സംഘര്‍ഷത്തിനിടയില്‍ ഇസ്രായേലില്‍ കുടുങ്ങിയ ബോളിവുഡ് നടി നുസ്രത്ത് ബറൂച്ച സുരക്ഷിതയായി തിരിച്ചെത്തി. ഇന്ന് ഉച്ചയ്ക്ക് രണ്ടു മണിയൊടെ മുംബൈ വിമാനത്താവളത്തിലാണ് നടി ഇറങ്ങിയത്. ഏറെ നേരത്തെ ശ്രമത്തിനൊടുവില്‍ എംബസിയുടെ സഹായത്തോടെ നുസ്രത്തിനെ കണ്ടെത്താനും അവരുമായി ബന്ധപ്പെടാനും സാധിച്ചു. നടി സുരക്ഷിരമായി നാട്ടിലെത്തി.
നേരിട്ടുളള യാത്ര സാധ്യമല്ലാത്തതിനാല്‍ വിമാനങ്ങള്‍ മാറിക്കയറേണ്ടി വന്നു. സുരക്ഷാ കാരണങ്ങളാല്‍ കൂടുതല്‍ വിവരങ്ങള്‍ വെളിപ്പെടുത്താനാകില്ല. ഞങ്ങള്‍ക്ക് ആശ്വാസമായി ദൈവത്തിനു നന്ദി- നുസ്രത്തിന്റെ ടീം പ്രസ്താവനയില്‍ അറിയിച്ചു. നടി ഇസ്രായേലില്‍ കുടുങ്ങിയതായി ഞായറാഴ്ചയാണ് റിപ്പോര്‍ട്ട് വന്നത്.
സെപ്റ്റംബര്‍ 28 മുതല്‍ ഒക്ടോബര്‍ 7 വരെ നടന്ന ഹൈഫ ഇന്റര്‍നാഷണല്‍ ഫിലിം ഫെസ്റ്റിവലില്‍ പങ്കെടുക്കാനാണ് ബറൂച്ച ഇസ്രായേലിലേക്ക് പോയത്. അകേലി എന്ന സിനിമയുടെ ആദ്യ പ്രദര്‍ശനത്തിന്റെ ഭാഗമായാണ് അവര്‍ ഇസ്രയേലില്‍ എത്തിയത്.ഞങ്ങള്‍ക്ക് നുസ്രത്തുമായി ബന്ധപ്പെടാന്‍ കഴിഞ്ഞുവെന്നും എംബസിയുടെ സഹായത്തോടെ അവളെ സുരക്ഷിതമായി നാട്ടിലേക്ക് കൊണ്ടുവരികയാണെന്നും നുസ്രത്തിന്റെ പബ്ലിസിസ്റ്റ് ഒരു വാര്‍ത്താ ചാനലിനോട് അറിയിച്ചിരുന്നു. ഹമാസിന്റെ ആക്രമണത്തിനു പിന്നാലെ നടിയെ ബന്ധപ്പെടാന്‍ കഴിയാതിരുന്നത് ഏറെ ആശങ്ക സൃഷ്ടിച്ചിരുന്നു.
