ഏഷ്യൻ ഗെയിംസ് പുരുഷ ക്രിക്കറ്റിലെ ക്വാർട്ടർ ഫൈനൽ പോരാട്ടങ്ങൾ മഴ കാരണം ഉപേക്ഷിച്ചതിനെത്തുടർന്ന്, ഐസിസി റാങ്കിങ്ങിൽ മുന്നിലുള്ള ഇന്ത്യ, ശ്രീലങ്ക, പാക്കിസ്ഥാൻ, ബംഗ്ലാദേശ് ടീമുകൾ സെമി ഫൈനലിൽ പ്രവേശിച്ചു. വ്യാഴാഴ്ച നടക്കുന്ന ആദ്യ സെമിയിൽ ഇന്ത്യ ശ്രീലങ്കയെയും രണ്ടാം സെമിയിൽ പാക്കിസ്ഥാൻ ബംഗ്ലാദേശിനെയും നേരിടും. എന്നാൽ മത്സരങ്ങൾ നടക്കേണ്ട കൊറോഗി അത്‍ലറ്റിക്സ് പാർക്ക് മേഖലയിൽ വ്യാഴാഴ്ച 60 ശതമാനം മഴ സാധ്യത പ്രവചിച്ചിട്ടുള്ളതിനാൽ ഈ പോരാട്ടങ്ങൾക്കും ഭീഷണിയുണ്ട്.
മഴ കാരണം സെമി ഫൈനൽ മത്സരങ്ങൾ ഉപേക്ഷിക്കേണ്ടി വന്നാൽ റാങ്കിങ് മികവിൽ ഇന്ത്യയും പാക്കിസ്ഥാനും ഫൈനലിലേക്ക് മുന്നേറും. ശനിയാഴ്ച നടക്കേണ്ട ഫൈനൽ മത്സരത്തിനും നഗോയയിൽ 40 ശതമാനം മഴ സാധ്യതയുണ്ട്. 2022-ലെ ഏഷ്യൻ ഗെയിംസിൽ ഫൈനൽ മഴ മൂലം റദ്ദാക്കിയപ്പോൾ റാങ്കിങ്ങിൽ മുന്നിലുണ്ടായിരുന്ന ഇന്ത്യയ്ക്കാണ് സ്വർണം ലഭിച്ചത്. എന്നാൽ ജപ്പാനിൽ നടക്കുന്ന ഇത്തവണത്തെ ഗെയിംസിൽ ഫൈനൽ മുടങ്ങിയാൽ ഇരു ടീമുകൾക്കുമായി സ്വർണമെഡൽ പങ്കിട്ടു നൽകുന്ന പുതിയ രീതിയാണ് പിന്തുടരുന്നത്.
സമീപകാലത്തെ രാഷ്ട്രീയ സാഹചര്യങ്ങളെത്തുടർന്ന് ഇന്ത്യ-പാക്കിസ്ഥാൻ താരങ്ങൾ തമ്മിൽ ഹസ്തദാനം ചെയ്യുകയോ, ഏഷ്യൻ ക്രിക്കറ്റ് കൗൺസിൽ തലവനിൽ നിന്ന് ട്രോഫികൾ ഏറ്റുവാങ്ങുകയോ ചെയ്തിരുന്നില്ല. അതിനാൽ ഫൈനൽ മഴയിൽ ഒലിച്ചുപോയാൽ ചിരവൈരികളായ ഇന്ത്യയും പാക്കിസ്ഥാനും സ്വർണമെഡൽ വേദിയിൽ ഒന്നിച്ചു പങ്കിടുന്ന അപൂർവ്വ കാഴ്ചയ്ക്കായിരിക്കും കായികലോകം സാക്ഷ്യം വഹിക്കുക.
