ജപ്പാന്റെ ആധുനിക ചരിത്രത്തിലെ ഏറ്റവും കുപ്രസിദ്ധമായ ദുരൂഹതകളിലൊന്നാണ് ഗ്ലിക്കോ മൊറിനാഗ തട്ടിക്കൊണ്ടുപോകല്- ഭീഷണിപ്പെടുത്തല് കേസ്. ‘ദി മോണ്സ്റ്റര് വിത്ത് 21 ഫേസസ്’ എന്ന് സ്വയം വിശേഷിപ്പിച്ച ഒരു നിഗൂഢ സംഘം, ജാപ്പനീസ് മിഠായികളില് വിഷം കലര്ത്തുമെന്ന് ഭീഷണിപ്പെടുത്തുകയും അത് നടപ്പാക്കുകയും ചെയ്തു.
1980-കളില് ഒന്നര വര്ഷത്തോളം ഈ സംഘം എസാക്കി ഗ്ലിക്കോ, മൊറിനാഗ എന്നീ മിഠായി കമ്പനികളെയും മറ്റ് ഭക്ഷ്യ കമ്പനികളെയും ഭയപ്പെടുത്തി. അവര് മോചനദ്രവ്യം ആവശ്യപ്പെടുകയും കമ്പനി മേധാവികളെ തട്ടിക്കൊണ്ടുപോവുകയും ചെയ്തു. കൂടാതെ, സയനൈഡ് കലര്ത്തിയ മിഠായികള് കടകളില് വെക്കുകയും ചെയ്തു. ഒടുവില് അവരുടെ ഭീഷണി അവസാനിക്കുമ്പോള്, ദി മോണ്സ്റ്റര് വിത്ത് 21 ഫേസസ് മിഠായി കമ്പനികളുടെ ലാഭം കുത്തനെ ഇടിക്കുകയും ജപ്പാനിലെ ജനങ്ങളെ ഭയപ്പെടുത്തുകയും പോലീസിനെ കുഴപ്പിക്കുകയും ചെയ്തു. ഇന്നുവരെ, ഈ ഭീഷണികള്ക്ക് പിന്നിലുള്ളവരെ പിടികൂടാന് കഴിഞ്ഞിട്ടില്ല.
പോക്കി മധുരപലഹാരങ്ങള്ക്ക് പേരുകേട്ട എസാക്കി ഗ്ലിക്കോ കമ്പനി, ജപ്പാനിലെ ഏറ്റവും ജനപ്രിയമായ മിഠായി കമ്പനികളില് ഒന്നാണ്. എന്നാല് 1984 മാര്ച്ച് 18-ന് ഗ്ലിക്കോ തികച്ചും വ്യത്യസ്തമായ ഒരു കാരണത്താല് ശ്രദ്ധാകേന്ദ്രമായി. അന്ന് രാത്രി, രണ്ട് മുഖംമൂടി ധരിച്ച ആളുകള് ഗ്ലിക്കോ പ്രസിഡന്റ് കത്സുഹിസ എസാക്കിയുടെ വീട്ടില് അതിക്രമിച്ച് കടന്നു. രാത്രി 9 മണിയോടെ അവര് എസാക്കിയുടെ ഭാര്യയെയും മകളെയും കെട്ടിയിട്ട് എസാക്കിയെ കുളിമുറിയില് നിന്ന് വലിച്ചിഴച്ചു. അവര് എസാക്കിയെ കാറിന്റെ പിന്സീറ്റിലിട്ട് പാഞ്ഞകന്നു.
ജപ്പാനെ ഞെട്ടിച്ചുകൊണ്ട്, തട്ടിക്കൊണ്ടുപോയവര് ഒരു ബില്യണ് യെന് (ഇന്ന് ഏകദേശം 9 മില്യണ് ഡോളര്) 220 പൗണ്ട് സ്വര്ണക്കട്ടികളും ആവശ്യപ്പെട്ടു. കമ്പനി മോചനദ്രവ്യം നല്കുന്നതിനുമുമ്പ് എസാക്കിക്ക് രക്ഷപ്പെടാന് കഴിഞ്ഞെങ്കിലും, അദ്ദേഹത്തിന്റെ ദുരിതങ്ങള് തുടങ്ങിയിട്ടേയുള്ളൂവെന്ന് വ്യക്തമായി. അധികം വൈകാതെ, ഗ്ലിക്കോ ഫാക്ടറിയിലെ ആറ് കാറുകള്ക്ക് തീയിട്ടു. പിന്നീട് ആരോ കമ്പനിക്ക് ഹൈഡ്രോക്ലോറിക് ആസിഡ് അടങ്ങിയ ഒരു കണ്ടെയ്നര് അയച്ചു. എസാക്കിക്ക് ഭീഷണി മനസ്സിലായില്ലെന്ന് കരുതി, ഭീഷണിപ്പെടുത്തിയവര് പത്രങ്ങള് വഴി ഭീഷണിക്കത്തുകള് അയക്കാന് തുടങ്ങി.
അവര് തങ്ങളുടെ കാറിന്റെ നിറം – ചാരം – എവിടെ നിന്നാണ് ഭക്ഷണം വാങ്ങിയതെന്ന് – ഡയീ സൂപ്പര്മാര്ക്കറ്റ് – എന്നിങ്ങനെയുള്ള സൂചനകള് നല്കി. ഈ വിവരങ്ങള് തങ്ങളെ പിടികൂടാന് മതിയാകുമെന്ന് അവര് കൂട്ടിച്ചേര്ത്തു. ‘നമുക്ക് പ്രിഫെക്ചറല് പോലീസ് മേധാവിയെ കൂടി തട്ടിക്കൊണ്ടുപോയാലോ?’ എന്ന ഭീഷണിയോടെ അവര് കത്ത് അവസാനിപ്പിച്ചു.
എഡോഗാവ റാംപോയുടെ 1963-ലെ നോവലായ ‘ദി ഫിയെന്ഡ് വിത്ത് ദി ട്വന്റി ഫേസസി’ലെ ആള്മാറാട്ടം നടത്തുന്ന ഒരു മോഷ്ടാവിനോടുള്ള ആദരസൂചകമായി എസാക്കിയുടെ തട്ടിക്കൊണ്ടുപോയവര് കത്തില് ‘ദി മോണ്സ്റ്റര് വിത്ത് 21 ഫേസസ്’ എന്ന് ഒപ്പിട്ടു. എന്നാല് ഈ പേരോ അവര് നല്കിയ സൂചനകളോ പോലീസിനെ സഹായിച്ചില്ല. മെയ് പകുതിയോടെ, ദി മോണ്സ്റ്റര് വിത്ത് 21 ഫേസസ് സയനൈഡ് കലര്ത്തിയ നിരവധി ഗ്ലിക്കോ മിഠായികള് കടകളില് വെച്ചതായി അവകാശപ്പെട്ടു.
1984 മെയ് മാസത്തിലെ കത്തിന് പിന്നാലെ, ജപ്പാനിലുടനീളം പരിഭ്രാന്തി പടര്ന്നു. ഏത് മിഠായികളിലാണ് വിഷം ചേര്ത്തതെന്ന് ദി മോണ്സ്റ്റര് വിത്ത് 21 ഫേസസ് വ്യക്തമാക്കിയിരുന്നില്ല. അതിനാല് ഗ്ലിക്കോ എല്ലാ മിഠായികളും തിരികെ വിളിച്ചു. ആരും അവ വാങ്ങാന് തയ്യാറല്ലായിരുന്നു. ഇതിന്റെ ഫലമായി, കമ്പനിയുടെ ലാഭം കുത്തനെ ഇടിയുകയും ആയിരത്തോളം തൊഴിലാളികളെ പിരിച്ചുവിടുകയും ചെയ്തു. തട്ടിക്കൊണ്ടുപോയവരുടെ ഭീഷണി ഗ്ലിക്കോയ്ക്ക് 130 മില്യണ് ഡോളറിന്റെ വില്പ്പന നഷ്ടമുണ്ടാക്കിയെന്ന് എസാക്കി പിന്നീട് സമ്മതിച്ചു.
