എയർ ഇന്ത്യയിലെ ഒരു ക്യാബിൻ ക്രൂ അംഗത്തിന് താൻ ജോലിയിലായിരുന്നപ്പോൾ ഒരു “മനോഹരമായ അനുഗ്രഹം” ലഭിച്ച അനുഭവം ഉണ്ടായി. അവസാന നിമിഷം ഫ്ലൈറ്റ് ഷെഡ്യൂൾ മാറിയതിനെ തുടർന്ന് വീട്ടിലെ ഗണപതിപൂജയിൽ പങ്കെടുക്കാൻ കഴിഞ്ഞില്ലെന്ന് എയർ ഹോസ്റ്റസായ അനുരാധ സോണി ഇൻസ്റ്റാഗ്രാമിലൂടെ പങ്കുവെച്ചു.
വീട്ടിലെ ഗണപതിപൂജയിൽ പങ്കെടുക്കാൻ കഴിയാത്തതിൽ തുടക്കത്തിൽ അവർക്ക് വലിയ വിഷമം തോന്നിയിരുന്നു. എന്നാൽ അവർക്കായി ഒരു വലിയ സർപ്രൈസ് കാത്തിരിപ്പുണ്ടായിരുന്നു എന്ന് അവർ അറിഞ്ഞില്ല.
“പക്ഷേ ബപ്പയ്ക്ക് (ഗണപതി) എനിക്കായി മറ്റു ചില പ്ലാനുകളാണ് ഉണ്ടായിരുന്നത്. എല്ലാവരെയും അത്ഭുതപ്പെടുത്തിക്കൊണ്ട്, ഗണപതിപൂജയുടെ സമയത്ത് തന്നെ ഒരു യാത്രക്കാരൻ ഞങ്ങളുടെ വിമാനത്തിൽ ഒരു ഗണപതി വിഗ്രഹം കൊണ്ടുവന്നു. പെട്ടെന്ന്, 35,000 അടി ഉയരത്തിൽ വെച്ച്… എനിക്ക് പൂജ ചെയ്യാനും പ്രാർത്ഥിക്കാനും ബപ്പയുടെ അനുഗ്രഹം വാങ്ങാനും കഴിഞ്ഞു,” അവർ ഇൻസ്റ്റാഗ്രാമിൽ പങ്കുവെച്ച വീഡിയോയുടെ അടിക്കുറിപ്പിൽ കുറിച്ചു.
താൻ എവിടെയായിരുന്നാലും തന്റെ കൂടെ താനുണ്ടെന്ന് ബപ്പ പറയുന്നതുപോലെയാണ് ആ നിമിഷത്തിൽ തോന്നിയതെന്ന് എയർ ഹോസ്റ്റസ് പറഞ്ഞു. “ഈ മനോഹരമായ അനുഗ്രഹത്തിനും, മറക്കാനാവാത്ത ഈ അനുഭവത്തിനും നന്ദി ബപ്പാ,” എന്ന് അവർ കുറിച്ചു. വിമാനത്തിലേക്ക് വിഗ്രഹം സ്വാഗതം ചെയ്യുന്നതും, സഹപ്രവർത്തകർ പുഞ്ചിരിയോടെ നോക്കിനിൽക്കെ വിമാനത്തിനുള്ളിൽ വെച്ച് പ്രാർത്ഥിക്കുന്നതും വീഡിയോയിൽ കാണാം.
ഈ വീഡിയോ സോഷ്യൽ മീഡിയയിൽ വൈറലാവുകയും ഇൻസ്റ്റാഗ്രാമിൽ 6.5 ദശലക്ഷത്തിലധികം ആളുകൾ കാണുകയും ചെയ്തു. ഭാദ്രപദ മാസത്തിലെ ശുക്ലപക്ഷ ചതുർത്ഥി തിഥിയിലാണ് ഗണേഷ് ചതുർത്ഥി ആഘോഷിക്കുന്നത്. പ്രാർത്ഥനകളോടെയും വഴിപാടുകളോടെയും ഭക്തർ ഗണപതിയെ തങ്ങളുടെ വീടുകളിലേക്കും പൊതു പന്തലുകളിലേക്കും സ്വീകരിക്കുന്നു.
