Sports

‘ഇതൊരു ട്രെയിലർ മാത്രം, ലോകകപ്പിലും സിറാജിനെ ഒഴിവാക്കിയാൽ അത്ഭുതപ്പെടാനില്ല’; രോഷാകുലനായി അശ്വിൻ

ചെന്നൈ: ന്യൂസീലൻഡിനെതിരായ ആദ്യ ടെസ്റ്റ് മത്സരത്തിൽ മുഹമ്മദ് സിറാജിനെ ടീമിൽ ഉൾപ്പെടുത്താത്തതിനെതിരെ രൂക്ഷമായി പ്രതികരിച്ച് മുൻ ഇന്ത്യൻ സ്പിന്നർ ആർ. അശ്വിൻ . സിറാജിനെ ഇന്ത്യൻ ടീമിൽ നിന്നും പൂർണ്ണമായി ഒഴിവാക്കാനുള്ള നീക്കത്തിന്റെ തുടക്കമാണിതെന്ന് അശ്വിൻ കുറ്റപ്പെടുത്തി. ഒന്നാം ടെസ്റ്റിനുള്ള പ്ലേയിങ് ഇലവനിൽ ജസ്പ്രീത് ബുമ്രയ്‌ക്കൊപ്പം പേസർമാരായി അൻഷൂൽ കാംബോജ്, ആകാശ്ദീപ്, പ്രസിദ്ധ് കൃഷ്ണ എന്നിവരെയും സ്പിൻ ഓൾറൗണ്ടറായി വാഷിങ്ടൻ സുന്ദറിനെയുമാണ് ഉൾപ്പെടുത്തിയത്. മത്സരം തുടങ്ങുന്നതിന് മുൻപ് തന്നെ സിറാജിന്റെ സ്ഥാനത്തെക്കുറിച്ച് സംശയങ്ങൾ ഉയർന്നിരുന്നുവെന്നും, വരാനിരിക്കുന്ന ഏകദിന ലോകകപ്പ് ടീമിലും താരത്തിന് ഇടം ലഭിക്കാൻ സാധ്യതയില്ലെന്നും അശ്വിൻ തന്റെ യുട്യൂബ് ചാനലിലൂടെ അഭിപ്രായപ്പെട്ടു.

‘‘സിറാജിനെ പുറത്തിരുത്തുന്നതിനായി ഒരാഴ്ച മുൻപേ ഇത്തരമൊരു സാഹചര്യം അവർ ഒരുക്കിയത് എന്തിനാണ്? ആദ്യം ഏകദിന ടീമിൽ നിന്നും താരത്തെ മാറ്റിനിർത്തി. ഏകദിന ലോകകപ്പ് അടുത്തിരിക്കെ ഇന്ത്യൻ ടീമിന് സിറാജിന്റെ സേവനം ആവശ്യമില്ലെന്നാണോ? 2023 ലോകകപ്പിൽ മികച്ച പ്രകടനം കാഴ്ചവെച്ച താരത്തോടാണോ ഈ രീതിയിൽ പെരുമാറേണ്ടത്? ഇപ്പോൾ കാണുന്നത് ഒരു സൂചന മാത്രമാണ്; ലോകകപ്പ് സ്ക്വാഡിൽ നിന്നും സിറാജിനെ ഒഴിവാക്കിയാലും അതിശയിക്കാനില്ല,’’ അശ്വിൻ വിഡിയോയിൽ വ്യക്തമാക്കി.

നിലവിലെ ലോക ടെസ്റ്റ് ചാംപ്യൻഷിപ്പിൽ ഇന്ത്യയ്ക്കായി ഏറ്റവും കൂടുതൽ വിക്കറ്റുകൾ നേടിയ ബൗളറാണ് മുഹമ്മദ് സിറാജ്. ഇതുവരെ 43 വിക്കറ്റുകളാണ് താരം സ്വന്തമാക്കിയിട്ടുള്ളത്. ജസ്പ്രീത് ബുമ്രയെപ്പോലെ തന്നെ ടെസ്റ്റ് ടീമിൽ സിറാജിനും സ്ഥിരസ്ഥാനം നൽകേണ്ടതായിരുന്നുവെന്നും അശ്വിൻ ചൂണ്ടിക്കാട്ടി. അതേസമയം, സിറാജിനെ പ്ലേയിങ് ഇലവനിൽ നിന്നും ഒഴിവാക്കിയ തീരുമാനത്തെ ന്യായീകരിച്ചുകൊണ്ട് ഇന്ത്യൻ ബാറ്റിങ് പരിശീലകൻ സിതാൻഷു കോട്ടക് രംഗത്തെത്തി.

ആദ്യ ദിവസത്തെ പിച്ച് സാഹചര്യങ്ങൾ മാത്രം നോക്കിയല്ല, മറിച്ച് അഞ്ച് ദിവസത്തെ മത്സരത്തിന്റെ മുഴുവൻ ഗതിയും കണക്കിലെടുത്താണ് ടീമിനെ തിരഞ്ഞെടുത്തതെന്ന് കോട്ടക് വിശദീകരിച്ചു. ‘‘സിറാജിന് മറ്റ് പ്രശ്നങ്ങളൊന്നുമില്ല. ടീം തിരഞ്ഞെടുപ്പ് സമയത്ത് ഏറ്റവും അനുയോജ്യമായ ഇലവൻ ഇതാണെന്നാണ് ഞങ്ങൾ വിലയിരുത്തിയത്. സിറാജിനെ മാറ്റിനിർത്തിയത് ഒരു തെറ്റായ തീരുമാനമായി തോന്നുന്നില്ല. കളി തുടങ്ങിയിട്ടേയുള്ളൂ. ആദ്യ ദിനത്തിലെ കാര്യങ്ങൾ മാത്രം പരിഗണിച്ചല്ല ടീം രൂപീകരിക്കുന്നത്; തുടർന്നുള്ള ദിവസങ്ങളിലെ സാഹചര്യങ്ങൾ കൂടി മുന്നിൽക്കണ്ടാണ് ഇത്തരമൊരു തീരുമാനമെടുത്തത്,’’ കോട്ടക് മാധ്യമങ്ങളോട് പറഞ്ഞു.