നേപ്പാളിലെ ത്രിശൂലി താഴ്‌വരയിൽ ഉണ്ടായ ശക്തമായ പ്രളയത്തിനിടയിൽ ഭയന്നുവിറച്ച ആയിരത്തിലധികം സ്കൂൾ വിദ്യാർഥികളുടെ ജീവൻ രക്ഷിക്കാൻ പ്രിൻസിപ്പൽ കാണിച്ച ധീരത വാര്‍ത്തയാകുന്നു. 1,643 കുട്ടികളുടെ ജീവൻ രക്ഷിച്ച അധ്യാപകന്റെ മാതൃകാപരമായ ഈ തീരുമാനത്തെ ഏറെ ആദരവോടെയും സന്തുഷ്ടിയോടെയുമാണ് രക്ഷിതാക്കളും നാട്ടുകാരും സ്വാഗതം ചെയ്യുന്നത്.
ബുധനാഴ്ച രാവിലെ 9:20-ഓടെയാണ് നുവാകോട്ടിലെ ത്രിഭുവൻ ത്രിശൂലി സെക്കന്ററി സ്കൂൾ പ്രിൻസിപ്പലായ രാജേന്ദ്ര ദവാഡിക്ക് (47) ആപത്തിന്റെ വിവരമറിയിച്ചുകൊണ്ടുള്ള ഒരു ഫോൺ സന്ദേശം എത്തുന്നത്. ‘ആ പ്രദേശം മുഴുവൻ പ്രളയം കവർന്നു, വേഗം സുരക്ഷിത സ്ഥാനത്തേക്ക് മാറുക’ എന്നായിരുന്നു അത്. വെള്ളപ്പൊക്ക ഭീഷണിയുള്ള നദിയിൽ നിന്നും 60 മീറ്റർ ഉയരത്തിൽ സ്ഥിതി ചെയ്യുന്ന ശക്തമായ കോൺക്രീറ്റ് കെട്ടിടമായതിനാൽ സ്കൂൾ സുരക്ഷിതമായിരിക്കുമെന്നാണ് ഇംഗ്ലീഷ് അധ്യാപകൻ കൂടിയായ ദവാഡി ആദ്യം കരുതിയത്. എന്നാൽ വെള്ളം അതിവേഗം ഉയർന്നുവരികയാണെന്ന് ഒരു രക്ഷിതാവ് നേരിട്ടെത്തി മുന്നറിയിപ്പ് നൽകിയതോടെ പ്രിൻസിപ്പൽ ഉടനടി നടപടിയെടുക്കുകയായിരുന്നു.
അടിയന്തരമായി സ്കൂൾ ബെല്ലടിച്ച് എല്ലാ ക്ലാസുകളിൽ നിന്നും കുട്ടികളെ പുറത്തിറക്കി. പുറത്തുപോയ സ്കൂൾ ബസ് ഡ്രൈവർമാരെയെല്ലാം ഉടനടി തിരികെ വിളിച്ചു. പരിഭ്രാന്തരായ വിദ്യാർത്ഥികളെയും കൊണ്ട് അദ്ദേഹം തൊട്ടടുത്തുള്ള കുന്നിൻ മുകളിലേക്ക് ഓടുകയും, അവിടെയുണ്ടായിരുന്ന വലിയൊരു ആൽമരത്തിന്റെ തണലിൽ കുട്ടികളെ എല്ലാവരെയും സുരക്ഷിതരാക്കി നിർത്തുകയും ചെയ്തു. ഈ സമയത്തിനുള്ളിൽ തന്നെ കുതിച്ചെത്തിയ പ്രളയജലം അവരുടെ സ്കൂൾ കെട്ടിടങ്ങളെല്ലാം തകർത്തെറിഞ്ഞ് ഒഴുകിപ്പോയിരുന്നു.
പ്രിൻസിപ്പൽ ദവാഡിയുടെ കൃത്യസമയത്തെ സമയോചിതമായ ഇടപെടൽ വലിയൊരു ദുരന്തമാണ് ഒഴിവാക്കിയത്. എന്നാൽ, ഇതിനിടയിൽ പ്രഭാതഭക്ഷണം കഴിക്കാൻ മുറിയിലേക്ക് തിരികെ പോയ ഹിസ്റ്ററി അധ്യാപകൻ സന്തോഷ് പരിയാർ (32), സ്കൂളിന്റെ പ്രധാന വാതിലുകൾ പൂട്ടാൻ ശ്രമിച്ച ജീവനക്കാരൻ സുൽത്താൻ ലാമ എന്നിവർക്ക് വെള്ളപ്പൊക്കത്തിൽ ജീവൻ നഷ്ടമായി. സ്വന്തം ജീവൻ പണയം വെച്ചും ആയിരക്കണക്കിന് കുട്ടികളെ രക്ഷിച്ച ദവാഡിയെ ഒരു യഥാർത്ഥ നായകനായി വാഴ്ത്തുകയാണ് നാടൊട്ടുക്ക്.
