കാറോടിച്ചാല്‍ കാന്‍സര്‍ വരുമോ? സീറ്റ് ഫോമില്‍ കാൻസർ ഉണ്ടാക്കുന്ന രാസവസ്തുക്കൾ; ഞെട്ടിക്കുന്ന റിപ്പോര്‍ട്ട് പുറത്ത്

ന്യൂഡൽഹി: കാറും കാന്‍സറും തമ്മില്‍ എന്തെങ്കിലും ബന്ധമുണ്ടോ? ഉണ്ടെന്നാണ് ചില പഠനങ്ങള്‍ സൂചിപ്പിക്കുന്നത്. കാറുകളിൽ കാണപ്പെടുന്ന കാൻസറിന് കാരണമാകുന്ന രാസവസ്തുക്കളെക്കുറിച്ചുള്ള ഗവേഷണം വേഗത്തിലാക്കാൻ നാഷണൽ ഗ്രീൻ ട്രൈബ്യൂണൽ (NGT) ഇന്ത്യൻ കൗൺസിൽ ഓഫ് മെഡിക്കൽ റിസർച്ചിന് (ICMR) നിർദ്ദേശം നൽകി. പഠനം പൂർത്തിയാക്കാൻ 18 മാസവും 85 ലക്ഷം രൂപയിലധികം ബജറ്റും വേണ്ടിവരുമെന്ന് ICMR ട്രൈബ്യൂണലിനെ അറിയിച്ചു.

99% കാറുകളിലും ടിസിഐപിപി (TCIPP) എന്ന ഫ്ലേം റിട്ടാർഡന്റ് (തീ പ്രതിരോധിക്കാൻ ചേർക്കുന്ന രാസവസ്തു) അടങ്ങിയിട്ടുണ്ടെന്ന് 2024-ലെ ഒരു പഠനത്തിൽ വെളിപ്പെട്ടതിനെത്തുടർന്നാണ് NGT സ്വമേധയാ കേസെടുത്തത്. ഈ രാസവസ്തു കാർസിനോജൻ (കാൻസർ ഉണ്ടാക്കാൻ സാധ്യതയുള്ള പദാർത്ഥം) സാധ്യതയുള്ളത് എന്ന നിലയിൽ യുഎസ് നാഷണൽ ടോക്സിക്കോളജി പ്രോഗ്രാമിന്റെ (US National Toxicology Program) അന്വേഷണത്തിലാണ്.

ഫ്ലേം റിട്ടാർഡന്റ് രാസവസ്തുക്കൾ വാഹനങ്ങൾക്കുള്ളിൽ എത്തുന്നതുമായി ബന്ധപ്പെട്ട ആരോഗ്യപ്രശ്നങ്ങളിലേക്കാണ് പഠനം വിരൽ ചൂണ്ടുന്നത്. പ്രത്യേകിച്ച് ഡ്രൈവർമാർക്കും കുട്ടികളായ യാത്രക്കാർക്കും ഇത് നാഡീസംബന്ധമായ (neurological)‌, പ്രത്യുൽപാദനപരമായ (reproductive) ദോഷങ്ങൾ ഉണ്ടാക്കാൻ സാധ്യതയുണ്ടെന്നും പഠനം എടുത്തുപറയുന്നു.

2024 മെയ് മാസത്തിൽ എൻവയോൺമെന്റൽ സയൻസ് & ടെക്നോളജി (Environmental Science & Technology) എന്ന ജേണലിൽ പ്രസിദ്ധീകരിച്ച ഒരു പഠനവും കാറുകളിൽ കാൻസറിന് കാരണമാകുന്ന രാസവസ്തുക്കളുടെ സാന്നിധ്യം സ്ഥിരീകരിച്ചു. വിശദമായ ശാസ്ത്രീയ പഠനം ICMR-നാഷണൽ ഇൻസ്റ്റിറ്റ്യൂട്ട് ഓഫ് ഒക്യുപ്പേഷണൽ ഹെൽത്ത് (അഹമ്മദാബാദ്) വഴി നടത്താൻ നിർദ്ദേശിച്ചിട്ടുണ്ടെന്ന് ജൂലൈ 22-ന് ICMR ഒരു അധിക സത്യവാങ്മൂലം സമർപ്പിച്ചിരുന്നു.

പഠനത്തിൽ, ഫ്ലേം റിട്ടാർഡന്റ് രാസവസ്തുക്കളുമായുള്ള സമ്പർക്കം കാരണം ഉണ്ടാകുന്ന ആരോഗ്യപ്രശ്നങ്ങൾ വിലയിരുത്തുന്നതിനായി ഡ്രൈവർമാരിൽ നിന്ന് ബയോളജിക്കൽ സാമ്പിളുകൾ (biological samples) ശേഖരിച്ച് വിശകലനം ചെയ്യും. പഠനത്തില്‍ പങ്കെടുക്കുന്നവരെ തിരഞ്ഞെടുക്കൽ, സാമ്പിൾ ശേഖരണം, ലബോറട്ടറി പരിശോധന, വിശകലനം, റിപ്പോർട്ടിംഗ് എന്നിവ ഉൾപ്പെടുന്ന ഈ ഗവേഷണം ‘സോൺ-സ്ട്രാറ്റിഫൈഡ് ബയോമോണിറ്ററിംഗ്’ (zone-stratified biomonitoring) സമീപനം ഉപയോഗിക്കും. പഠനം പൂർത്തിയാക്കാൻ ഏകദേശം 18 മാസം എടുക്കുമെന്നാണ് പ്രതീക്ഷിക്കുന്നത്,” ICMR പറയുന്നു. ഒരാഴ്ചയ്ക്കുള്ളിൽ പഠനം ആരംഭിക്കും

2015 നും 2022 നും ഇടയിൽ നിർമ്മിച്ച 101 ഇലക്ട്രിക്, ഗ്യാസ്, ഹൈബ്രിഡ് കാറുകളിലെ കാബിൻ എയർ ഗവേഷകർ വിശകലനം ചെയ്തു. 99% കാറുകളിലും ടിസിഐപിപി (TCIPP) എന്ന ഫ്ലേം റിട്ടാർഡന്റ് അടങ്ങിയിട്ടുണ്ടെന്ന് കണ്ടെത്തി. യുഎസ് നാഷണൽ ടോക്സിക്കോളജി പ്രോഗ്രാമിന്റെ ഗവേഷണത്തിലാണ് ഈ കണ്ടെത്തല്‍. മിക്ക കാറുകളിലും ടിഡിസിഐപിപി (TDCIPP), ടിസിഇപി (TCEP) എന്നീ മറ്റ് രണ്ട് ഫ്ലേം റിട്ടാർഡന്റുകളും ഉണ്ടായിരുന്നു, ഇവ കാർസിനോജെനിക് ആയി കണക്കാക്കപ്പെടുന്നവയാണ്.

ഫ്ലേം റിട്ടാർഡന്റുകൾ നാഡീസംബന്ധമായ, പ്രത്യുൽപാദനപരമായ ദോഷങ്ങളുമായും ബന്ധപ്പെട്ടിരിക്കുന്നു. ഒരു ഡ്രൈവർ ദിവസവും ശരാശരി ഒരു മണിക്കൂറോളം കാറിൽ ചെലവഴിക്കുന്നതിനാൽ ഇത് ഒരു പ്രധാന പൊതുജനാരോഗ്യ പ്രശ്നമാണെന്ന് പഠനം പറയുന്നു. ദൈർഘ്യമേറിയ യാത്രാസമയം ഉള്ള ഡ്രൈവർമാർക്കും മുതിർന്നവരെക്കാൾ കൂടുതൽ വായു ശ്വസിക്കുന്ന കുട്ടികളായ യാത്രക്കാർക്കും ഇത് കൂടുതല്‍ അപകടകരമാണ്. ചൂട് ഈ രാസവസ്തുക്കളുടെ അളവ് വർദ്ധിപ്പിക്കുന്നതിനാൽ, വേനൽക്കാലത്ത് വിഷാംശമുള്ള ഫ്ലേം റിട്ടാർഡന്റുകളുടെ അളവ് ഏറ്റവും ഉയർന്നതായിരുന്നെന്നും പഠനം പറയുന്നു.

കാബിൻ എയറിലെ കാൻസറിന് കാരണമാകുന്ന സംയുക്തങ്ങളുടെ ഉറവിടം സീറ്റ് ഫോം ആണെന്ന് ഗവേഷകർ കണ്ടെത്തിയതായി NGT നിരീക്ഷിച്ചു. തീപിടിത്തം തടയുന്നതിൽ തെളിയിക്കപ്പെട്ട ഒരു പ്രയോജനവുമില്ലാത്ത സീറ്റ് ഫോമിലും മറ്റ് വസ്തുക്കളിലും ഈ രാസവസ്തുക്കൾ കാർ നിർമ്മാതാക്കൾ ചേർക്കുന്നു. ദോഷകരമായ ഈ രാസവസ്തുക്കൾ ഉപയോഗിയ്ക്കുന്നത് തീപിടിത്തം തടയാൻ കാര്യമായി സഹായിക്കുന്നില്ല, പകരം തീപിടിത്തങ്ങളെ കൂടുതൽ പുക നിറഞ്ഞതും വിഷാംശമുള്ളതുമാക്കുന്നു,” പഠനം പറയുന്നു.