കുട്ടിക്കാലത്ത് ലോറികളോടുണ്ടായിരുന്ന കൗതുകമാണ് നേഹ താക്കൂറിന്റെ ജീവിതത്തിലെ വഴിത്തിരിവായത്. അച്ഛൻ ലോറി ഓടിക്കുന്നത് കണ്ടുവളർന്ന നേഹ, പിന്നീട് എയർ ഹോസ്റ്റസ് പരിശീലനം നേടിയിട്ടും ഒടുവിൽ ഡ്രൈവിംഗ് സീറ്റ് തന്നെ തിരഞ്ഞെടുക്കുകയായിരുന്നു.
ഹിമാചൽ പ്രദേശിലെ മാണ്ഡിയിൽ ജനിച്ച നേഹയുടെ ജീവിതം അച്ഛന്റെ ജോലി കാരണം ലോറികളുമായി ഏറെ അടുത്തതായിരുന്നു. സ്കൂളിൽ കൊണ്ടുവിട്ടിരുന്നത് പോലും അച്ഛന്റെ ലോറിയിലായിരുന്നു. ആ കാഴ്ചകൾ നേഹയിൽ വലിയ സ്വാധീനം ചെലുത്തുകയും അച്ഛൻ അവളുടെ ആദ്യത്തെ റോൾ മോഡലായി മാറുകയും ചെയ്തു.
സ്വന്തം ആഗ്രഹങ്ങൾക്ക് പിന്നാലെ പോകാൻ തീരുമാനിച്ച നേഹ 2022-ലാണ് ലോറി ഡ്രൈവിംഗ് തുടങ്ങുന്നത്. അച്ഛന്റെ പൂർണ്ണ പിന്തുണയും ഈ തീരുമാനത്തിന് ഉണ്ടായിരുന്നു. എന്നാൽ ഇതിന് മുൻപ് തികച്ചും വ്യത്യസ്തമായ ഒരു മേഖലയിലായിരുന്നു നേഹ പ്രവർത്തിച്ചിരുന്നത്. ബിരുദത്തിന് ശേഷം ചണ്ഡീഗഡിൽ പോയി എയർ ഹോസ്റ്റസ് പരിശീലനം പൂർത്തിയാക്കിയെങ്കിലും, റോഡുകളോടുള്ള കമ്പം കാരണം അവർ തിരികെ ഡ്രൈവിംഗിലേക്ക് തന്നെ എത്തുകയായിരുന്നു.
ലോറി ഡ്രൈവിംഗ് ആരംഭിച്ചതോടെ തന്റെ യാത്രകൾ പകർത്തി സോഷ്യൽ മീഡിയയിൽ പങ്കുവെക്കാനും നേഹ തുടങ്ങി. ലോറി സ്റ്റാർട്ട് ചെയ്യുമ്പോൾ തന്നെ താൻ ക്യാമറയും ഓൺ ചെയ്യുമെന്ന് നേഹ പറയുന്നു. മഴയും മലനിരകളും ചരക്കുകൾ കയറ്റുന്നതും ഇറക്കുന്നതുമെല്ലാം അവരുടെ സോഷ്യൽ മീഡിയ പോസ്റ്റുകളുടെ ഭാഗമായി മാറി.
സാധാരണയായി പല ഡ്രൈവർമാരും ഒഴിവാക്കുന്ന പ്രയാസമേറിയ ഒരു വഴിയിലൂടെ ലോറി ഓടിക്കുന്ന വീഡിയോ പങ്കുവെച്ചതോടെയാണ് നേഹ വൈറലാകുന്നത്. ദശലക്ഷക്കണക്കിന് ആളുകളാണ് ആ വീഡിയോ കണ്ടത്. ഇത്രയും കുറഞ്ഞ പ്രായത്തിൽ ഇത്രയും ദുർഘടമായ പാതയിലൂടെ ആത്മവിശ്വാസത്തോടെ വാഹനമോടിക്കുന്ന നേഹയെ കണ്ട് പലരും അത്ഭുതപ്പെട്ടു. യാത്രയിലെ ഓരോ അനുഭവങ്ങളും തനിക്ക് പുതിയ കഥകൾ സമ്മാനിക്കുന്നുവെന്നും സോഷ്യൽ മീഡിയയിൽ പുതിയ തരംഗങ്ങൾക്ക് പിന്നാലെ പോകേണ്ട ആവശ്യം തനിക്കില്ലെന്നും നേഹ വിശ്വസിക്കുന്നു.
