‘ഇന്ത്യ തുടക്കക്കാർക്കുള്ളതല്ല എന്ന വാചകത്തെ വീണ്ടും അന്വർത്ഥമാക്കുന്ന തരത്തിലുള്ള ഒരു അസാധാരണ സംഭവമാണ് ഇപ്പോൾ സോഷ്യൽ മീഡിയയിൽ ശ്രദ്ധ നേടുന്നത്. തിരക്കേറിയ ഒരു റോഡിന് നടുവിൽ ഒരു കാളയുടെ വയറ്റിൽ തലവെച്ച് വളരെ സുഖമായി ഉറങ്ങുന്ന ഒരു മനുഷ്യന്റെ വീഡിയോയാണ് ഓൺലൈനിൽ പ്രചരിക്കുന്നത്. ആ വഴിയിലൂടെ പോയ ഒരു വാഹനയാത്രക്കാരനാണ് റോഡിലെ ഈ അപൂർവ്വ ദൃശ്യം തന്റെ ക്യാമറയിൽ പകർത്തിയത്. ഒരു ദിവസത്തെ കഠിനാധ്വാനത്തിന് ശേഷം വിശ്രമിക്കാൻ പറ്റിയ ഏറ്റവും സുരക്ഷിതമായ സ്ഥലം ഇതാണെന്ന മട്ടിൽ, യാതൊരുവിധ ഭയവുമില്ലാതെ തികച്ചും ശാന്തമായാണ് ആ കാളയും മനുഷ്യനും അവിടെ കിടന്നിരുന്നത്.
വീഡിയോ വൈറലായതോടെ നിരവധി ആളുകളാണ് പ്രതികരണങ്ങളുമായി രംഗത്തെത്തിയത്. ഭൂരിഭാഗം ആളുകൾക്കും ഇത് തികച്ചും തമാശയായി തോന്നിയപ്പോൾ, മറ്റു ചിലർ തിരക്കേറിയ റോഡിൽ ഇവർ വരുത്തിവെക്കുന്ന സുരക്ഷാപ്രശ്നങ്ങളെക്കുറിച്ചാണ് ആശങ്ക പങ്കുവെച്ചത്. ഇന്ത്യയിൽ മാത്രമാവും ഇത്തരം കാഴ്ചകൾ കാണാൻ സാധിക്കുകയെന്നും പലരും അഭിപ്രായപ്പെട്ടു. ‘ടരുൺസ്പീക്സ്’ എന്ന എക്സ് (ട്വിറ്റർ) അക്കൗണ്ടിലൂടെ പങ്കുവെച്ച ഈ വീഡിയോ ഇതിനോടകം തന്നെ അഞ്ച് ലക്ഷത്തിലധികം ആളുകൾ കണ്ടുകഴിഞ്ഞു.
റോഡിന് നടുവിൽ ഇത്രയും സുഖമായി കിടന്നുറങ്ങാൻ ഇന്ത്യയിലല്ലാതെ മറ്റെവിടെ സാധിക്കുമെന്നാണ് ഒരു ഉപയോക്താവ് കുറിച്ചത്. റോഡിന് നടുവിൽ ഒരു കാള കിടന്നുറങ്ങുന്നത് ഇന്ത്യയിൽ അത്ര സാധാരണമായതുകൊണ്ടാണ്, ഇപ്പോൾ അതിന് മുകളിൽ കിടക്കുന്ന മനുഷ്യൻ ഒരു അത്ഭുതമായി തോന്നുന്നതെന്ന് മറ്റൊരാൾ തമാശയായി കമന്റ് ചെയ്തു. കാണാൻ വളരെ മനോഹരമാണെങ്കിലും റോഡിലൂടെ പോകുന്ന വാഹനങ്ങൾക്കും ആ മൃഗത്തിനും ആ മനുഷ്യനും ഇത് വളരെ അപകടം പിടിച്ച കാര്യമാണെന്ന് ചിലർ ചൂണ്ടിക്കാണിച്ചു. ഒരുപക്ഷേ ആ മനുഷ്യൻ തന്റെ ജീവിതത്തിലെ ഏറ്റവും വലിയ സങ്കടത്തിലൂടെയാവും കടന്നുപോകുന്നതെന്നും അതുകൊണ്ടാവാം ഇങ്ങനെ കിടക്കുന്നതെന്നും ചിലർ കുറിച്ചു. ഇന്ത്യയിൽ എന്ത് വിചിത്രമായ കാര്യം നടന്നാലും നമ്മൾ ‘ഇന്ത്യ തുടക്കക്കാർക്കുള്ളതല്ല’ എന്ന് പറയുമല്ലോ എന്ന് മറ്റൊരു ഉപയോക്താവ് ഓർമ്മിപ്പിച്ചു.
