തെങ്ങിൻ തോപ്പുകൾ കാണുമ്പോൾ നമ്മളിൽ ഭൂരിഭാഗം ആളുകളുടെയും മനസ്സിലേക്ക് ആദ്യം ഓടിയെത്തുന്നത് കരിക്കിൻ വെള്ളമോ തേങ്ങാച്ചമ്മന്തിയോ ആയിരിക്കും. എന്നാൽ, തൃശൂർ ഏങ്ങണ്ടിയൂർ സ്വദേശിനിയായ സുമിള ജയരാജ് ഇതിൽ നിന്ന് വ്യത്യസ്തമായി ഒരു മികച്ച ബിസിനസ്സ് സാധ്യതയാണ് കണ്ടത്.
വെറുമൊരു വീട്ടമ്മയായിരുന്ന സുമിള, ഇന്ന് തേങ്ങയിൽ നിന്നുള്ള വൈവിധ്യമാർന്ന ഉൽപ്പന്നങ്ങൾ നിർമ്മിക്കുന്ന ‘ഗ്രീൻഓറ’ (Greenaura) എന്ന സ്ഥാപനത്തിന്റെ അമരക്കാരിയാണ്. അച്ചാറുകൾ, വെർജിൻ കോക്കനട്ട് ഓയിൽ, തേങ്ങാപ്പാൽ പൗഡർ, ചമ്മന്തിപ്പൊടി തുടങ്ങി നിരവധി ഉൽപ്പന്നങ്ങളാണ് ഗ്രീൻഓറ വിപണിയിലെത്തിക്കുന്നത്. ദി ബെറ്റർ ഇന്ത്യയുടെ റിപ്പോർട്ട് പ്രകാരം, പ്രതിമാസം ശരാശരി 20 ലക്ഷം രൂപയുടെ വിറ്റഴിവാണ് ഈ സ്ഥാപനത്തിനുള്ളത്. അമേരിക്ക, ഓസ്‌ട്രേലിയ, യുകെ, മലേഷ്യ തുടങ്ങിയ രാജ്യങ്ങളിലേക്കും ഇവിടുന്ന് ഉൽപ്പന്നങ്ങൾ കയറ്റുമതി ചെയ്യുന്നുണ്ട്.
സുവോളജിയിലും ഇംഗ്ലീഷ് സാഹിത്യത്തിലും ബിരുദം നേടിയ സുമിള വിവാഹശേഷം മുംബൈയിലേക്ക് മാറുകയും പിന്നീട് വർഷങ്ങൾക്ക് ശേഷം കേരളത്തിലേക്ക് തിരികെ എത്തുകയുമായിരുന്നു. ഭർത്താവ് ജോലി ആവശ്യത്തിനായി ദുബായിലേക്കും മക്കൾ പഠനാവശ്യത്തിനായി പുറത്തേക്കും പോയതോടെ സ്വന്തമായി ഒരു വ്യക്തിത്വം രൂപപ്പെടുത്താൻ സുമിള തീരുമാനിച്ചു. ഇതിനായി വെർജിൻ കോക്കനട്ട് ഓയിൽ നിർമ്മിക്കുന്ന ഒരു പ്രാദേശിക കമ്പനിയിൽ അവർ ജോലിക്ക് ചേർന്നു. അന്താരാഷ്ട്ര ഉപഭോക്താക്കളുമായി സംസാരിക്കാനും കമ്പനിയുടെ ആദ്യ ലണ്ടൻ കയറ്റുമതി ഓർഡർ ഉറപ്പാക്കാനും സുമിളയ്ക്ക് സാധിച്ചു.
ഈ ജോലി പരിചയമാണ് സുമിളയിലെ സംരംഭകയെ ഉണർത്തിയത്. താമസിയാതെ ജോലി രാജിവെച്ച് സ്വന്തം വീടിനോട് ചേർന്നുള്ള ചെറിയൊരു ഷെഡിൽ അവർ ഉൽപ്പന്ന നിർമ്മാണം ആരംഭിച്ചു. പോഷകഗുണങ്ങൾ നഷ്ടപ്പെടാത്ത രീതിയിൽ സെൻട്രിഫ്യൂഗൽ സാങ്കേതികവിദ്യ ഉപയോഗിച്ചാണ് അവർ വെർജിൻ കോക്കനട്ട് ഓയിൽ തയാറാക്കിയത്. തുടക്കത്തിൽ ബാങ്ക് വായ്പ ലഭിക്കുന്നതിലും ഉൽപ്പന്നങ്ങളുടെ പ്രചാരണത്തിലും നിരവധിയേറെ പ്രതിസന്ധികൾ നേരിട്ടെങ്കിലും അവർ പിന്മാറിയില്ല.
2021-ൽ ‘ഗ്രീൻഓറ’ എന്ന ബ്രാൻഡ് ഔദ്യോഗികമായി വിപണിയിലിറങ്ങി. വെളിച്ചെണ്ണയ്ക്ക് പുറമെ ചമ്മന്തിപ്പൊടി, അച്ചാറുകൾ, തേങ്ങ ചേർത്ത സാമ്പാർ പൊടി തുടങ്ങിയ ഉൽപ്പന്നങ്ങളിലേക്ക് കമ്പനി പ്രവർത്തനം വ്യാപിപ്പിച്ചു. തളരാത്ത നിശ്ചയദാർഢ്യം കൊണ്ട് ഒരു വീട്ടമ്മയിൽ നിന്ന് കോടികളുടെ വിറ്റഴിവുള്ള വിജയകരമായ ഒരു സംരംഭം കെട്ടിപ്പടുക്കാൻ സുമിളയ്ക്ക് സാധിച്ചു.
