അഞ്ചുതവണ വീതം കപ്പടിച്ചിട്ടുള്ള ചെന്നൈ സൂപ്പര്കിംഗ്സും മുംബൈ ഇന്ത്യന്സും തമ്മിലുള്ള ഐപിഎല് കളത്തിലെ വൈരം ഇന്ത്യാ പാക് മത്സരം പോലെ വിശേഷിപ്പിക്കാം. ചെന്നൈ സൂപ്പര്കിംഗ്സിന്റെ തലയായ എം.എസ്. ധോണി ഐപിഎല് അടുത്ത സീസണില് മുംബൈ ഇന്ത്യന്സിന്റെ സ്റ്റാന്റില് കാണുമോ എന്നാണ് ഇപ്പോള് ആരാധകരുടെ സംശയം.
അദ്ദേഹത്തിന്റെ സ്വകാര്യ ജീവിതത്തില് നിന്നുള്ള ഒരു അപൂര്വ ചിത്രം സോഷ്യല് മീഡിയയില് തരംഗമായതോടെയാണ് ചര്ച്ചയായത്.
ചെന്നൈ സൂപ്പര് കിംഗ്സ് ഇതിഹാസം മുംബൈ ഇന്ത്യന്സ് സുഹൃത്തുക്കളോടൊപ്പം ഫുട്ബോള് കളിക്കുന്ന ദൃശ്യങ്ങളാണ് വൈറലായത്. 44 വയസ്സുള്ള അദ്ദേഹം 2026-ലെ ഇന്ത്യന് പ്രീമിയര് ലീഗ് കളിക്കുമോ എന്ന ആകാംക്ഷ നിലനില്ക്കുന്നതിനിടയിലാണ് ഈ ചിത്രങ്ങള് പുറത്തുവന്നത്. മുംബൈ ഇന്ത്യന്സിന്റെ ജേഴ്സി ധരിച്ചാണ് ധോണിയെ കണ്ടത്.
ചിത്രം ഇന്റര്നെറ്റില് വ്യാപകമായി പ്രചരിക്കുകയും ഇരു ടീമുകളുടെയും ആരാധകര് പ്രതികരിക്കുകയും ചെയ്തു. 2008-ലെ ഉദ്ഘാടന സീസണ് മുതല് ധോണി സിഎസ്കെയുടെ ഭാഗമാണ്. ഫ്രാഞ്ചൈസി കളിച്ച എല്ലാ സീസണുകളിലും അദ്ദേഹം ടീമിനായി കളിച്ചു. എന്നിരുന്നാലും, ചെന്നൈ ആസ്ഥാനമായുള്ള ഫ്രാഞ്ചൈസിയെ സസ്പെന്ഡ് ചെയ്ത 2016-ലും 2017-ലും അദ്ദേഹം റൈസിംഗ് പൂനെ സൂപ്പര്ജയന്റ്സിനുവേണ്ടിയും കളിച്ചിട്ടുണ്ട്.
2008-ലെ ആദ്യ ലേലത്തില് ധോണിയെ സ്വന്തമാക്കാന് മുംബൈ ഇന്ത്യന്സ് ശ്രമിച്ചിരുന്നു എന്നത് പ്രസിദ്ധമാണ്. ഇന്ത്യന് ക്രിക്കറ്റ് ഇതിഹാസത്തിനായി ഫ്രാഞ്ചൈസി അവസാനം വരെ ലേലം വിളിച്ചു. എന്നാല്, അന്ന് ലേലത്തിലെ ഏറ്റവും വിലയേറിയ കളിക്കാരനായി, റെക്കോര്ഡ് തുകയായ 1.5 മില്യണ് ഡോളറിന് (ഏകദേശം 6 കോടി രൂപ) സിഎസ്കെ ധോണിയെ സ്വന്തമാക്കി.
സിഎസ്കെ കളിച്ച 277 മത്സരങ്ങളില് 244 എണ്ണത്തിലും ധോണി ടീമിനെ നയിച്ചു. അഞ്ച് ഐപിഎല് കിരീടങ്ങളിലേക്കും രണ്ട് ചാമ്പ്യന്സ് ലീഗ് ടി20 ട്രോഫികളിലേക്കും അദ്ദേഹം ടീമിനെ നയിച്ചു. ഒരു ടീമിനൊപ്പം ഒരു ക്യാപ്റ്റന് നേടുന്ന ഏറ്റവും കൂടുതല് ടി20 കിരീടങ്ങളാണിത്. 5 ഐപിഎല് കിരീടങ്ങളും ഒരു സിഎല്ടി20 കിരീടവും നേടിയ രോഹിത് ശര്മ്മയെ (6)ക്കാള് മുന്നിലാണ് ഈ നേട്ടത്തില് ധോണി.
2019 ജൂലൈയില് ഇന്ത്യക്ക് വേണ്ടി അവസാനമായി കളിച്ച ശേഷം 2020-ല് അന്താരാഷ്ട്ര ക്രിക്കറ്റില് നിന്ന് വിരമിച്ചെങ്കിലും, ധോണി ഐപിഎല്ലില് കളിക്കുന്നത് തുടര്ന്നു. ലീഗിലെ ഏറ്റവും പ്രായം കൂടിയ സജീവ കളിക്കാരനാണ് അദ്ദേഹം. കഴിഞ്ഞ കുറച്ച് വര്ഷങ്ങളായി അദ്ദേഹത്തിന്റെ കളി തുടരുന്നതിനെക്കുറിച്ച് ഊഹാപോഹങ്ങള് നിലനില്ക്കുന്നുണ്ട്. 2025 ഐപിഎല് അവസാനിച്ചതിന് ശേഷം, അടുത്ത ലേലത്തോട് അടുത്ത് തന്റെ തീരുമാനം അറിയിക്കുമെന്ന് ധോണി പറഞ്ഞിരുന്നു.
