ഇന്ത്യൻ വീടുകളിൽ വേനൽക്കാലത്ത് സീലിംഗ് ഫാനുകൾ വലിയൊരു ആശ്വാസമാണ്. ചിലപ്പോൾ കടുത്ത ചൂടിൽ നിന്നും വിയർപ്പിൽ നിന്നും നമ്മെ രക്ഷിക്കുന്നത് ഈ ഫാനുകൾ മാത്രമായിരിക്കും. എയർ കണ്ടീഷണറുകളും കൂളറുകളും ഒക്കെ ഉണ്ടെങ്കിലും അവ എപ്പോഴും തുടർച്ചയായി പ്രവർത്തിപ്പിക്കുന്നത് വലിയ സാമ്പത്തികച്ചെലവ് ഉണ്ടാക്കുന്ന കാര്യമാണ്. എന്നാൽ, ഫാനിന്റെ സ്പീഡ് പരമാവധി കൂട്ടിയിട്ടിട്ടും ആവശ്യത്തിന് കാറ്റ് കിട്ടാതെ വരികയും ഫാൻ വളരെ പതുക്കെ കറങ്ങുകയും ചെയ്യുന്ന അവസ്ഥ നിങ്ങൾ ശ്രദ്ധിച്ചിട്ടുണ്ടോ? അപ്പോൾ ഫാൻ കേടായെന്നും പുതിയൊരെണ്ണം വാങ്ങാൻ സമയമായെന്നും നമ്മൾ ചിന്തിച്ചേക്കാം.
എന്നാൽ അത്ര പെട്ടെന്ന് പുതിയ ഫാൻ വാങ്ങാൻ കാശ് കളയേണ്ടതില്ല. അതിന് മുൻപായി ഫാനിന്റെ ചില അടിസ്ഥാന കാര്യങ്ങൾ പരിശോധിച്ച് നോക്കാം. ഭൂരിഭാഗം സമയങ്ങളിലും ചെറിയ ചില അറ്റകുറ്റപ്പണികൾ കൊണ്ട് തന്നെ പഴയ ഫാനിനെ പഴയപടി സ്പീഡിലാക്കാൻ സാധിക്കും. അതിനായി ശ്രദ്ധിക്കേണ്ട 5 പ്രധാന കാര്യങ്ങൾ താഴെ പറയുന്നവയാണ്.
ആദ്യമായി പരിശോധിക്കേണ്ടത് ഫാനിലെ കപ്പാസിറ്റർ ആണ്. ഫാൻ കറങ്ങിത്തുടങ്ങാനും അത് നല്ല സ്പീഡിൽ നിലനിർത്താനും സഹായിക്കുന്ന ചെറിയൊരു ഭാഗമാണിത്. ഇതിന്റെ വീര്യം കുറയുമ്പോൾ ഫാൻ പഴയതുപോലെ വേഗത്തിൽ കറങ്ങാൻ ബുദ്ധിമുട്ടും. ഫാനിൽ നിന്ന് മറ്റ് ശബ്ദങ്ങൾ ഒന്നും കേൾക്കുന്നില്ല, പക്ഷെ ഫാൻ വളരെ പതുക്കെയാണ് കറങ്ങുന്നതെങ്കിൽ കപ്പാസിറ്റർ കേടായതാകാനാണ് സാധ്യത. ഏതൊരു ഇലക്ട്രിക്കൽ കടയിലും കുറഞ്ഞ വിലയ്ക്ക് ലഭിക്കുന്ന ‘2.5 µF’ കപ്പാസിറ്റർ വാങ്ങി മാറ്റിവെക്കുന്നത് വഴി ഈ പ്രശ്നം എളുപ്പത്തിൽ പരിഹരിക്കാം.
ചിലപ്പോൾ ഫാനിന്റെ സ്പീഡ് നിയന്ത്രിക്കുന്ന റെഗുലേറ്റർ ആയിരിക്കാം വില്ലൻ. പ്രത്യേകിച്ച് പുതിയ തരം ഇലക്ട്രോണിക് റെഗുലേറ്ററുകൾക്ക് എന്തെങ്കിലും തകരാർ സംഭവിച്ചാൽ ഫാനിലേക്ക് കൃത്യമായ വോൾട്ടേജ് എത്തില്ല. ഫാൻ വാങ്ങിയിട്ട് അധികകാലം ആയിട്ടില്ലെങ്കിലും അത് പതുക്കെയാണ് കറങ്ങുന്നതെങ്കിൽ റെഗുലേറ്റർ ഒന്ന് മാറ്റി നോക്കുന്നത് നല്ലതാണ്.
നമ്മൾ പലപ്പോഴും ശ്രദ്ധിക്കാതെ പോകുന്ന ഒന്നാണ് ഫാനിന്റെ ലീഫുകളിൽ (ബ്ലേഡുകളിൽ) അടിയുന്ന പൊടിയും അഴുക്കും. ഇത് ഫാനിന്റെ ഭാരം കൂട്ടുകയും മോട്ടോറിന്റെ വേഗത കുറയ്ക്കുകയും ചെയ്യും. ഇത് കാറ്റ് വരുന്നത് തടസ്സപ്പെടുത്താൻ കാരണമാകും. അതിനാൽ മാസത്തിലൊരിക്കലെങ്കിലും ഫാനിന്റെ ലീഫുകൾ നന്നായി തുടച്ചു വൃത്തിയാക്കുന്നത് ഫാനിന്റെ സ്പീഡും കാറ്റും കൂട്ടാൻ സഹായിക്കും.
ഫാനിന്റെ ലീഫുകളുടെ അലൈൻമെന്റിൽ (ക്രമീകരണത്തിൽ) വരുന്ന മാറ്റം നമ്മൾ പെട്ടെന്ന് തിരിച്ചറിയണമെന്നില്ല. ഫാൻ തുടയ്ക്കുമ്പോഴോ മറ്റോ ലീഫുകൾക്ക് നേരിയ വളവ് സംഭവിച്ചാൽ പോലും ഫാനിന്റെ ബാലൻസ് തെറ്റുകയും കാറ്റ് കുറയുകയും ചെയ്യും. ഇത് മോട്ടോറിന് കൂടുതൽ ഭാരം നൽകുമെങ്കിലും കാറ്റ് തീരെ കുറവായിട്ടേ അനുഭവപ്പെടൂ. ലീഫുകൾക്ക് എന്തെങ്കിലും വളവുണ്ടെന്ന് തോന്നിയാൽ അത് കൈകൊണ്ട് മൃദുവായി നിവർത്തി കൊടുക്കാവുന്നതാണ്.
ഫാൻ കറങ്ങുമ്പോൾ എന്തെങ്കിലും തരത്തിലുള്ള ശബ്ദം കേൾക്കുന്നുണ്ടെങ്കിൽ അതിലെ ബെയറിംഗുകൾക്ക് ഓയിൽ ഇടാൻ സമയമായി എന്ന് മനസ്സിലാക്കാം. ബെയറിംഗുകൾ വരളുന്നതും അതിൽ അഴുക്ക് കയറുന്നതും ഫാനിന്റെ വേഗത കുറയ്ക്കുകയും മോട്ടോറിന് കേടുപാട് വരുത്തുകയും ചെയ്യും. കുറച്ച് തുള്ളി ലൂബ്രിക്കന്റ് ഓയിൽ ഇട്ടുകൊടുത്താൽ ഇത് സുഗമമായി കറങ്ങും. എന്നാൽ ബെയറിംഗ് പൂർണ്ണമായി കേടായ അവസ്ഥയിലാണെങ്കിൽ ഒരു ഇലക്ട്രീഷ്യന്റെ സഹായത്തോടെ അത് മാറ്റേണ്ടി വരും.
ചുരുക്കത്തിൽ, ഫാൻ പതുക്കെ കറങ്ങുന്നു എന്ന് കരുതി അത് കേടായെന്ന് അർത്ഥമില്ല. കപ്പാസിറ്റർ മാറ്റുക, റെഗുലേറ്റർ പരിശോധിക്കുക, ഫാൻ തുടച്ചു വൃത്തിയാക്കുക, ലീഫുകളുടെ വളവ് നിവർത്തുക, ബെയറിംഗിൽ ഓയിൽ ഇടുക തുടങ്ങിയ ചെറിയ കാര്യങ്ങൾ ശ്രദ്ധിച്ചാൽ ഫാൻ പഴയതുപോലെ നല്ല സ്പീഡിൽ കറങ്ങും. പുതിയൊരു ഫാൻ വാങ്ങി പണം കളയുന്നതിന് മുൻപ് ഈ ചെറിയ കാര്യങ്ങൾക്കായി കുറച്ചു സമയവും ചെറിയൊരു തുകയും ചിലവഴിച്ചാൽ ഫാൻ ഇനിയും വർഷങ്ങളോളം നന്നായി ഉപയോഗിക്കാൻ സാധിക്കും.
