7 ഹവേഴ്‌സ് ടു ഗോ, ദി ഫൈനൽ എക്‌സിറ്റ്, ഗോസ്റ്റ്, തെലുങ്ക് ചിത്രമായ തഗ്ഗെഡെ ലെ തുടങ്ങിയ സിനിമകളിലൂടെ ശ്രദ്ധേയയായ നടി അനന്യ രാജ് (27) അന്തരിച്ചു. ജൂലൈ 15-ന് ഉറക്കത്തിലായിരുന്നു അനന്യയുടെ മരണം. കഴിഞ്ഞ ഒരു വർഷത്തിലേറെയായി അവർ ശാരീരികവും മാനസികവുമായ പ്രയാസങ്ങൾ നേരിടുകയായിരുന്നുവെന്നും കുടുംബം സ്ഥിരീകരിച്ചു.
ഓഗസ്റ്റ് 15-നാണ് അനന്യയുടെ ഇൻസ്റ്റാഗ്രാം അക്കൗണ്ടിലൂടെ കുടുംബം ഈ വിയോഗവാർത്ത പങ്കുവെച്ചതും ദുഃഖത്തിലായിരിക്കുന്ന ഈ സമയത്ത് സ്വകാര്യത അഭ്യർത്ഥിച്ചതും. “ഇത് അനന്യയുടെ കുടുംബമാണ്. വളരെ വിഷമത്തോടെയാണ് ഞങ്ങൾ ഈ വാർത്ത അറിയിക്കുന്നത്. ജൂലൈ 15-ന് പുലർച്ചെ അനന്യ അന്തരിച്ചു. ഉറക്കത്തിൽ ശാന്തമായാണ് അവൾ വിടവാങ്ങിയത്. ഒരു വർഷത്തിലേറെയായി ശാരീരികവും മാനസികവുമായ ബുദ്ധിമുട്ടുകളിലൂടെ കടന്നുപോകുകയായിരുന്നെങ്കിലും ഒരു യോദ്ധാവിനെപ്പോലെ അവൾ പോരാടി,” എന്ന് പ്രസ്താവനയിൽ പറയുന്നു.
അനന്യ ശക്തമായ മനോധൈര്യമുള്ള വ്യക്തിയായിരുന്നുവെന്ന് ഓർമ്മിച്ച കുടുംബം, എല്ലാവരോടും അവൾക്കായി പ്രാർത്ഥിക്കാൻ അഭ്യർത്ഥിക്കുകയും ചെയ്തു. “അവൾ ശക്തയായ പെൺകുട്ടിയായിരുന്നു, ഒരു റാണിയെപ്പോലെയാണ് ജീവിച്ചത്. നിന്റെ അഭാവം ഞങ്ങളെ ഏറെ വേദനിപ്പിക്കും. അവളുടെ ആത്മാവിനായി പ്രാർത്ഥിക്കാൻ ഞങ്ങൾ അഭ്യർത്ഥിക്കുന്നു. ഈ കഠിനമായ സമയത്ത് ഞങ്ങൾക്ക് സ്വകാര്യതയും സമാധാനവും നൽകുമെന്ന് കരുതുന്നു,” എന്ന് കുടുംബം കൂട്ടിച്ചേർത്തു.
മുംബൈയിൽ ജനിച്ചുവളർന്ന അനന്യ ഹിന്ദി ചലച്ചിത്രരംഗത്തും പ്രാദേശിക സിനിമകളിലും പ്രവർത്തിച്ചിട്ടുണ്ട്. സിനിമകളിലൂടെയും മ്യൂസിക് വീഡിയോകളിലൂടെയും കരിയർ ആരംഭിച്ച അവർ സിനിമാമേഖലയിൽ സ്വന്തമായി ഒരിടം കണ്ടെത്തി. 2016-ൽ പുറത്തിറങ്ങിയ ‘7 ഹവേഴ്‌സ് ടു ഗോ’ എന്ന ചിത്രത്തിലൂടെയാണ് ബോളിവുഡിൽ അരങ്ങേറ്റം കുറിച്ചത്. തുടർന്ന് 2017-ൽ ‘ദി ഫൈനൽ എക്‌സിറ്റ്’, 2019-ൽ ഹൊറർ ചിത്രമായ ‘ഗോസ്റ്റ്’ എന്നിവയിലും അഭിനയിച്ചു. സിനിമകൾക്ക് പുറമെ നിരവധി മ്യൂസിക് വീഡിയോകളിലും അഭിനയിച്ചിരുന്നു.
പ്രാദേശിക സിനിമകളിലും അനന്യ സാന്നിധ്യമറിയിച്ചു. 2022-ൽ ശ്രീനിവാസ രാജു സംവിധാനം ചെയ്ത ‘തഗ്ഗെഡെ ലെ’ എന്ന തെലുങ്ക് സസ്‌പെൻസ് ത്രില്ലറിലും അഭിനയിച്ചു. നവീൻ ചന്ദ്ര, ദിവ്യ പിള്ള, പി. രവിശങ്കർ എന്നിവരായിരുന്നു ഇതിലെ മറ്റ് പ്രധാന താരങ്ങൾ. ‘മദ്രാസി ഗാങ്’ എന്ന ത്രിഭാഷാ ചിത്രത്തിന്റെ ഭാഗമായും അവർ പ്രവർത്തിച്ചിട്ടുണ്ട്.
