തന്റെ സഹോദരിയും സ്റ്റാർട്ടപ്പ് പങ്കാളിയുമായ ഗൗരി അഗർവാൾ, സ്വന്തം വിവാഹച്ചടങ്ങുകൾ കഴിഞ്ഞ് മിനിറ്റുകൾക്കകം ഒരു നിർണ്ണായക സോഫ്റ്റ്വെയർ തകരാർ (Critical Bug) പരിഹരിക്കുന്ന ചിത്രം പങ്കുവെച്ചിരിക്കുകയാണ് കോയൽ എഐ (KoyalAI) സി.ഇ.ഒ മെഹുൽ അഗർവാൾ. സ്റ്റാർട്ടപ്പ് ജീവിതം പുറത്തുനിന്ന് കാണുന്നതുപോലെ അത്ര മനോഹരമല്ലെന്നും, അതിന് പിന്നിൽ കഠിനാധ്വാനത്തിന്റെ കഥകളുണ്ടെന്നും അദ്ദേഹം സോഷ്യൽ മീഡിയ പോസ്റ്റിലൂടെ പറഞ്ഞു. ചുവന്ന വിവാഹ വസ്ത്രം ധരിച്ച് ലാപ്ടോപ്പിന് മുന്നിലിരുന്ന് ജോലി ചെയ്യുന്ന ഗൗരിയുടെ ചിത്രമാണ് അദ്ദേഹം പങ്കുവെച്ചത്.
ഇതൊരു ഫോട്ടോ ഷൂട്ടിന് വേണ്ടി ചെയ്തതല്ലെന്നും, ആ സമയത്ത് ജോലി ചെയ്തതിന് തങ്ങളെ രണ്ടുപേരെയും മാതാപിതാക്കൾ ശകാരിച്ചതായും മെഹുൽ കുറിച്ചു. “ആളുകൾ സ്റ്റാർട്ടപ്പുകളെ വളരെ ഗ്ലാമറൈസ് ചെയ്താണ് കാണുന്നത്, എന്നാൽ അതിന് പിന്നിൽ വലിയ അധ്വാനമുണ്ട്. ഇത് എന്റെ സഹോദരിയും സഹസ്ഥാപകയുമായ ഗൗരിയാണ്. വിവാഹച്ചടങ്ങുകൾ കഴിഞ്ഞ് 10 മിനിറ്റിനുള്ളിൽ കമ്പനിയിലെ ഒരു പ്രധാന പ്രശ്നം പരിഹരിക്കുകയാണ് അവൾ. ഇതൊരു ഫോട്ടോ ഒപ്പ് (Photo-op) അല്ല. മാതാപിതാക്കൾ ഞങ്ങളെ രണ്ടുപേരെയും വഴക്കുപറഞ്ഞു. ഞങ്ങൾ എങ്ങനെ വിജയിച്ചു എന്ന് ആരെങ്കിലും ചോദിച്ചാൽ, ഞാൻ ഈ ചിത്രം കാണിച്ചുകൊടുക്കും,” അദ്ദേഹം എഴുതി.
ഹണിമൂൺ സമയത്ത് പോലും ഗൗരി ദിവസവും മൂന്ന് മണിക്കൂർ മീറ്റിംഗുകളിൽ പങ്കെടുക്കാറുണ്ടെന്നും, ഇതിൽ അവളുടെ ഭർത്താവിന് വലിയ സന്തോഷമില്ലെന്നും മെഹുൽ മറ്റൊരു പോസ്റ്റിൽ തമാശയായി കൂട്ടിച്ചേർത്തു.
സോഷ്യൽ മീഡിയയിലെ പ്രതികരണങ്ങൾ
ഈ പോസ്റ്റ് വൈറലായതോടെ സ്റ്റാർട്ടപ്പുകളിലെ അമിത ജോലിഭാരത്തെക്കുറിച്ചും വലിയ ചർച്ചകൾക്കാണ് ഇന്റർനെറ്റ് സാക്ഷ്യം വഹിച്ചത്. പ്രതിബദ്ധതയെ അഭിനന്ദിച്ചും അമിതമായ പ്രകടനപരതയെ വിമർശിച്ചും നിരവധി പേർ രംഗത്തെത്തി.
“ഈ കഠിനാധ്വാനത്തെ അഭിനന്ദിക്കുന്നു, എന്നാൽ ജീവിതം ഒരു മാരത്തൺ ഓട്ടമാണെന്നും സ്പ്രിന്റ് അല്ലെന്നും ഓർക്കുക,” എന്ന് ഒരാൾ കുറിച്ചു.
” ജീവിതത്തിൽ ഓരോന്നിനും ഓരോ സമയമുണ്ട്. മുൻഗണനകൾ നിശ്ചയിക്കാൻ അവൾ പഠിക്കണം,” എന്നായിരുന്നു മറ്റൊരു കമന്റ്.
സ്റ്റാർട്ടപ്പ് സംസ്കാരത്തിലെ ‘ഹസിൽ’ (Hustle) രീതിയും വ്യക്തിജീവിതത്തിലെ സ്വകാര്യതയും തമ്മിലുള്ള അതിർവരമ്പുകളെക്കുറിച്ചുള്ള തർക്കങ്ങൾ ഈ പോസ്റ്റിനെത്തുടർന്ന് ഇപ്പോഴും തുടരുകയാണ്.
