ഐസിസി ട്വൻ്റി-20 ലോകകപ്പിൽ ഇന്ത്യയുമായി കളിക്കില്ലെന്ന പാക്കിസ്ഥാൻ്റെ തീരുമാനത്തോട് പരസ്യമായി വിയോജിപ്പ് പ്രകടിപ്പിച്ച് ബംഗ്ലാദേശ് രംഗത്തെത്തി. ലോകകപ്പിലെ ഏറ്റവും വലിയ വരുമാന സ്രോതസ്സായ ഇന്ത്യ-പാക്കിസ്ഥാൻ മത്സരം ബഹിഷ്കരിക്കുന്നത് ക്രിക്കറ്റ് ലോകത്തിന് വലിയ സാമ്പത്തിക നഷ്ടമുണ്ടാക്കുമെന്നും ആരാധകരെ നിരാശപ്പെടുത്തുമെന്നും ബംഗ്ലാദേശ് ക്രിക്കറ്റ് ബോർഡ് (BCB) അഭിപ്രായപ്പെട്ടു. തങ്ങൾക്കു വേണ്ടിയെന്ന പേരിൽ ഐസിസിക്കും പിസിബിക്കും ഇത്ര വലിയ സാമ്പത്തിക ആഘാതം പാക്കിസ്ഥാൻ വരുത്തിവെക്കേണ്ടതില്ലെന്നാണ് ബിസിബിയുടെ നിലപാട്.
ഇന്ത്യ-പാക്കിസ്ഥാൻ മത്സരം നടന്നില്ലെങ്കിൽ അത് ഐസിസിയുടെ വാർഷിക വിഹിതത്തിൽ കുറവുണ്ടാക്കുമെന്നും ഇത് ബംഗ്ലാദേശിനെപ്പോലുള്ള രാജ്യങ്ങളുടെ സാമ്പത്തിക ഭദ്രതയെ ബാധിക്കുമെന്നും ബിസിബി ഡയറക്ടർമാർ ചൂണ്ടിക്കാട്ടി. ഐസിസിയിലെ ഇന്ത്യയുടെ ആധിപത്യത്തെ ചോദ്യം ചെയ്യുക എന്ന നിലയിൽ പാക്കിസ്ഥാൻ്റെ തീരുമാനത്തിന് ചില ന്യായീകരണങ്ങൾ ഉണ്ടായേക്കാമെങ്കിലും, വരുമാന വിഹിതത്തെ ആശ്രയിച്ച് കഴിയുന്ന രാജ്യങ്ങൾക്ക് ഇത് വലിയ പ്രതിസന്ധിയാകും. കെനിയയെയും ഉഗാണ്ടയെയും പോലുള്ള ചെറിയ രാജ്യങ്ങളെപ്പോലെ കുറഞ്ഞ വരുമാനത്തിൽ ബംഗ്ലാദേശിന് മുന്നോട്ടുപോകാനാവില്ലെന്നും ബോർഡ് പ്രതിനിധികൾ വ്യക്തമാക്കി.
അതേസമയം, ഇന്ത്യയ്ക്കെതിരെ കളിക്കില്ലെന്ന ഉറച്ച നിലപാടിൽ മാറ്റമില്ലെന്ന് പാക് പ്രധാനമന്ത്രി ഷഹബാസ് ഷെരീഫ് ആവർത്തിച്ചു. നിലവിലെ സാഹചര്യത്തിൽ എടുത്ത ഏറ്റവും ഉചിതമായ തീരുമാനമാണിതെന്നാണ് പാക്കിസ്ഥാൻ്റെ വാദം. എന്നാൽ, ഇത്തരം നിലപാടുകൾ കായിക ലോകത്തിൻ്റെ വളർച്ചയെ തടസ്സപ്പെടുത്തുമെന്നും എല്ലാവർക്കും ഗുണകരമായ ഒരു പരിഹാരം ഉണ്ടാകുമെന്ന് പ്രതീക്ഷിക്കുന്നതായും ഐസിസി പ്രതികരിച്ചു.
ഫെബ്രുവരി 15ന് കൊളംബോയിലാണ് ഇന്ത്യ–പാക്കിസ്ഥാന് മല്സരം നിശ്ചയിച്ചിരുന്നത്. പിസിബിയും സര്ക്കാര് നിലപാടിനൊപ്പമാണ് നില്ക്കുന്നതെങ്കില് കളി മുടങ്ങുന്നതോടെ ബ്രോഡ്കാസ്റ്റര്മാര്ക്കുണ്ടാകുന്ന സാമ്പത്തിക നഷ്ടം നികത്താന് പാക്കിസ്ഥാന് ക്രിക്കറ്റ് ബോര്ഡിനോട് ആവശ്യപ്പെടുകയോ പാക്കിസ്ഥാന്റെ വാര്ഷിക വിഹിതം തടഞ്ഞു വയ്ക്കുകയോ ചെയ്യാനാണ് ഐസിസിയുടെ നിലവിലെ തീരുമാനമെന്നാണ് റിപ്പോര്ട്ടുകള് സൂചിപ്പിക്കുന്നത്.
