കാനഡയിലെ എഡ്മന്റണിലുള്ള ആശുപത്രിയിൽ അടിയന്തര ചികിത്സയ്ക്കായി എട്ട് മണിക്കൂറോളം കാത്തിരുന്ന 44 വയസ്സുകാരനായ ഇന്ത്യൻ വംശജൻ മരിച്ചു. ഈ ദാരുണ സംഭവം കാനഡയിലെ അടിയന്തര ആരോഗ്യ സേവനങ്ങളുടെ മെല്ലെപ്പോക്കിനെക്കുറിച്ച് വലിയ ചോദ്യങ്ങൾ ആരോഗ്യരംഗത്ത് ഉയർത്തിയിരിക്കുകയാണ്.
മൂന്ന് കുട്ടികളുടെ പിതാവായ പ്രശാന്ത് ശ്രീകുമാർ ആണ് മരിച്ചത്. ഡിസംബർ 22 തിങ്കളാഴ്ച ജോലിസ്ഥലത്ത് വെച്ചാണ് അദ്ദേഹത്തിന് കഠിനമായ നെഞ്ചുവേദന അനുഭവപ്പെട്ടത്. തുടർന്ന് ഒരു സുഹൃത്താണ് അദ്ദേഹത്തെ സൗത്ത് ഈസ്റ്റ് എഡ്മന്റണിലെ ഗ്രേ നൺസ് (Grey Nuns) ഹോസ്പിറ്റലിൽ എത്തിച്ചത്. അവിടെ ട്രയാജ് (triage) വിഭാഗത്തിൽ പേര് രജിസ്റ്റർ ചെയ്ത ശേഷം എമർജൻസി റൂമിൽ കാത്തിരിക്കാൻ അദ്ദേഹത്തോട് ആവശ്യപ്പെട്ടു.
8 മണിക്കൂർ നീണ്ട ദുരിതം
തന്റെ വേദനയുടെ തീവ്രത സഹിക്കാവുന്നതിലും അപ്പുറമാണെന്ന് പ്രശാന്ത് പലതവണ ആശുപത്രി ജീവനക്കാരോട് പറഞ്ഞു. സ്ഥലത്തെത്തിയ അദ്ദേഹത്തിന്റെ പിതാവ് കുമാർ ശ്രീകുമാറും മകന്റെ അവസ്ഥയുടെ ഗൗരവം അധികൃതരെ ബോധ്യപ്പെടുത്താൻ ശ്രമിച്ചു. ഹൃദയത്തിന്റെ പ്രവർത്തനം പരിശോധിക്കാൻ ഇസിജി എടുത്തുവെങ്കിലും, കാര്യമായ പ്രശ്നങ്ങളൊന്നുമില്ലെന്നും കാത്തിരിക്കാനുമാണ് ആശുപത്രി അധികൃതർ അറിയിച്ചതെന്ന് കുടുംബം ആരോപിക്കുന്നു.
കാത്തിരിപ്പിനിടയിൽ നഴ്സുമാർ ഇടയ്ക്കിടെ രക്തസമ്മർദ്ദം പരിശോധിച്ചിരുന്നു. എന്നാൽ രക്തസമ്മർദ്ദം ക്രമാതീതമായി വർദ്ധിച്ചുകൊണ്ടിരുന്നത് തനിക്ക് ഭയമുണ്ടാക്കിയതായി പിതാവ് ഓർക്കുന്നു. ഇത്രയേറെ ഗുരുതരാവസ്ഥയിലായിട്ടും എട്ട് മണിക്കൂറിലധികം കഴിഞ്ഞാണ് പ്രശാന്തിനെ ചികിത്സാ മുറിയിലേക്ക് വിളിച്ചത്.
ദൗർഭാഗ്യവശാൽ, ചികിത്സാ മുറിയിൽ പ്രവേശിച്ച ഉടൻ തന്നെ പ്രശാന്ത് കുഴഞ്ഞുവീണു. “അവിടെ ഇരുന്ന ശേഷം വെറും പത്ത് സെക്കൻഡ് കഴിഞ്ഞപ്പോൾ അവൻ എന്നെ നോക്കി, എഴുന്നേറ്റു, നെഞ്ചിൽ കൈവെച്ചു, പെട്ടെന്ന് നിലത്തേക്ക് വീണു,” പിതാവ് വേദനയോടെ പറഞ്ഞു. മെഡിക്കൽ സംഘം ഉടൻ തന്നെ തീവ്രശ്രമം നടത്തിയെങ്കിലും അദ്ദേഹത്തിന്റെ ജീവൻ രക്ഷിക്കാനായില്ല. ഹൃദയസ്തംഭനമാണ് മരണകാരണമെന്നാണ് റിപ്പോർട്ട്.
ഭാര്യയും മൂന്ന് മക്കളുമടങ്ങുന്നതാണ് പ്രശാന്തിന്റെ കുടുംബം. കവനന്റ് ഹെൽത്ത് (Covenant Health) എന്ന സ്ഥാപനമാണ് ഗ്രേ നൺസ് ഹോസ്പിറ്റൽ നടത്തുന്നത്. രോഗിയുടെ സ്വകാര്യത മാനിച്ച് കൂടുതൽ കാര്യങ്ങൾ വെളിപ്പെടുത്താൻ കഴിയില്ലെന്നും എന്നാൽ സംഭവത്തെക്കുറിച്ച് ചീഫ് മെഡിക്കൽ എക്സാമിനറുടെ ഓഫീസ് അന്വേഷണം നടത്തുന്നുണ്ടെന്നും ആശുപത്രി അധികൃതർ അറിയിച്ചു. കുടുംബത്തിന്റെ ദുഃഖത്തിൽ പങ്കുചേരുന്നതായും രോഗികളുടെ സുരക്ഷയ്ക്കാണ് തങ്ങൾ മുൻഗണന നൽകുന്നതെന്നും അവർ പ്രസ്താവനയിൽ പറഞ്ഞു.
