ചൈനയുടെ തെക്കുകിഴക്ക് ഭാഗത്തുള്ള ഒരു ചെറിയ ഗ്രാമമാണ് പെങ്ടാവോ. ഈ ഗ്രാമം “പിഎച്ച്ഡി ഗ്രാമം” എന്ന് അറിയപ്പെടുന്നു. കാരണം ഈ ഗ്രാമത്തിൽ നിന്ന് മുപ്പതിലധികം ആളുകൾക്ക് ലോകത്തിലെ മികച്ച സർവ്വകലാശാലകളിൽ നിന്ന് ഡോക്ടറേറ്റ് ലഭിച്ചിട്ടുണ്ട്.
ഫുജിയാൻ പ്രവിശ്യയിലെ നാനൻ നഗരത്തിലാണ് ഈ ഗ്രാമം സ്ഥിതി ചെയ്യുന്നത്. ഒരു സ്കോളർഷിപ്പ് ചടങ്ങിന്റെ വീഡിയോ സോഷ്യൽ മീഡിയയിൽ വൈറലായതോടെയാണ് ഈ ഗ്രാമം ശ്രദ്ധ നേടിയത്. ഗുവോ ഫാമിലി എജ്യുക്കേഷൻ ഫണ്ടാണ് ഈ സ്കോളർഷിപ്പ് പരിപാടി സംഘടിപ്പിച്ചത്. ഇത് രണ്ടാമത്തെ തവണയാണ് ഇങ്ങനെയൊരു പരിപാടി നടക്കുന്നത്. സൗത്ത് ചൈന മോണിംഗ് പോസ്റ്റിന്റെ (SCMP) റിപ്പോർട്ട് അനുസരിച്ച്, ഈ വർഷത്തെ ചടങ്ങിൽ ഒരു പിഎച്ച്ഡി വിദ്യാർത്ഥിക്കും 15 പുതിയ മാസ്റ്റർ ബിരുദ വിദ്യാർത്ഥികൾക്കും സെപ്റ്റംബറിൽ 46 ബിരുദ വിദ്യാർത്ഥികൾക്കും സ്കോളർഷിപ്പ് ലഭിച്ചു.
ഗുവോ എജ്യുക്കേഷൻ ഫണ്ട് 2,17,000 യുവാൻ (ഏകദേശം 26 ലക്ഷം രൂപ) സ്കോളർഷിപ്പായി നൽകി. ഇതിൽ ഏറ്റവും ഉയർന്ന തുക 8,000 യുവാൻ (ഏകദേശം ഒരു ലക്ഷം രൂപ) ആയിരുന്നു. ഇതുവരെ ഈ ഗ്രാമത്തിൽ നിന്ന് 33 വിദ്യാർത്ഥികൾക്ക് ബ്രിട്ടനിലെ കേംബ്രിഡ്ജ് സർവ്വകലാശാല, യുഎസിലെ കോർണൽ സർവ്വകലാശാല എന്നിവയുൾപ്പെടെ ലോകമെമ്പാടുമുള്ള പ്രമുഖ സ്ഥാപനങ്ങളിൽ പിഎച്ച്ഡിക്ക് പ്രവേശനം ലഭിച്ചിട്ടുണ്ട്.
പെങ്ടാവോ ഗ്രാമത്തെക്കുറിച്ച്
പെങ്ടാവോ ഗ്രാമത്തിന് ഈ നേട്ടം എളുപ്പമായിരുന്നില്ല. ഏകദേശം 6,000 ആളുകൾ മാത്രം താമസിക്കുന്ന, വിദൂര മലയോര മേഖലയിലാണ് ഈ ഗ്രാമം സ്ഥിതി ചെയ്യുന്നത്. പണ്ട് സാമ്പത്തികമായി പിന്നോട്ട് നിന്നിരുന്ന ഇവർ കഷ്ടപ്പാടുകളിൽ നിന്ന് രക്ഷപ്പെടാനും ജീവിതം മെച്ചപ്പെടുത്താനും അക്കാദമിക് രംഗത്തെ വിജയം ഒരു വഴിയായി കണ്ടു. “വിദ്യാർത്ഥികളെ നമ്മുടെ രാജ്യത്തോടും ഗ്രാമത്തോടും സ്നേഹമുണ്ടാക്കാനും, നല്ല കാര്യങ്ങൾ ചെയ്യാനും, കഠിനാധ്വാനം ചെയ്യാനും പ്രേരിപ്പിക്കാനാണ് ഞങ്ങളുടെ സ്കോളർഷിപ്പ്,” എന്ന് ഗുവോ ഫാമിലി എജ്യുക്കേഷൻ ഫണ്ടിന്റെ ഡയറക്ടറായ ഗുവോ ഡോങ്യു പറഞ്ഞതായി SCMP റിപ്പോർട്ട് ചെയ്യുന്നു.
