നിസാര കാര്യങ്ങളുടെ പേരില്‍ വഴക്കിടുന്ന ദമ്പതികള്‍ ഉണ്ട്. അത്തരത്തില്‍ ഒരു ദമ്പതികളുടെ വാര്‍ത്തയാണ് കൗതുകകരമാകുന്നത്. ഉത്തര്‍പ്രദേശിലെ ആഗ്ര സ്വദേശിനികളാണ് ഈ ഭാര്യാ-ഭര്‍ത്താക്കന്മാര്‍. അഞ്ചുരൂപയുടെ കുര്‍കുറെ പാക്കറ്റ് വാങ്ങാന്‍ മറന്നുപോയ ഭര്‍ത്താവില്‍ നിന്ന് വിവാഹമോചനം വേണമെന്ന് ആവശ്യപ്പെടുകയായിരുന്നു ഭാര്യ. കഴിഞ്ഞ വര്‍ഷമാണ് ഇവര്‍ വിവാഹിതരായത്.
ദിവസവും കുര്‍കുറെ കഴിക്കുന്നയാളാണ് ഭാര്യ. ഇതിന്റെ പേരില്‍ ഭാര്യയും ഭര്‍ത്താവും തമ്മില്‍ എന്നും വഴക്കും ഉണ്ടാകാറുണ്ട്. ഒരു ദിവസം കുര്‍കുറെ വാങ്ങാന്‍ ഭര്‍ത്താവ് മറന്നുപോയതാണ് ഇപ്പോള്‍ വിവാഹമോചനത്തിലെത്തിച്ചത്. ഇതേച്ചൊല്ലി ഇരുവരും വാക്കുതര്‍ക്കത്തിലായി. തുടര്‍ന്ന് യുവതി ഭര്‍ത്താവിന്റെ വീടുവിട്ട് സ്വന്തം വീട്ടിലേക്ക് വന്നു. ശേഷം പോലീസില്‍ പരാതി നല്‍കിയ യുവതി തനിക്ക് ഭര്‍ത്താവില്‍ വിവാഹമോചനം വേണമെന്ന് ആവശ്യപ്പെടുകയായിരുന്നു.
സ്ഥിരമായി കുര്‍കുറെ കഴിക്കുന്ന യുവതിയുടെ ശീലമാണ് തങ്ങള്‍ക്കിടയിലെ തര്‍ക്കത്തിന് കാരണമെന്ന് ഭര്‍ത്താവ് പോലീസിനോട് പറഞ്ഞു. എന്നാല്‍ ഭര്‍ത്താവില്‍ നിന്നും ശാരീരിക പീഡനമുണ്ടായെന്നും അതിനാലാണ് വീടുവിട്ടിറങ്ങിയതെന്നുമാണ് യുവതിയുടെ പരാതിയില്‍ പറയുന്നത്. ആരോപണങ്ങളെപ്പറ്റി അന്വേഷിക്കുമെന്ന് പോലീസ് പറഞ്ഞു. ഇവരെ കൗണ്‍സിലിംഗിന് അയച്ചതായി ഷാഗഞ്ച് പോലീസ് അറിയിച്ചു. ഇവരുടെ പേരുവിവരങ്ങള്‍ വെളിപ്പെടുത്തിയിട്ടില്ല.
