ഏറ്റവും എളുപ്പവും ഫലപ്രദവുമായ വ്യായാമങ്ങളിൽ ഒന്നാണ് നടത്തം. ശരിയായ രീതികൾ ഉപയോഗിക്കുകയാണെങ്കിൽ പ്രതീക്ഷിക്കുന്നതിനേക്കാൾ കൂടുതൽ കലോറി ഇതിലൂടെ കത്തിച്ചുകളയാൻ സാധിക്കും. ഭാരോദ്വഹനത്തിനും കഠിനമായ വ്യായാമങ്ങൾക്കും മുൻഗണന നൽകുന്ന ജിം സെഷനുകളിൽ നിന്ന് വ്യത്യസ്തമായി, നടത്തം ശരീരത്തിന് സ്വാഭാവികമായ ചലനങ്ങൾ നൽകുന്നു. ഇതിലൂടെ, ഏത് പ്രായക്കാർക്കും ആരോഗ്യവും ശരീരഭാരവും നിലനിർത്താൻ സാധിക്കും. ചില മാറ്റങ്ങൾ വരുത്തിക്കൊണ്ട് ഈ നടത്തത്തെ കൂടുതൽ കലോറി കത്തിച്ചുകളയുന്ന വ്യായാമമാക്കി മാറ്റാനും തിരക്കിട്ട ജീവിതത്തിൽ പോലും എളുപ്പത്തിൽ ഉൾപ്പെടുത്താനും സാധിക്കും.
ഇക്കാലത്ത്, ഫിറ്റ്നസ് വിദഗ്ധർ നടത്തത്തെ ഒരു സാധാരണ പ്രവർത്തനമായി മാത്രം കാണുന്നില്ല. കലോറി കത്തിച്ചുകളയുന്ന രീതിയിലുള്ള നടത്ത വ്യായാമത്തിലൂടെ ജിം ഉപകരണങ്ങളുടെ സഹായമില്ലാതെ തന്നെ ഹൃദയാരോഗ്യവും സ്റ്റാമിനയും വർദ്ധിപ്പിക്കാൻ സാധിക്കും.
കലോറി കുറയ്ക്കാൻ സഹായിക്കുന്ന ആറ് മികച്ച നടത്ത രീതികൾ
1. വേഗത വർദ്ധിപ്പിക്കുക– കലോറി വേഗത്തിൽ കത്തിച്ചുകളയാനുള്ള എളുപ്പവഴികളിലൊന്നാണിത്. വേഗത കൂട്ടുമ്പോൾ ഹൃദയമിടിപ്പ് കൂടുകയും പേശികൾ കൂടുതൽ പ്രവർത്തിക്കുകയും ചെയ്യുന്നു. വേഗത്തിൽ നടക്കുമ്പോൾ തന്നെ സംസാരിക്കാൻ കഴിയുന്ന രീതിയിൽ വേഗത നിലനിർത്തുക. ഈ മിതമായ വ്യായാമം കലോറി കത്തിക്കാനും സ്റ്റാമിന വളർത്താനും സഹായിക്കുന്നു.
2. കയറ്റങ്ങൾ ഉൾപ്പെടുത്തുക– നടക്കുമ്പോൾ കയറ്റങ്ങൾ ഉൾപ്പെടുത്തുന്നത് പേശികൾക്ക് കൂടുതൽ ആയാസം നൽകും. യഥാർത്ഥ കുന്നുകളിലോ, പടികളിലോ, ട്രെഡ്മില്ലിലോ നടക്കുന്നത് ഹാംസ്ട്രിംഗുകൾ, ഗ്ലൂട്ടുകൾ, കാഫ് പേശികൾ എന്നിവയ്ക്ക് കൂടുതൽ പ്രവർത്തിക്കാൻ അവസരം നൽകുന്നു. ഈ അധിക പ്രതിരോധം ഹൃദയത്തെ കൂടുതൽ പ്രവർത്തിപ്പിക്കുകയും കൂടുതൽ കലോറി കത്തിക്കാൻ സഹായിക്കുകയും ചെയ്യും.
3. പവർ വാക്കിങ് ടെക്നിക് – പേര് സൂചിപ്പിക്കുന്നത് പോലെ, ശക്തമായ ഈ നടത്തം ശരീരത്തിന്റെ എല്ലാ ഭാഗങ്ങൾക്കും വ്യായാമം നൽകുന്നു. കൈമുട്ടുകൾ 90 ഡിഗ്രിയിൽ വളച്ച് നടക്കുമ്പോൾ ശക്തമായി മുന്നോട്ടും പിന്നോട്ടും ചലിപ്പിക്കുക. കൈകളുടെ ഈ ചലനം ഹൃദയമിടിപ്പ് വർദ്ധിപ്പിക്കുകയും ശരീരത്തിലെ പേശികളെ ഉപയോഗിച്ച് കലോറി കത്തിക്കുകയും ചെയ്യും. വേഗത്തിലുള്ള നടത്തത്തോടൊപ്പം പവർ വാക്കിങ് ചെയ്യുന്നത് ജോയിന്റുകൾക്ക് കേടുപാടുകൾ വരുത്താതെ തന്നെ കലോറി കത്തിക്കാൻ സഹായിക്കും.
4. ഇടവേളകൾ എടുക്കുക– വേഗത്തിൽ നടക്കുകയും പിന്നീട് വേഗത കുറയ്ക്കുകയും ചെയ്യുന്ന രീതിയാണിത്. ഉദാഹരണത്തിന്, ഒരു മിനിറ്റ് വേഗത്തിൽ നടക്കുകയും പിന്നീട് രണ്ട് മിനിറ്റ് സാവധാനത്തിൽ നടക്കുകയും ചെയ്യുക. ഇത് ഹൃദയമിടിപ്പ് കൂട്ടുകയും ഉപാപചയപ്രവർത്തനങ്ങളെ വർദ്ധിപ്പിക്കുകയും ചെയ്യും. ഇത് വഴി കുറഞ്ഞ സമയം കൊണ്ട് കൂടുതൽ കലോറി കത്തിക്കാനും മടുപ്പ് ഒഴിവാക്കാനും സാധിക്കും.
5. ചെറിയ ഭാരം ഉപയോഗിക്കുക– നടക്കുമ്പോൾ കൈകളിലോ കാലുകളിലോ ചെറിയ ഭാരം ഉപയോഗിക്കുന്നത് പേശികൾക്ക് കൂടുതൽ ആയാസം നൽകുന്നു. ഇത് കൂടുതൽ കലോറി കത്തിക്കാനും കൈകളിലും കാലുകളിലും ബലം കൂട്ടാനും സഹായിക്കും. പരിക്ക് ഒഴിവാക്കാൻ, കുറഞ്ഞ ഭാരത്തിൽ തുടങ്ങി സാവധാനം കൂട്ടുക. നടത്തത്തിന്റെ വേഗത മാറ്റാതെ തന്നെ വ്യായാമത്തിന്റെ കാഠിന്യം വർദ്ധിപ്പിക്കാൻ ഇത് സഹായിക്കുന്നു.
6. സ്ട്രൈഡ് വർദ്ധിപ്പിക്കുക– നടത്തത്തിന്റെ വേഗത വർദ്ധിപ്പിക്കുന്നത് പേശികളെ കൂടുതൽ ഉപയോഗിക്കാൻ സഹായിക്കുകയും അതുവഴി കൂടുതൽ കലോറി കത്തിക്കുകയും ചെയ്യുന്നു. ഗ്ലൂട്ടുകൾ, ഇടുപ്പ്, കാലുകൾ എന്നിവയിലെ പേശികൾക്ക് കൂടുതൽ ആയാസം നൽകുന്നത് കൂടുതൽ കലോറി കത്തിച്ചുകളയും.
പേശികൾക്ക് വേദന ഉണ്ടാകാത്ത രീതിയിൽ ഓരോ ചുവടും വെക്കാൻ ശ്രദ്ധിക്കുക. ഈ രീതി നടത്തത്തിന്റെ കാര്യക്ഷമത വർദ്ധിപ്പിക്കാനും സഹായിക്കും.ഈ രീതികൾ നിങ്ങളുടെ ദിനചര്യയിൽ ഉൾപ്പെടുത്തുന്നത് കലോറി കത്തിക്കാനും ശരീരഭാരം കുറക്കാനും സഹായിക്കും. ഇത് ഹൃദയാരോഗ്യം മെച്ചപ്പെടുത്താനും സ്റ്റാമിന വളർത്താനും ഉപകരിക്കുന്നു.
