ന്യൂഡല്‍ഹി: വ്യക്തിവൈരാഗ്യത്തെ തുടര്‍ന്ന് 29 കാരനെ കുട്ടിക്കുറ്റവാളി കുത്തി കൊലപ്പെടുത്തി പ്രതികാരം തീര്‍ത്തു. സെന്‍ട്രല്‍ ഡല്‍ഹിയില്‍ നടന്ന സംഭവത്തില്‍ 29 വയസ്സുള്ള മുള്‍ട്ടാനി ദണ്ഡ പ്രദേശത്തെ താമസക്കാരനായ അമിത് ആണ് മരിച്ചത്. കൊല ചെയ്ത ശേഷം കത്തിയുമായി പ്രായപൂര്‍ത്തിയാകാത്ത കുറ്റവാളി നബി കരീം പോലീസ് സ്റ്റേഷനിലെത്തി കീഴടങ്ങുകയും ചെയ്തു.
വെള്ളിയാഴ്ച പുലര്‍ച്ചെ 2 മണിയോടെ നബി കരീം പോലീസ് സ്റ്റേഷനിലെ പട്രോളിംഗ് സ്റ്റാഫ് മുള്‍ട്ടാനി ദണ്ഡയിലെ ഗാലി നമ്പര്‍ 10 ല്‍ കുത്തേറ്റ നിലയില്‍ മൃതദേഹം കണ്ടെത്തുകയും ചെയ്തു. അന്വേഷണത്തില്‍, മരിച്ചയാളും പ്രതികളും ഒരേ പ്രദേശത്തെ താമസക്കാരാണെന്നും ക്രിമിനല്‍ ചരിത്രമുണ്ടെന്നും വ്യക്തമായി.
ഉത്തര്‍പ്രദേശിലെ ദിയോറിയ സ്വദേശിയായ അമിത് നിരവധി ക്രിമിനല്‍ കേസുകളില്‍ ഉള്‍പ്പെട്ടിട്ടുണ്ട്. രണ്ട് ദിവസം മുമ്പ് അമിത് പ്രായപൂര്‍ത്തിയാകാത്ത പ്രതിയെ അപമാനിക്കുകയും അവനില്‍ നിന്നും പണം തട്ടിയെടുക്കുകയും ചെയ്തിരുന്നു. പ്രതികാരം ചെയ്യാന്‍ പ്രതി മറ്റൊരു കൂട്ടാളിക്കൊപ്പം അമിത്തിനെ തിരയുകയായിരുന്നു, രാത്രിയില്‍ അവനെ കണ്ടെത്തുകയും അക്രമിക്കുകയും ചെയ്തു.
കുറ്റകൃത്യം നടത്തിയ ശേഷം കൃത്യം നടത്തിയ ആയുധവുമായി പ്രായപൂര്‍ത്തിയാകാത്തയാള്‍ പോലീസ് സ്റ്റേഷനിലെത്തിയപ്പോള്‍ കൂട്ടാളി ഓടി രക്ഷപ്പെട്ടു. രക്തം പുരണ്ട വസ്ത്രങ്ങളും കുറ്റകൃത്യത്തിന്റെ ആയുധവുമായി പ്രായപൂര്‍ത്തിയാകാത്തയാളെ പോലീസ് പിടികൂടി.
പ്രായപൂര്‍ത്തിയാകാത്ത പ്രതി നിരവധി കേസുകളില്‍ ഉള്‍പ്പെട്ടിട്ടുണ്ടെന്നും വധശ്രമക്കേസില്‍ ഒരാഴ്ച മുമ്പ് ഒബ്‌സര്‍വേഷന്‍ ഹോമില്‍ നിന്ന് വിട്ടയച്ചതായും ഉദ്യോഗസ്ഥര്‍ പറഞ്ഞു.
