മാനസികസമ്മര്ദ്ദങ്ങളുടെ കൂടായ കോർപ്പറേറ്റ് ജോലി ഉപേക്ഷിച്ച് ഓട്ടോറിക്ഷാ ഡ്രൈവറായി മാറിയതിന്റെ കാരണം വിശദീകരിക്കുന്ന ഒരു ബാംഗ്ലൂർ സ്വദേശിയുടെ വീഡിയോ സോഷ്യൽ മീഡിയയിൽ വൈറലായിരിക്കുകയാണ്.
ജോലി ഉപേക്ഷിക്കാൻ ആലോചിക്കുന്ന മറ്റുള്ളവർക്കും പ്രചോദനമാവുക എന്നതാണ് തന്റെ ലക്ഷ്യമെന്ന് രാകേഷ് വീഡിയോയിൽ പങ്കുവെച്ചു. നിലവിലെ കരിയർ ഉപേക്ഷിക്കാൻ ആലോചിക്കുന്നവർക്ക് ഇത് സഹായകമായേക്കാം എന്ന അടിക്കുറിപ്പോടെയാണ് അദ്ദേഹം വീഡിയോ പങ്കുവെച്ചത്. “ഓട്ടോ ഡ്രൈവർ, ഇനി കോർപ്പറേറ്റ് അടിമയല്ല” എന്ന വാക്കുകളോടെയാണ് വീഡിയോ ആരംഭിക്കുന്നത്.
ജോലി ഉപേക്ഷിക്കുന്നതിനേയും പുതിയ തുടക്കത്തേയും താൻ ഭയപ്പെടുന്നില്ലെന്ന് രാകേഷ് വീഡിയോയിൽ പറയുന്നുണ്ട്. ജീവിതത്തിലെ ഏറ്റവും പ്രയാസകരമായ സമയങ്ങളിലൂടെ കടന്നുപോകുന്നവർക്ക് വേണ്ടിയാണ് ഈ വീഡിയോ . താൻ എല്ലാം ഉപേക്ഷിക്കാൻ ആലോചിച്ച ഒരു സമയത്തെക്കുറിച്ചും, അതിൽ നിന്ന് താൻ ഒരിക്കലും കരകയറില്ലെന്ന് കരുതിയതിനെക്കുറിച്ചും അദ്ദേഹം ഓർമ്മിക്കുന്നു. രാകേഷ് പറയുന്നു, “എന്നാൽ ഞാനിതാ ഇവിടെ, ഓട്ടോ ഓടിക്കുന്നു. ജീവിതം എന്നെ അവസാനിപ്പിക്കുകയോ എന്നെ തോൽപ്പിക്കുകയോ ഇല്ല.” ജീവിതം തുടരുക, അർത്ഥവത്തായ കാര്യങ്ങളിൽ ശ്രദ്ധ കേന്ദ്രീകരിക്കുക എന്നതാണ് ഏറ്റവും പ്രധാനം- അദ്ദേഹം വിശദീകരിച്ചു.
പണത്തിന്റെ പ്രാധാന്യത്തെക്കുറിച്ചും രാകേഷ് സംസാരിച്ചു. പണം പ്രധാനമാണ്, പക്ഷേ അത് ജീവിതത്തിലെ എല്ലാം അല്ലെന്ന് അദ്ദേഹം പറഞ്ഞു. ജീവിതത്തിൽ യഥാർത്ഥ ലക്ഷ്യവും മൂല്യവും കണ്ടെത്താൻ അദ്ദേഹം ആളുകളെ ഉപദേശിച്ചു. ജീവിതം ഒരു തടസ്സം സൃഷ്ടിച്ചാൽ, ഓടുകയോ ഒളിക്കുകയോ ചെയ്യാതെ അതിനെ നേരിടണം എന്നും രാകേഷ് പറഞ്ഞു. എല്ലാവർക്കും നല്ലത് വരട്ടെ എന്ന് ആശംസിച്ചുകൊണ്ടാണ് അദ്ദേഹം വീഡിയോ അവസാനിപ്പിച്ചത്.
സോഷ്യൽ മീഡിയ പ്രതികരണം
ഈ വീഡിയോ സോഷ്യൽ മീഡിയയിൽ വൈറലായതിനെ തുടർന്ന് നിരവധി പേർ പിന്തുണയും പ്രചോദനകരവുമായ സന്ദേശങ്ങൾ പങ്കുവെച്ചു. താനും കഴിഞ്ഞ വർഷം ഒരു കോർപ്പറേറ്റ് ജോലി ഉപേക്ഷിച്ചെന്നും, അത് എളുപ്പമായിരുന്നില്ലെങ്കിലും പഠിക്കുന്നതിലും വളരുന്നതിലും സന്തോഷം കണ്ടെത്തിയെന്നും ഒരാൾ എഴുതി.
രാകേഷിന്റെ ധൈര്യത്തെയും ജീവിതത്തോടുള്ള കാഴ്ചപ്പാടിനെയും നിരവധി പേർ പ്രശംസിച്ചു, വലിയൊരു മാറ്റം ആലോചിക്കുന്ന ആർക്കും ഇത് പ്രചോദനമാണെന്നും അവർ പറഞ്ഞു.
“ഞാൻ എച്ച്.ആർ, മാർക്കറ്റിംഗ് എന്നിവയിൽ എം.ബി.എ. എടുത്തയാളാണ്, ഞാനൊരു ഡ്രൈവറാണ്.. ഞാൻ റാപ്പിഡോയും ഓടിക്കുന്നു.” ഒരു ഉപയോക്താവ് അഭിപ്രായപ്പെട്ടു,
മറ്റൊരാൾ കുറിച്ചു, “ഞാനൊരു ഓട്ടോ ഓടിക്കുന്ന മനുഷ്യനെയല്ല കാണുന്നത്, അഹങ്കാരത്തെയും സാമൂഹിക വിലക്കുകളെയും അതിജീവിച്ച ഒരു മനുഷ്യനെയാണ്! നിങ്ങൾ പ്രചോദനമാണ്!”
