രക്തബന്ധവും വിവാഹബന്ധവും പ്രണയവും ഇഴചേർന്ന്, രണ്ട് കുടുംബങ്ങളെ ഞെട്ടിച്ചുകൊണ്ട്, രാജസ്ഥാനിലെ ശ്രീഗംഗാനഗർ ജില്ലയിൽ നവവധു ഭർത്താവിനെ കൊലപ്പെടുത്തി. ‘രാജസ്ഥാൻ ഹണിമൂൺ കൊലപാതകം’ എന്ന് വിളിക്കപ്പെടുന്ന ഈ സംഭവത്തിൽ, കാമുകന്റെയും സുഹൃത്തുക്കളുടെയും സഹായത്തോടെയാണ് യുവതി ഭർത്താവിനെ വകവരുത്തിയത്.
സാദുൽഷഹർ സ്വദേശിനിയായ അഞ്ജലി (23) ആശിഷും (27) തമ്മിലുള്ള വിവാഹം മൂന്ന് മാസം മുമ്പാണ് നടന്നത്. ജിയോളജിയിൽ എം.എസ്സി പൂർത്തിയാക്കി ബി.എഡിന് പഠിക്കുകയായിരുന്നു ആശിഷ്. അഞ്ജലി എം.കോം വിദ്യാർത്ഥിനിയായിരുന്നു. അടുത്ത ബന്ധുക്കളായ ഇരു കുടുംബങ്ങളും തമ്മിലുള്ള ഊഷ്മളമായ ബന്ധം അവസാനം ഈ വിവാഹത്തിലെത്തി.
കുട്ടിക്കാലത്ത് തന്നെ സ്വന്തമായി ആൺമക്കളില്ലാത്ത അമ്മാവനും അമ്മായിയുമാണ് ആശിഷിനെ ദത്തെടുത്ത് വളർത്തിയത്. മകനായി വളർത്തിയ ആശിഷിനായി അമ്മായി തന്നെയാണ് സ്വന്തം അനന്തരവളായ അഞ്ജലിയെ വിവാഹം ആലോചിച്ചത്. ജനുവരി 30-ന് നടന്ന ദാരുണമായ സംഭവം വിശ്വസിക്കാനാകാതെ തകർന്നിരിക്കുകയാണ് ആശിഷിന്റെ കുടുംബം.
സംഭവദിവസം വൈകുന്നേരം ആശിഷും അഞ്ജലിയും ആശിഷിന്റെ കസിൻ അങ്കിതിനും ഭാര്യയ്ക്കുമൊപ്പം നടക്കാൻ ഇറങ്ങിയതായിരുന്നു. “ഞങ്ങൾ സാധാരണയായി വിജനമായ വഴികളിലൂടെ പോകാറില്ല. അന്ന് ആശിഷ് എന്നെയും ഭാര്യയെയും വീട്ടിലാക്കി മടങ്ങി. എന്നാൽ അഞ്ജലിയുടെ നിർബന്ധത്തിന് വഴങ്ങിയാണ് അവർ ആ വിജനമായ പാത തിരഞ്ഞെടുത്തത്,” അങ്കിത് പറയുന്നു.
പിന്നീട് ആശിഷിനെയും അഞ്ജലിയെയും ബോധരഹിതരായ നിലയിൽ കണ്ടെത്തുകയായിരുന്നു. ഒരു വാഹനാപകടമാണെന്നാണ് ആദ്യം എല്ലാവരും കരുതിയത്. ആശുപത്രിയിൽ എത്തിച്ചപ്പോഴേക്കും ആശിഷ് മരിച്ചിരുന്നു. ബോധം തെളിയുമ്പോഴെല്ലാം തന്റെ സ്വർണാഭരണങ്ങൾ കവർന്നുവെന്ന് അഞ്ജലി മൊഴി നൽകി.
എന്നാൽ ആശിഷിന്റെ ശരീരത്തിലെ പരിക്കുകളും അഞ്ജലിയുടെ മൊഴികളിലെ വൈരുദ്ധ്യവും പൊലീസിൽ സംശയമുണ്ടാക്കി. തുടർന്ന് നടത്തിയ അന്വേഷണത്തിലാണ് ഞെട്ടിക്കുന്ന വിവരങ്ങൾ പുറത്തുവന്നത്. വിവാഹത്തിന് മുൻപുള്ള കാമുകൻ സഞ്ജുവുമായി അഞ്ജലി ബന്ധം പുതുക്കിയിരുന്നു. കല്യാണ പരിപാടികളിൽ വെയ്റ്ററായി ജോലി ചെയ്യുന്നയാളാണ് സഞ്ജു.
സഞ്ജുവും രണ്ട് സുഹൃത്തുക്കളും റോഡരികിലെ കുറ്റിക്കാട്ടിൽ ഒളിച്ചിരിക്കുകയായിരുന്നു. അഞ്ജലിയും ആശിഷും അവിടെ എത്തിയപ്പോൾ അവർ ആശിഷിനെ ആക്രമിക്കുകയും കഴുത്ത് ഞെരിച്ച് കൊലപ്പെടുത്തുകയും ചെയ്തു. തുടർന്ന് ഇതൊരു വാഹനാപകടമായി ചിത്രീകരിക്കാൻ ശ്രമിച്ചു. കൃത്യത്തിന് ശേഷം അഞ്ജലി തന്റെ കമ്മലുകൾ സഞ്ജുവിന് നൽകി. പൊലീസ് എത്തിയപ്പോൾ ബോധരഹിതയായതുപോലെ അഭിനയിച്ച് കിടക്കുകയും ചെയ്തു.
‘അവൾക്ക് വധശിക്ഷ നൽകണം’
ആശിഷിന്റെ ഗ്രാമവാസികൾ കടുത്ത രോഷത്തിലാണ്. ആഡംബരപൂർവ്വം നടന്ന വിവാഹത്തിന്റെ ഓർമ്മകൾ മായും മുൻപേ ഉണ്ടായ ഈ കൊലപാതകം അവരെ തളർത്തിയിരിക്കുന്നു. “അഞ്ജലി വീട്ടിൽ എല്ലാവരോടും വളരെ സാധാരണമായാണ് പെരുമാറിയിരുന്നത്. കൊലപാതകത്തിന് ശേഷം അവൾ ബോധംകെട്ടതായി അഭിനയിച്ചു,” ആശിഷിന്റെ പിതാവ് രാംറഖ് ഓർക്കുന്നു. അവൾക്ക് വധശിക്ഷ തന്നെ നൽകണമെന്ന് അദ്ദേഹം ആവശ്യപ്പെട്ടു. അഞ്ജലിയുടെ കുടുംബവും ഇതേ അഭിപ്രായക്കാരാണ്.
നാണക്കേടിൽ അഞ്ജലിയുടെ കുടുംബം
കഴിഞ്ഞ 40 വർഷമായി സാദുൽഷഹറിൽ താമസിക്കുന്ന അഞ്ജലിയുടെ കുടുംബം വലിയ നാണക്കേടിലാണ്. 13 വർഷം മുമ്പ് പിതാവ് മരിച്ച അഞ്ജലി, അമ്മയ്ക്കും സഹോദരങ്ങൾക്കുമൊപ്പമാണ് താമസിച്ചിരുന്നത്. പഠിക്കാനെന്ന വ്യാജേന വിവാഹശേഷം അവൾ കുറച്ചുനാൾ സ്വന്തം വീട്ടിൽ നിന്നിരുന്നു. ഈ സമയത്താണ് സഞ്ജുവുമായി വീണ്ടും അടുപ്പത്തിലായതെന്ന് കരുതപ്പെടുന്നു.
“ഞങ്ങൾ തകർന്നുപോയി. 50 വർഷമായി ആ കുടുംബവുമായി ഞങ്ങൾക്ക് ബന്ധമുണ്ട്. സഞ്ജുവിനെ കുറിച്ച് ഞങ്ങൾക്ക് അറിയില്ലായിരുന്നു. അറിഞ്ഞിരുന്നെങ്കിൽ ഈ വിവാഹം നടത്തുമായിരുന്നില്ല,” അഞ്ജലിയുടെ അമ്മാവൻ പറഞ്ഞു. അഞ്ജലിക്കും കൂട്ടുപ്രതികൾക്കും വധശിക്ഷ നൽകണമെന്നാണ് അവരുടെയും ആവശ്യം.
വൈരുദ്ധ്യങ്ങൾ നിറഞ്ഞ ബന്ധം
ഉയർന്ന വിദ്യാഭ്യാസവും സാമ്പത്തിക ഭദ്രതയുമുള്ള ആശിഷിനെ ഉപേക്ഷിച്ച്, തുച്ഛമായ വരുമാനമുള്ള സഞ്ജുവിനെ അഞ്ജലി തിരഞ്ഞെടുത്തത് നാട്ടുകാരെയും അത്ഭുതപ്പെടുത്തി. ക്രിമിനൽ പശ്ചാത്തലമില്ലാത്ത സഞ്ജുവും സുഹൃത്തുക്കളായ റോക്കിയും ബാദലും ഇപ്പോൾ പൊലീസ് കസ്റ്റഡിയിലാണ്
