മെൽബൺ (ഓസ്ട്രേലിയ) : മെൽബൺ ക്രിക്കറ്റ് ഗ്രൗണ്ടിലെ (എംസിജി) ഈ രാത്രി നിഖിൽ ചൗധരിക്ക് ജീവിതത്തിൽ ഒരിക്കലും മറക്കാൻ കഴിയില്ല. ഇംഗ്ലണ്ടിനെതിരായ മത്സരത്തിൽ 66 റൺസ് നേടിയതും രണ്ട് വിക്കറ്റുകൾ വീഴ്ത്തിയതും മാത്രമായിരുന്നില്ല ഈ ദിവസത്തെ പ്രത്യേകതയുള്ളതാക്കിയത്. ഇന്ത്യയിൽ നിന്ന് തന്റെ കളി നേരിൽ കാണാനായി ആദ്യമായി എത്തിയ മാതാപിതാക്കളുടെ മുന്നിൽവെച്ച് ‘പ്ലെയർ ഓഫ് ദ് മാച്ച്’ പുരസ്കാരം നേടാനായത് ഇന്ത്യൻ വംശജനായ ഈ ഓസ്ട്രേലിയൻ ഓൾറൗണ്ടർക്ക് ഇരട്ടി സന്തോഷമായി.
ഡൽഹിയിൽ ജനിച്ച നിഖിൽ ചൗധരി ഇംഗ്ലണ്ടിനെതിരായ ആദ്യ ട്വന്റി20 മത്സരത്തിൽ മികച്ച ഓൾറൗണ്ട് പ്രകടനമാണ് നടത്തിയത്. 38 പന്തിൽ 66 റൺസ് നേടിയ താരം നാല് ഓവറിൽ 21 റൺസ് മാത്രം വിട്ടുകൊടുത്ത് രണ്ട് വിക്കറ്റുകളും സ്വന്തമാക്കി. ഇതോടെ 188 റൺസ് വിജയലക്ഷ്യവുമായി ഇറങ്ങിയ ഓസ്ട്രേലിയ ഒരു പന്ത് ബാക്കിനിൽക്കെ വിജയം കൈപ്പിടിയിലൊതുക്കി.
മത്സരശേഷം മാതാപിതാക്കളെക്കുറിച്ച് സംസാരിച്ചപ്പോഴാണ് മുപ്പതുകാരനായ താരത്തിന്റെ സന്തോഷം ഇരട്ടിയായത്. ഓസ്ട്രേലിയൻ ജഴ്സിയണിഞ്ഞ് കളിക്കുമ്പോൾ ഇത്തരമൊരു നേട്ടം ഒരിക്കലും പ്രതീക്ഷിച്ചിരുന്നില്ലെന്നും അദ്ദേഹം വ്യക്തമാക്കി. “കഴിഞ്ഞ രാത്രിയാണ് എന്റെ മാതാപിതാക്കൾ ഇന്ത്യയിൽ നിന്നും ഇവിടെ എത്തിയത്. അവരുടെ മുന്നിൽവെച്ച് പ്ലെയർ ഓഫ് ദ് മാച്ച് പുരസ്കാരം സ്വന്തമാക്കുന്നതിനേക്കാൾ വലിയ സന്തോഷം വേറെയില്ല. എന്റെ കളി അവർ നേരിൽ കാണുന്ന ആദ്യ മത്സരം കൂടിയാണിത്.” മത്സരശേഷം ചൗധരി പറഞ്ഞു.
മെൽബൺ ക്രിക്കറ്റ് ഗ്രൗണ്ടിൽ ഓസ്ട്രേലിയക്കായി കളിച്ച് പ്ലെയർ ഓഫ് ദ് മാച്ച് പുരസ്കാരം നേടുമെന്ന് എപ്പോഴെങ്കിലും കരുതിയിരുന്നോ എന്ന ചോദ്യത്തിന്, അങ്ങനെ ഒരിക്കലും പ്രതീക്ഷിച്ചിരുന്നില്ലെന്നായിരുന്നു താരത്തിന്റെ മറുപടി. “ഇല്ല, ഒരിക്കലും അങ്ങനെ പ്രതീക്ഷിച്ചിരുന്നില്ല,” നിഖിൽ ചൗധരി പറഞ്ഞു.
ഇംഗ്ലണ്ടിനെതിരായ കളിയിൽ ബാറ്റിങ്ങിലും ബോളിങ്ങിലും ഒരുപോലെ തിളങ്ങിയ നിഖിൽ ചൗധരി 38 പന്തിൽ അഞ്ച് ഫോറും രണ്ട് സിക്സും ഉൾപ്പെടെ 66 റൺസ് നേടി. ഓസ്ട്രേലിയയുടെ 188 റൺസ് വിജയലക്ഷ്യം പിന്തുടരുന്നതിൽ താരത്തിന്റെ ഈ ഇന്നിങ്സ് നിർണായകമായി. ബോളിങ്ങിലും മികച്ച പ്രകടനം കാഴ്ചവെച്ച താരം നാല് ഓവറിൽ 21 റൺസ് മാത്രം വഴങ്ങി രണ്ട് വിക്കറ്റുകൾ വീഴ്ത്തി. 28 പന്തിൽ 65 റൺസെടുത്ത് ഇംഗ്ലണ്ടിന്റെ ടോപ് സ്കോററായ ക്യാപ്റ്റൻ ഹാരി ബ്രൂക്കിനെയും 21 റൺസെടുത്ത സാം കറനെയും പുറത്താക്കിയത് ചൗധരിയായിരുന്നു.
ആദ്യം ബാറ്റ് ചെയ്ത ഇംഗ്ലണ്ട് 20 ഓവറിൽ ഒൻപത് വിക്കറ്റ് നഷ്ടത്തിൽ 187 റൺസാണ് നേടിയത്. തുടക്കത്തിലെ തകർച്ചയ്ക്ക് ശേഷം ഹാരി ബ്രൂക്കും 39 റൺസെടുത്ത ടോം ബാന്റണും ചേർന്നാണ് ഇംഗ്ലണ്ടിനെ മികച്ച സ്കോറിലേക്ക് നയിച്ചത്. ജോർഡൻ കോക്സ് 27 റൺസും ലിയാം ഡോസൺ 17 റൺസും എടുത്തു. ഓസ്ട്രേലിയക്കായി ജാക്ക് എഡ്വേർഡ്സ് രണ്ട് വിക്കറ്റുകൾ നേടിയപ്പോൾ ജോയൽ ഡേവിസ്, റൈലി മെറിഡിത്ത്, ബെൻ ഡ്വാർഷൂയിസ്, ആദം സാംപ എന്നിവർ ഓരോ വിക്കറ്റ് വീതവും വീഴ്ത്തി.
മറുപടി ബാറ്റിങ്ങിനിറങ്ങിയ ഓസ്ട്രേലിയയ്ക്ക് തുടക്കത്തിൽ തന്നെ തിരിച്ചടിയേറ്റു. ജെയ്ക് ഫ്രേസർ-മക്ഗർക്ക് ഒരു റൺസെടുത്ത് പുറത്തായി. പിന്നീട് സാം ഹാർപ്പറും (32) ക്യാപ്റ്റൻ മിച്ചൽ മാർഷും (37) ചേർന്ന് ടീമിനെ കരകയറ്റി. തുടർന്ന് ആക്രമിച്ചു കളിച്ച നിഖിൽ ചൗധരി മത്സരത്തിന്റെ നിയന്ത്രണം ഏറ്റെടുത്തു. 20 റൺസെടുത്ത ടിം ഡേവിഡിനൊപ്പം നിർണായക കൂട്ടുകെട്ടുണ്ടാക്കാനും താരത്തിനായി. 66 റൺസെടുത്ത് ചൗധരി പുറത്തായെങ്കിലും ജാക്ക് എഡ്വേർഡ്സ് പുറത്താകാതെ നേടിയ 25 റൺസിന്റെ ബലത്തിൽ ഓസ്ട്രേലിയ ലക്ഷ്യത്തിലേക്ക് കുതിച്ചു. ഒടുവിൽ 19.5 ഓവറിൽ ഏഴ് വിക്കറ്റ് നഷ്ടത്തിൽ 191 റൺസെടുത്ത ഓസ്ട്രേലിയ ഒരു പന്ത് ശേഷിക്കെ മൂന്ന് വിക്കറ്റിന്റെ ആവേശകരമായ വിജയം സ്വന്തമാക്കി.
1996 മേയിൽ ഡൽഹിയിൽ ജനിച്ച നിഖിൽ ചൗധരി പഞ്ചാബ് അണ്ടർ-19, അണ്ടർ-23 ടീമുകളിലൂടെയാണ് ക്രിക്കറ്റ് രംഗത്തേക്ക് വരുന്നത്. 2017-ൽ പഞ്ചാബിനായി സീനിയർ ടീമിൽ അരങ്ങേറി. 2019-ൽ മുംബൈ ഇന്ത്യൻസിനായി ഐപിഎൽ ട്രയൽസിൽ പങ്കെടുത്തെങ്കിലും ടീമിൽ അവസരം ലഭിച്ചില്ല. 2020-ൽ ഓസ്ട്രേലിയയിൽ എത്തിയ നിഖിൽ കോവിഡ് നിയന്ത്രണങ്ങളെത്തുടർന്ന് അവിടെത്തന്നെ തുടരാൻ തീരുമാനിക്കുകയായിരുന്നു. ക്വീൻസ്ലാൻഡിലെ ക്ലബ്ബ് ക്രിക്കറ്റിലൂടെ കരിയർ തിരിച്ചുപിടിക്കാൻ ശ്രമിക്കുന്നതിനിടെ പോസ്റ്റ്മാനായും റസ്റ്റോറന്റ് ജീവനക്കാരനായുമൊക്കെ അദ്ദേഹം ജോലി ചെയ്തിട്ടുണ്ട്.
ബിഗ് ബാഷ് ലീഗിൽ ഹോബാർട്ട് ഹറികെയ്ൻസിനായി കളിക്കാൻ തുടങ്ങിയതോടെയാണ് നിഖിൽ ശ്രദ്ധിക്കപ്പെട്ടത്. തുടർന്ന് ടാസ്മാനിയയ്ക്കായി ഷെഫീൽഡ് ഷീൽഡിലും, ‘ദ് ഹണ്ട്രഡ്’, സിപിഎൽ, മേജർ ലീഗ് ക്രിക്കറ്റ് എന്നീ ടൂർണമെന്റുകളിലും കളിച്ചു. ഓസ്ട്രേലിയൻ പൗരത്വം ലഭിച്ചതോടെ 2026 ജൂണിൽ ട്രാവിസ് ഹെഡിന് പകരക്കാരനായാണ് നിഖിലിന് ആദ്യമായി ഓസ്ട്രേലിയൻ ദേശീയ ടീമിലേക്ക് ക്ഷണം ലഭിച്ചത്.




