നഗരങ്ങളിലെ പൊതുസ്ഥലത്തെ മൂത്രവിസര്ജനം തടയാന് ബുദ്ധിപരമായ നീക്കവുമായി മൈസൂരു സിറ്റി കോർപ്പറേഷൻ . ഏറെ തിരക്കുള്ള സബർബൻ ബസ് സ്റ്റാൻഡിന് സമീപം, അധികൃതർ അടുത്തിടെ ഒരു സ്റ്റീൽ മിറർ ഭിത്തി സ്ഥാപിച്ചാണ് നാട്ടുകാരെ ഞെട്ടിച്ചത്. ശുചീകരണ പ്രവർത്തനങ്ങൾ പലതവണ നടത്തിയിട്ടും ആളുകൾ പരസ്യമായി മൂത്രമൊഴിക്കാൻ സ്ഥിരമായി ഉപയോഗിച്ചിരുന്ന സ്ഥലമായിരുന്നു ഇത്.
ഈ ഭിത്തി തിളക്കമുള്ള സ്റ്റീൽ കണ്ണാടി കൊണ്ട് പൊതിഞ്ഞതോടെ, അവിടെ മൂത്രമൊഴിക്കാൻ ശ്രമിക്കുന്നവർ സ്വന്തം പ്രതിബിംബം തന്നെ കാണേണ്ടി വരും. ഒരാൾ സ്വന്തം പ്രവർത്തി നേരിട്ട് കാണുമ്പോൾ അത് ചെയ്യാൻ മടിക്കുമെന്ന മനഃശാസ്ത്രപരമായ തന്ത്രമാണ് ഇതിന് പിന്നിലുള്ളത്.
സ്വച്ഛ് ഭാരത് അഭിയാന്റെ ഭാഗമായി, വെറുതെ പിഴ ഈടാക്കുന്നതിന് പകരം സ്മാർട്ട് ഡിസൈനുകൾ ഉപയോഗിച്ച് മാറ്റം കൊണ്ടുവരാനാണ് നഗരസഭയുടെ നീക്കം. പ്രതിദിനം ആയിരക്കണക്കിന് യാത്രക്കാർ എത്തുന്ന സബർബൻ ബസ് സ്റ്റാൻഡ് ഈ പരീക്ഷണത്തിന് ഏറ്റവും അനുയോജ്യമായ ഇടമാണ്. നിലവിൽ ഈ കണ്ണാടികൾ ഫലപ്രദമാണെന്നും പ്രദേശം വൃത്തിയായി സൂക്ഷിക്കാൻ സഹായിക്കുന്നുവെന്നുമാണ് റിപ്പോർട്ടുകൾ. മറ്റ് നഗരങ്ങൾക്കും മാതൃകയാക്കാവുന്ന ലളിതവും ചിലവ് കുറഞ്ഞതുമായ ഒരു പരിഹാരമാണിത്.
