ബംഗളുരുവിൽ പ്രാവുകളെ ഉപയോഗിച്ച് വീടുകളുടെ പൂട്ട് തകർത്ത് മോഷണം നടത്തുന്ന 38-കാരനെ പോലീസ് അറസ്റ്റ് ചെയ്തു. പരിവാള മഞ്ഞ എന്നറിയപ്പെടുന്ന “ മഞ്ജുനാഥ്” എന്ന യുവാവാണ് അറസ്റ്റിലായത്. ഹൊസൂർ സ്വദേശിയാണെങ്കിലും ബംഗളൂരുവിലെ നാഗരത്ത്പേട്ടയിലാണ് ഇയാൾ താമസിക്കുന്നത്.
നഗരത്തിലുടനീളം നടത്തിയ 50 മോഷണങ്ങൾക്കെങ്കിലും ഉത്തരവാദി ഇയാളാണെന്നാണ് അധികൃതർ കരുതുന്നത്. കാരണം മുമ്പ് കണ്ടതിൽ നിന്ന് വ്യത്യസ്തമായിരുന്നു മഞ്ജുനാഥിന്റെ രീതി. മോഷണം നടത്താനായി തിരഞ്ഞെടുക്കുന്ന വീടുകളിൽ മോഷണത്തിന് മുന്നേ ഇയാൾ പ്രാവുകളെയും കൂടെകൊണ്ടുപോകുമായിരുന്നു. സെക്യൂരിറ്റി ജീവനക്കാരില്ലാത്ത ബഹുനില കെട്ടിടങ്ങളിലായിരുന്നു ഇയാളുടെ ലക്ഷ്യം. മോഷണസ്ഥലം കണ്ടെത്തിയാല്‍ ഇയാൾ ഒന്നോ രണ്ടോ പ്രാവുകളെ കെട്ടിടത്തിന് സമീപം വിടുകയാണ് ചെയ്യാറുള്ളത്.
ഇങ്ങനെ കൊണ്ടുപോകുന്ന സമയങ്ങളിൽ പലപ്പോഴും പക്ഷികൾ വീടുകളുടേ മേൽക്കൂരയിലേക്കോ ബാൽക്കണിയിലേക്കോ പറന്നുകയറുകയാണ് പതിവ്. ഇത് മിക്കപ്പോഴും ആളുകളുടെ കണ്ണിൽ പെടാറുമുണ്ട്. എന്നാൽ പ്രാവിനെ കണ്ട് ആരെങ്കിലും കാര്യം തിരക്കിയാൽ തന്റെ പ്രാവുകളെ പിടിക്കാൻ താൻ വന്നതാണെന്നാണ് മഞ്ജുനാഥ് വിശദീകരിക്കുന്നത്. ഇത്തരത്തിൽ ലക്ഷ്യം വെക്കുന്ന പൂട്ടിക്കിടക്കുന്ന വീട് തിരിച്ചറിഞ്ഞു മഞ്ജുനാഥ് ഇരുമ്പ് വടി ഉപയോഗിച്ച് മുൻവശത്തെ വാതിൽ തകർത്ത് അകത്ത് കടക്കും. തുടർന്ന് അലമാരകളും സേഫുകളും തുറന്നിട്ട്‌ സ്വർണ്ണാഭരണങ്ങളും പണവും മോഷ്ടിച്ചെടുക്കും.
മോഷ്ടിച്ച സാധനങ്ങൾ പിന്നീട് ഹൊസൂരിൽ വിൽപന നടത്തും. നേരത്തെ പലതവണ അറസ്റ്റിലായെങ്കിലും ജാമ്യത്തിൽ പുറത്തിറങ്ങിയതിന് ശേഷവും മഞ്ജുനാഥ് ക്രിമിനൽ പ്രവർത്തനങ്ങൾ തുടർന്നു. ഇയാളുടെ ഏറ്റവും പുതിയ അറസ്റ്റ് സിറ്റി മാർക്കറ്റ്, അൾസൂർ ഗേറ്റ് പ്രദേശങ്ങളിലെ നാല് മോഷണക്കേസുകളെങ്കിലും തെളിയിക്കാൻ പോലീസിന് സഹായകമായി . മഞ്ജുനാഥ് ഒറ്റയ്ക്കാണ് മോഷണം ചെയ്തിരുന്നതെന്നും പകൽ സമയത്ത് ആളുകൾ ജോലിക്ക് പോകുമ്പോഴാണ് കളവ് നടത്തിയിരുന്നതെന്നും പോലീസ് സ്ഥിരീകരിച്ചു.
പ്രദേശത്തെ മോഷണ പരമ്പരകൾ തെളിയിക്കുന്നതിലെ സുപ്രധാനമായ വഴിത്തിരിവാണ് മഞ്ജുനാഥിന്റെ അറസ്റ്റ്. ഇയാളുടെ മുൻ ഓപ്പറേഷനുകളിലെ മോഷ്ടിച്ച സാധനങ്ങൾ വീണ്ടെടുക്കാനാകുമെന്ന പ്രതീക്ഷയിലാണ് അന്വേഷണ ഉദ്യോഗസ്ഥർ.
