർമ്മക്കുറവും പഠനവൈകല്യവും കണ്ടുപിടിക്കപ്പെട്ടിട്ടുണ്ട്.

മനുഷ്യരിൽ നടത്തിയ പഠനങ്ങളിൽ സമ്മിശ്ര പ്രതികരണങ്ങളാണ് ലഭിച്ചിട്ടുള്ളത്. ചിലരിൽ ഇത് ഡിമെൻഷ്യ (മറവിരോഗം) കുറയ്ക്കാൻ സഹായിക്കുമ്പോൾ, പ്രായമായവരിലും മറ്റും ഇത് തിരിച്ചറിവ് ശേഷിയെ ദോഷകരമായി ബാധിക്കുന്നതായും റിപ്പോർട്ടുകളുണ്ട്. കൂടാതെ, ദീർഘകാലം ഈ മരുന്ന് ഉപയോഗിക്കുന്നത് വൈറ്റമിൻ ബി 12-ന്റെ ആഗിരണം കുറയ്ക്കാനും അതുവഴി വിളർച്ചയ്ക്കും നാഡീസംബന്ധമായ പ്രശ്നങ്ങൾക്കും കാരണമായേക്കാം.

ഈ പുതിയ കണ്ടെത്തലുകളുടെ പേരിൽ രോഗികൾ പരിഭ്രാന്തരാകേണ്ടതില്ലെന്ന് വിദഗ്ധർ മുന്നറിയിപ്പ് നൽകുന്നു. ഡോക്ടറുടെ നിർദ്ദേശമില്ലാതെ മരുന്ന് കഴിക്കുന്നത് നിർത്തരുത്. മിക്കവാറും രോഗികളിൽ ഈ മരുന്നിന്റെ ഗുണങ്ങൾ ദോഷങ്ങളേക്കാൾ കൂടുതലാണ്. എന്നാൽ ദീർഘകാലമായി മെറ്റ്‌ഫോർമിൻ കഴിക്കുന്നവർ കൃത്യമായ ഇടവേളകളിൽ വൃക്കകളുടെ പ്രവർത്തനം പരിശോധിക്കണമെന്നും ശരീരത്തിലെ വൈറ്റമിൻ ബി 12-ന്റെ അളവ് നിരീക്ഷിക്കണമെന്നും ഡോക്ടർമാർ നിർദ്ദേശിക്കുന്നു.

അമിതമായ ക്ഷീണം, ഓർമ്മക്കുറവ്, ആശയക്കുഴപ്പം തുടങ്ങിയ ലക്ഷണങ്ങൾ കണ്ടാൽ ഉടൻ തന്നെ വൈദ്യസഹായം തേടേണ്ടതാണ്. ശാസ്ത്രം ഇപ്പോഴും വികസിച്ചുകൊണ്ടിരിക്കുകയാണെന്നും മെറ്റ്‌ഫോർമിനെക്കുറിച്ച് കൂടുതൽ വ്യക്തമായ പഠനങ്ങൾ വരാനിരിക്കുന്നതേയുള്ളൂ എന്നും ഗവേഷകർ ഓർമ്മിപ്പിക്കുന്നു.

Disclaimer: This content including advice provides generic information only. It is in no way a substitute for a qualified medical opinion. Always consult a specialist or your own doctor for more information. Hashtagonline does not claim responsibility for this information.