ഒരു ചൈനീസ് ഗെയിമിംഗ് കമ്പനിയുടമയായ കോടീശ്വരൻ യുണൈറ്റഡ് സ്റ്റേറ്റ്സിലെ വാടക ഗർഭധാരണ ഏജൻസികൾ വഴി 100-ൽ അധികം കുട്ടികളുടെ പിതാവായെന്ന്, വോൾ സ്ട്രീറ്റ് ജേണൽ റിപ്പോർട്ട് ചെയ്തു. ഡോയി (Duoyi) എന്ന ഓൺലൈൻ ഗെയിമിംഗ് കമ്പനിയുടെ സ്ഥാപകനായ ഷു ബോയാണ് (Xu Bo) ഈ കോടീശ്വരൻ. ഒരു വലിയ കുടുംബ സാമ്രാജ്യം കെട്ടിപ്പടുക്കാനുള്ള ആഗ്രഹം ഇദ്ദേഹത്തെ ഇതിന് പ്രേരിപ്പിച്ചത്.
“ചൈനയിലെ ആദ്യത്തെ പിതാവ്” എന്ന് സ്വയം വിശേഷിപ്പിക്കുന്ന ഈ കോടീശ്വരൻ, തന്റെ ബിസിനസ്സ് ഏറ്റെടുക്കാൻ കുറഞ്ഞത് “50 ഉയർന്ന നിലവാരമുള്ള ആൺമക്കളെയെങ്കിലും” (പെൺകുട്ടികളേക്കാൾ ശ്രേഷ്ഠർ ആൺകുട്ടികളാണെന്ന വിശ്വാസത്തിൽ ആൺകുട്ടികളെ മാത്രം) സൃഷ്ടിക്കാൻ ഉദ്ദേശിക്കുന്നതായി 2023-ൽ പരസ്യമായി പ്രസ്താവിച്ചിരുന്നു. അതേ വർഷം, യുഎസ് ഫാമിലി കോടതി ജഡ്ജി ആമി പെൽമാൻ (Amy Pellman) ലോസ് ഏഞ്ചൽസിൽ ഷുവിന്റെ രക്ഷാകർതൃത്വ ഹർജി (parentage petition) തള്ളിയിരുന്നു. പിന്നീട്, അദ്ദേഹവുമായി ബന്ധമുള്ള ഒരു വെയ്ബോ അക്കൗണ്ടിലെ സോഷ്യൽ മീഡിയ പോസ്റ്റ്, താൻ വിജയകരമായി അപ്പീൽ നൽകിയതായി സൂചിപ്പിച്ചു.
റിപ്പോർട്ട് അനുസരിച്ച്, ഷുവുമായി ബന്ധമുള്ള അക്കൗണ്ടുകൾ വെയ്ബോയിൽ ഇങ്ങനെ കുറിച്ചിട്ടുണ്ട്: “കൂടുതൽ കുട്ടികളുണ്ടാകുന്നത് എല്ലാ പ്രശ്നങ്ങളും പരിഹരിക്കും”, കൂടാതെ ഷുവിന്റെ കുട്ടികൾ ഇലോൺ മസ്കിന്റെ കുട്ടികളെ വിവാഹം കഴിക്കുന്നതിനെക്കുറിച്ചുള്ള ഭാവനകളും അവർ പങ്കുവെച്ചിട്ടുണ്ട്.
മുൻ പങ്കാളി പറഞ്ഞത്?
മറ്റൊരു റിപ്പോർട്ടിൽ, ഷുവിന്റെ മുൻ കാമുകി ടാങ് ജിംഗ് (Tang Jing), അദ്ദേഹത്തിന് 300-ൽ അധികം കുട്ടികളുണ്ടെന്ന് ആരോപിച്ചു. രണ്ട് പെൺമക്കളുടെ കസ്റ്റഡിയെ ചൊല്ലി ഇരുവരും നിയമപോരാട്ടത്തിലാണ്. ഷു, ടാങ്ങിന് 819 ദശലക്ഷം യുവാൻ (ഏകദേശം 115 ദശലക്ഷം യുഎസ് ഡോളർ) കൈമാറ്റം ചെയ്തിട്ടുണ്ടെന്നും, എന്നാൽ അവർ 515 ദശലക്ഷം യുവാൻ (ഏകദേശം 72 ദശലക്ഷം യുഎസ് ഡോളർ) മാത്രമേ തിരികെ നൽകിയിട്ടുള്ളൂ എന്നും ഷു പറഞ്ഞു. ഷുവിന്റെ കണക്കനുസരിച്ച്, ടാങ് ഇനിയും 300 ദശലക്ഷം യുവാൻ തനിക്ക് നൽകാനുണ്ട്. ഇതാണ് 2024-ൽ ഒരു കേസ് ഫയൽ ചെയ്യാൻ അദ്ദേഹത്തെ പ്രേരിപ്പിച്ചത്.
“കഴിഞ്ഞ പത്ത് വർഷത്തോളമായി, ഈ 300 കുട്ടികളുള്ള വലിയ കുടുംബത്തെ പരിപാലിക്കുന്നതിനും സംരക്ഷിക്കുന്നതിനും ആവശ്യമായ ചെലവുകൾ വളരെ വലുതായിരുന്നു. എനിക്ക് ലഭിച്ച പണത്തിന്റെ വലിയൊരു ഭാഗം ആ സമയത്തെ ഞങ്ങളുടെ ദൈനംദിന ജീവിതച്ചെലവുകൾക്കായിട്ടാണ് പോയത്,” ടാങ് ഒരു സോഷ്യൽ മീഡിയ പോസ്റ്റിൽ കുറിച്ചു എന്ന് സൗത്ത് ചൈന മോണിംഗ് പോസ്റ്റ് (SCMP) റിപ്പോർട്ട് ചെയ്തു.
ഈ 300 കുട്ടികൾക്കും താമസരേഖയില്ലെന്നും, ഈ എണ്ണം ഒട്ടും അതിശയോക്തിപരമല്ലെന്നും, “എണ്ണം ഇതിലും കൂടുതലായിരിക്കാം” എന്നും അവർ കൂട്ടിച്ചേർത്തു.
അതേസമയം, ആ സമയത്ത് വെയ്ബോയിൽ പുറത്തിറക്കിയ ഒരു പ്രസ്താവനയിൽ, 300 എന്ന കണക്ക് തെറ്റാണെന്ന് ഡോയി നെറ്റ്വർക്ക് അറിയിച്ചു. യുഎസിലെ വാടക ഗർഭധാരണത്തിലൂടെ “വർഷങ്ങളുടെ പരിശ്രമത്തിന് ശേഷം” ഷുവിന് “നൂറിലധികം” കുട്ടികൾ മാത്രമേയുള്ളൂ എന്നും അവർ വ്യക്തമാക്കി. റിപ്പോർട്ട് അനുസരിച്ച്, ഈ കുട്ടികളിൽ പലരും കാലിഫോർണിയയിലെ ഇർവിനിലുള്ള (Irvine) ഒരു വീട്ടിലാണ് താമസിക്കുന്നത്. ഇവരെ ആയമാർ പരിപാലിക്കുന്നു.
ഷുവിന്റെ വാടക ഗർഭധാരണ പദ്ധതികൾ ചൈനയിൽ വലിയ വിവാദത്തിനും വിമർശനങ്ങൾക്കും വഴിവെച്ചു. ചൈനയിൽ വാടക ഗർഭധാരണം നിരോധിച്ചതിനാൽ, അവിടുത്തെ പല പ്രമുഖരും കോടീശ്വരന്മാരും രഹസ്യമായി യുഎസിൽ പോയി വാടക ഗർഭധാരണ ഏജൻസികൾ വഴി കുട്ടികളെ സൃഷ്ടിക്കുന്ന രീതി നിലവിലുണ്ട്.
