വിറ്റാമിൻ ഡിയുടെ കുറവ് കോശങ്ങളിൽ സമ്മർദ്ദം വർദ്ധിപ്പിക്കുകയും ശരീരത്തിന്റെ സ്വാഭാവിക പ്രതിരോധ ശേഷിയെ ബലഹീനമാക്കുകയും ചെയ്തുകൊണ്ട് ഹൃദയാരോഗ്യത്തെ ദോഷകരമായി ബാധിച്ചേക്കാമെന്ന് ഹൈദരാബാദിലെ ഐസിഎംആർ-നാഷണൽ ഇൻസ്റ്റിറ്റ്യൂട്ട് ഓഫ് ന്യൂട്രീഷനിലെ (ICMR-NIN) ഗവേഷകർ നടത്തിയ പഠനം വ്യക്തമാക്കുന്നു. ‘സ്റ്റീറോയിഡ്സ്’ എന്ന അന്താരാഷ്ട്ര ജേണലിലാണ് ഈ പഠനം പ്രസിദ്ധീകരിച്ചിരിക്കുന്നത്.
എലികളിൽ നടത്തിയ നിരീക്ഷണങ്ങളിലൂടെയാണ് വിറ്റാമിൻ ഡിയുടെ അളവിലുണ്ടാകുന്ന വ്യതിയാനം ഹൃദയത്തെ എങ്ങനെ ബാധിക്കുന്നുവെന്ന് ഗവേഷകർ പഠനവിധേയമാക്കിയത്. വിറ്റാമിൻ ഡി വളരെ കുറഞ്ഞ അളവിൽ ലഭിച്ച എലികളുടെ ഹൃദയത്തിൽ ഓക്സിഡേറ്റീവ് നാശനഷ്ടങ്ങൾ വർദ്ധിച്ചതായി അവർ കണ്ടെത്തി.
ഇത്തരം എലികളിൽ ഗ്ലൂട്ടാതയോണിന്റെ (Glutathione) അളവ് കുറയുകയും പ്രധാനപ്പെട്ട ആന്റിഓക്സിഡന്റ് എൻസൈമുകളുടെ പ്രവർത്തനം മന്ദഗതിയിലാകുകയും ചെയ്തു. കോശങ്ങളെ സംരക്ഷിക്കുന്ന എൻആർഎഫ്-2 (Nrf2) പ്രവർത്തനരീതിയെ വിറ്റാമിൻ ഡി കുറവ് പ്രതികൂലമായി ബാധിക്കുന്നതായും കണ്ടെത്തി. കൂടാതെ, എൻഡോപ്ലാസ്മിക് റെറ്റിക്കുലം (ER) സ്ട്രെസ്, ഓട്ടോഫാഗി, കോശമരണം (Apoptosis) എന്നിവയുമായി ബന്ധപ്പെട്ട സൂചകങ്ങൾ വിറ്റാമിൻ ഡി കുറവുള്ള ഹൃദയങ്ങളിൽ ഉയർന്ന അളവിൽ കാണപ്പെട്ടു. വിറ്റാമിൻ ഡിയുടെ കുറവ് മൂലമുണ്ടാകുന്ന ദീർഘകാല ഓക്സിഡേറ്റീവ് സ്ട്രെസ്, ഹൃദയകോശങ്ങൾക്ക് നാശമുണ്ടാക്കുന്ന കോശപ്രവർത്തനങ്ങൾക്ക് കാരണമാകുമെന്ന് പഠനസംഘത്തിന് നേതൃത്വം നൽകിയ ശാസ്ത്രജ്ഞ ഡോ. ആയിഷ ഇസ്മായിൽ പറഞ്ഞു.
എലികളുടെ ഹൃദയകോശങ്ങളിൽ നടത്തിയ പരീക്ഷണങ്ങൾ വിറ്റാമിൻ ഡിയുടെ സംരക്ഷണ പങ്കിലേക്ക് കൂടുതൽ വെളിച്ചം വീശുന്നു. കൃത്യമായ അളവിൽ വിറ്റാമിൻ ഡി ലഭിക്കുന്നത് ഹൃദയകോശങ്ങളെ ഓക്സിഡേറ്റീവ് സ്ട്രെസിൽ നിന്ന് സംരക്ഷിക്കാനും കോശങ്ങൾ നശിക്കുന്നത് തടയാനും സഹായിക്കുമെന്ന് ഈ കണ്ടെത്തലുകൾ സൂചിപ്പിക്കുന്നുവെന്ന് ഐസിഎംആർ-എൻഐഎൻ ഡയറക്ടർ ഡോ. ഭാരതി കുൽക്കർണി വ്യക്തമാക്കി.
എങ്കിലും, മൃഗങ്ങളിലും കോശങ്ങളിലും നടത്തിയ പഠനങ്ങളെ അടിസ്ഥാനമാക്കിയുള്ളതാണ് ഈ കണ്ടെത്തലുകൾ എന്നും മനുഷ്യരിൽ സമാനമായ ഫലങ്ങൾ ഉണ്ടാകുന്നുണ്ടോ എന്ന് ഉറപ്പാക്കാൻ കൂടുതൽ ഗവേഷണങ്ങൾ ആവശ്യമാണെന്നും അവർ ഊന്നിപ്പറഞ്ഞു. ഈ പഠനം വിറ്റാമിൻ ഡിയും ഹൃദയാരോഗ്യവും തമ്മിലുള്ള സാധ്യമായ ബന്ധത്തെ എടുത്തുകാണിക്കുന്നു.
