ക്രിസ്റ്റഫർ നോളന്റെ ‘ദി ഒഡീസി’ എന്ന ചിത്രത്തിൽ പ്രധാന വേഷത്തിലെത്തുന്ന ബ്രിട്ടീഷ്-ഇന്ത്യൻ താരം ഹിമേഷ് പട്ടേൽ ഇപ്പോൾ ഹോളിവുഡിൽ വലിയ ശ്രദ്ധ നേടുകയാണ്. ടെലിവിഷൻ, സിനിമ, തിയേറ്റർ രംഗങ്ങളിലെ മികച്ച പ്രകടനങ്ങളിലൂടെ ശ്രദ്ധേയനായ ഹിമേഷ്, 1990 ഒക്ടോബർ 13-ന് ഇംഗ്ലണ്ടിലെ കേംബ്രിഡ്ജ്ഷെയറിലാണ് ജനിച്ചത്. കെനിയയിലും സാംബിയയിലും ജനിച്ച് പിന്നീട് യുകെയിൽ സ്ഥിരതാമസമാക്കിയ ഒരു ഗുജറാത്തി ഹിന്ദു കുടുംബത്തിൽ നിന്നുള്ള ആളാണ് ഇദ്ദേഹം. ചെറുപ്പകാലം മുതൽക്കേ അഭിനയത്തിൽ താല്പര്യം കാണിച്ചിരുന്ന ഹിമേഷ്, സ്കൂൾ നാടകങ്ങളിലൂടെയും പ്രാദേശിക തിയേറ്റർ ഗ്രൂപ്പുകളിലൂടെയുമാണ് അഭിനയരംഗത്തേക്ക് കടന്നുവന്നത്.
ഹോമറിന്റെ ഇതിഹാസ കാവ്യത്തെ ആസ്പദമാക്കി നോളൻ ഒരുക്കുന്ന ചിത്രത്തിൽ ഒഡീഷ്യസിന്റെ കപ്പൽ പടയിലെ പ്രധാനിയായ ‘യൂറിലോക്കസ്’ എന്ന കഥാപാത്രത്തെയാണ് ഹിമേഷ് അവതരിപ്പിക്കുന്നത്. ട്രോജൻ യുദ്ധത്തിന് ശേഷമുള്ള മടക്കയാത്രയിൽ ഒഡീഷ്യസിന്റെ തീരുമാനങ്ങളെ ചോദ്യം ചെയ്യുകയും സംഘത്തിനുള്ളിൽ തർക്കങ്ങൾ ഉണ്ടാക്കുകയും ചെയ്യുന്ന ഒരു പ്രധാന കഥാപാത്രമാണിത്. പതിനാറാം വയസ്സിൽ ബിബിസിയുടെ ജനപ്രിയ പരമ്പരയായ ‘ഈസ്റ്റ്എൻഡേഴ്സ്’ എന്ന സീരിയലിൽ തംവർ മസൂദ് എന്ന കഥാപാത്രത്തെ അവതരിപ്പിച്ചുകൊണ്ടാണ് ഹിമേഷ് തന്റെ കരിയർ ആരംഭിച്ചത്. പിന്നീട് 2019-ൽ പുറത്തിറങ്ങിയ ‘യെസ്റ്റർഡേ’ എന്ന മ്യൂസിക്കൽ കോമഡി ചിത്രത്തിലൂടെയാണ് ഇദ്ദേഹം ആഗോളതലത്തിൽ പ്രശസ്തനായത്.
ക്രിസ്റ്റഫർ നോളന്റെ ചിത്രത്തിൽ ഹിമേഷ് അഭിനയിക്കുന്നത് ഇത് ആദ്യമായല്ല. 2020-ൽ പുറത്തിറങ്ങിയ നോളന്റെ ‘ടെനെറ്റ്’ എന്ന ചിത്രത്തിൽ ‘മാഹിർ’ എന്ന വേഷത്തിൽ ഇദ്ദേഹം എത്തിയിരുന്നു. എച്ച്.ബി.ഓ-യുടെ ‘സ്റ്റേഷൻ ഇലവൻ’ എന്ന പരമ്പരയിലെ പ്രകടനത്തിന് ഹിമേഷിന് എമ്മി അവാർഡ് നാമനിർദ്ദേശം ലഭിച്ചിട്ടുണ്ട്. കൂടാതെ നെറ്റ്ഫ്ലിക്സിന്റെ ‘ഡോണ്ട് ലുക്ക് അപ്പ്’, ‘എനോല ഹോംസ് 2’ തുടങ്ങിയ പ്രശസ്തമായ ചിത്രങ്ങളിലും ഇദ്ദേഹം വേഷമിട്ടിട്ടുണ്ട്. വ്യക്തിജീവിതം മാധ്യമങ്ങളിൽ നിന്ന് അകറ്റിനിർത്താൻ ആഗ്രഹിക്കുന്ന ഹിമേഷ്, അച്ഛനായത് തന്റെ ജീവിതത്തിലെ വലിയൊരു മാറ്റമാണെന്ന് ഒരു അഭിമുഖത്തിൽ പങ്കുവെച്ചിരുന്നു. ‘ദി ഒഡീസി’ കൂടാതെ റയാൻ കൂഗ്ലർ ഒരുക്കുന്ന ‘ദി എക്സ്-ഫയൽസ്’ എന്ന പരമ്പരയുടെ റീബൂട്ടിലും ഹിമേഷ് പ്രധാന വേഷത്തിൽ എത്തുന്നുണ്ട്.
