പ്രണയബന്ധത്തെ എതിർത്ത പിതാവിനെ ഉറക്കഗുളിക കൊടുത്ത് മയക്കി മകള്, പിന്നാലെയെത്തിയ കാമുകന് അയാളെ കുത്തിക്കൊന്നു. ഗുജറാത്തിലെ വഡോദരയിലാണ് സംഭവം. 45കാരനായ ഷന ചാവ്ഡയാണ് കൊല്ലപ്പെട്ടത്. ഫോൺ കോളിനോട് പ്രതികരിക്കാതായതിനെ തുടർന്ന് സഹോദരൻ അന്വേഷിച്ചുവന്നപ്പോൾ ഷന ചാവ്ഡ മരിച്ചു കിടക്കുന്നതാണ് കണ്ടത്.
ഷന ചാവ്ഡയുടെ 17 വയസ്സ് പ്രായമുള്ള മകൾ 25 കാരനായ രഞ്ജിത്ത് വഘേല എന്ന യുവാവുമായി പ്രണയത്തിലായിരുന്നു. മകൾ പ്രായപൂർത്തിയാകാത്തതിനാൽ പിതാവ് പ്രണയത്തെ എതിർത്തു. ഇതേത്തുടർന്ന് മകൾക്കും ആൺസുഹൃത്തിനും ഷന ചാവ്ഡയോട് പകയുണ്ടായിരുന്നു.
വിഷം നൽകി കൊലപ്പെടുത്താനുള്ള മുൻപത്തെ പരാജയപ്പെട്ട ശ്രമങ്ങളും, നിലവിലുണ്ടായിരുന്ന പോക്സോ (POCSO) കേസും കേന്ദ്രീകരിച്ച് നടത്തിയ അന്വേഷണത്തിലാണ് ഞെട്ടിക്കുന്ന വിവരങ്ങൾ പുറത്തുവന്നത്.
ആസൂത്രിതമായ കൊലപാതകം
പോലീസ് നൽകുന്ന വിവരമനുസരിച്ച് പെൺകുട്ടിയുടെ കാമുകനായ രഞ്ജിത്തും സുഹൃത്തായ മഹേഷും ചേർന്നാണ് കൊലപാതകം നടത്തിയത്. പിതാവിന് ഉറക്കഗുളിക നൽകി അബോധാവസ്ഥയിലാക്കിയ ശേഷം വകവരുത്താനായിരുന്നു ഇവരുടെ പദ്ധതി.
സംഭവം നടന്ന രാത്രിയിൽ പെൺകുട്ടി പിതാവിന്റെ ഭക്ഷണത്തിൽ ഉറക്കഗുളിക കലർത്തി. അദ്ദേഹം അബോധാവസ്ഥയിലായതോടെ പുലർച്ചെ 2:30-ഓടെ രഞ്ജിത്തും സുഹൃത്തും വീടിനുള്ളിൽ കടന്നു. ഉറങ്ങിക്കിടക്കുകയായിരുന്ന പിതാവിനെ മൂന്ന് തവണ കുത്തി മരണം ഉറപ്പാക്കിയ ശേഷം ഇവർ രക്ഷപ്പെട്ടു. തന്റെ ലക്ഷ്യത്തിന് തടസ്സമായി നിന്ന പിതാവിന്റെ മരണം പെൺകുട്ടി ജനലിലൂടെ നോക്കി നിൽക്കുകയായിരുന്നുവെന്ന് പോലീസ് പറഞ്ഞു.
മുൻപും മാതാപിതാക്കളെ വിഷം കൊടുത്ത് കൊല്ലാൻ പെണ്കുട്ടി ശ്രമിച്ചിട്ടുണ്ട്. കൊലപാതകത്തിന് രണ്ട് ദിവസം മുമ്പ് ഉറക്കഗുളിക കലർത്തി ഇരുവരെയും കൊല്ലാൻ ശ്രമിച്ചു. പക്ഷേ ആ പദ്ധതി പരാജയപ്പെട്ടു. കൊലപാതകം നടന്ന ദിവസം ഉറക്ക ഗുളിക കലർത്തിയ വെള്ളം അമ്മ തുപ്പിക്കളഞ്ഞതിനാൽ അവർ രക്ഷപ്പെടുകയായിരുന്നു.
പകയ്ക്ക് പിന്നിലെ കാരണം
പെൺകുട്ടിയുടെ പ്രണയബന്ധത്തെ പിതാവ് ശക്തമായി എതിർത്തിരുന്നു. ഭാര്യയെയും മകളെയും മുറിക്കുള്ളിലാക്കി പുറത്തുനിന്ന് പൂട്ടുന്ന രീതിയിലുള്ള കർശന നിയന്ത്രണങ്ങൾ അദ്ദേഹം ഏർപ്പെടുത്തിയിരുന്നു. ഇതിലുണ്ടായ കടുത്ത പകയാണ് കൊലപാതകത്തിലേക്ക് നയിച്ചതെന്ന് കരുതപ്പെടുന്നു.
നേരത്തെ, പെൺകുട്ടിയെ തട്ടിക്കൊണ്ടുപോയതിന് രഞ്ജിത്തിനെതിരെ പിതാവ് പരാതി നൽകിയിരുന്നു. തുടർന്ന് പോക്സോ നിയമപ്രകാരം അറസ്റ്റിലായ ഇയാൾ ജാമ്യത്തിൽ ഇറങ്ങിയ ശേഷമാണ് പെൺകുട്ടിയുമായി വീണ്ടും ബന്ധം സ്ഥാപിച്ചതും കൊലപാതകം ആസൂത്രണം ചെയ്തതും.
നിലവിൽ പ്രായപൂർത്തിയാകാത്ത പെൺകുട്ടിയെയും കാമുകൻ രഞ്ജിത്തിനെയും സുഹൃത്ത് മഹേഷിനെയും പോലീസ് അറസ്റ്റ് ചെയ്തിട്ടുണ്ട്. പ്രതികൾക്ക് ഉറക്കഗുളിക എവിടെ നിന്ന് ലഭിച്ചു എന്നും കൊലപാതകത്തിന് ഉപയോഗിച്ച ആയുധം കണ്ടെത്താനുമുള്ള ശ്രമത്തിലാണ് പോലീസ്.
