തന്റെ അന്ധയായ ഭാര്യയെ 12 വർഷത്തോളം അർപ്പണബോധത്തോടെ പരിചരിച്ച ഒരു ചൈനീസ് ഭർത്താവിനെ പ്രശംസകൊണ്ട് മൂടുകയാണ് ഓൺലൈന് ഉപയോക്താക്കള് . ഒരു പതിറ്റാണ്ടിലേറെയായി കാഴ്ച നഷ്ടപ്പെട്ട ഭാര്യയെ ശ്രദ്ധയോടെ പരിചരിച്ചതിന് കിഴക്കൻ ചൈനയിലെ ഒരു യുവാവിന് ‘ഏറ്റവും അർപ്പണബോധമുള്ള ഭർത്താവ്’ എന്ന വിശേഷണമാണ് ലഭിച്ചത്.
39 വയസ്സുള്ള ലി ജുക്സിൻ, ഭാര്യ ഷാങ് സിയിങ് എന്നിവരുടെ കഥ ചൈനീസ് സമൂഹമാധ്യമങ്ങളിൽ വൈറലായി. ഷാൻഡോങ് ആസ്ഥാനമായുള്ള ക്വിലു ഈവനിംഗ് ന്യൂസാണ് ആദ്യം ഈ വാർത്ത റിപ്പോർട്ട് ചെയ്തത്.
ജീവിതം ഒരു ദുരന്തമായി മാറുന്നു
ഷാൻഡോങ് പ്രവിശ്യയിലെ ക്വിംഗ്ഡാവോയിൽ ഒരു കാർ റിപ്പയർ ഷോപ്പ് നടത്തുന്ന ലി 2008-ലാണ് ഷാങിനെ വിവാഹം കഴിച്ചത്. ദമ്പതികൾക്ക് ഒരു മകളുണ്ട്. 2013 വരെ സാധാരണ കുടുംബ ജീവിതം നയിക്കുകയായിരുന്നു ഇവർ. പിന്നീട് ഷാങിന് കണ്ണിന് ഗുരുതരമായ രോഗം കണ്ടെത്തി.
ചികിത്സക്കായി ഏകദേശം അഞ്ച് ലക്ഷം യുവാൻ (ഏകദേശം US$70,000) ചെലവഴിച്ചിട്ടും, 2014 ജൂണിൽ ഷാങിന് പൂർണ്ണമായും കാഴ്ച നഷ്ടപ്പെട്ടു.“എനിക്ക് ഒന്നും കാണാൻ കഴിഞ്ഞില്ല. എന്റെ മകളെ കാണാൻ എനിക്ക് കഴിഞ്ഞില്ല, ”ഒരു അഭിമുഖത്തിനിടെ കണ്ണീരോടെ ഷാങ് ഓർമ്മിച്ചു. ഈ അവസ്ഥയെ ലി വിശേഷിപ്പിച്ചത് “സ്വർഗ്ഗത്തിൽ നിന്ന് നരകത്തിലേക്കുള്ള” മാറ്റമെന്നാണ്. എന്നിരുന്നാലും, അദ്ദേഹം ഭാര്യക്ക് ഉറപ്പ് നൽകി, ‘‘ജീവിതകാലം മുഴുവന് തുണയായി ഞാന് ഉണ്ടാകും. ഞാൻ എവിടെ പോയാലും നിങ്ങളെയും കൂട്ടികൊണ്ട് പോകും. ”
ഒരു ഭർത്താവിന്റെ അർപ്പണബോധം
ഷാങിന്റെ മാനസികാവസ്ഥ മനസ്സിലാക്കി, ലിയും ബന്ധുക്കളും അവളെ ആശ്വസിപ്പിക്കാൻ ഒരുമിച്ച് നിന്നു. ഓർമ്മകൾ ഉപയോഗിച്ച് അവൾക്ക് ആത്മവിശ്വാസത്തോടെ സഞ്ചരിക്കാൻ കഴിയുന്ന രീതിയിൽ വീട്ടിലെ സാധനങ്ങളുടെ സ്ഥാനം മാറ്റാതെ ലി ശ്രദ്ധിച്ചു.
ഇതിനെതുടര്ന്ന് ഷാങിന് പതിയെ ജീവിതം വീണ്ടെടുക്കാൻ കഴിഞ്ഞു. അവൾ വീണ്ടും ഭക്ഷണം പാചകം ചെയ്യാൻ പഠിച്ചു, പലപ്പോഴും ഭക്ഷണം ഉണ്ടാക്കുമ്പോൾ ഭർത്താവ് സ്നേഹത്തോടെ അവളെ പ്രശംസിച്ചുകൊണ്ട് പറയും: “ഭക്ഷണത്തിന് എപ്പോഴും നല്ല രുചിയുണ്ട്.”ധൈര്യത്തോടെ ജീവിതത്തെ നേരിടാൻ ഷാങും തീരുമാനിച്ചു. “ഞാൻ ജീവിക്കണം. നമ്മുടെ കുടുംബത്തിന് വേണ്ടി, ഞാൻ ശക്തയായിരിക്കണം,” അവർ പറഞ്ഞു.
സമൂഹത്തിന് തിരികെ നൽകുന്നു
2020-ൽ, ഭാര്യയുടെ പൂർണ്ണ പിന്തുണയോടെ ലി, ലാന്റിയൻ റെസ്ക്യൂയിംഗ് ടീം എന്ന പ്രാദേശിക പൊതുക്ഷേമ സംഘടനയിൽ ചേർന്നു. “ഞങ്ങളുടെ കുടുംബത്തിന്റെ അവസ്ഥ മെച്ചപ്പെട്ടു, ഞങ്ങളുടെ കുഞ്ഞ് വളരുകയാണ്, അതിനാൽ സമൂഹത്തിന് തിരികെ നൽകാനും ആവശ്യമുള്ളവരെ സഹായിക്കാനും സമയമായെന്ന് ഞാൻ കരുതുന്നു,” ലി പറഞ്ഞു.
